ນາຍົກ ເນັ້ນໃຫ້ຂະແໜງອຸດສາຫະກຳ ແລະ ການຄ້າ ສືບຕໍ່ເອົາໃຈໃສ່ແກ້ສະພາບຄວາມຫຍຸ້ງຍາກດ້ານເສດຖະກິດ-ການເງິນ

ໃນໂອກາດເຂົ້າຮ່ວມກອງປະຊຸມປະຈຳປີ 2022 ຂອງຂະແໜງອຸດສາຫະກຳ ແລະ ການຄ້າ ໃນວັນທີ 7 ເມສາ 2023 ຜ່ານມາ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ໂອ້ລົມໃຫ້ທິດຊີ້ນໍາຕໍ່ກອງປະຊຸມ ເພື່ອເປັນບ່ອນອີງໃນການຈັດຕັ້ງຜັນຂະຫຍາຍໃນວຽກງານຂະແໜງອຸດສາຫະກໍາ ແລະ ການຄ້າ (ອຄ) ໂດຍໄດ້ເນັ້ນບາງບັນຫາຕ້ອງສືບຕໍ່ເອົາໃຈໃສ່ແກ້ໄຂໃນຕໍ່ໜ້າເປັນຕົ້ນການຜະລິດເປັນສິນຄ້າປະເພດຕ່າງໆບໍ່ທັນຫລາກຫລາຍ, ຄຸນນະພາບ ກໍຄືມາດຕະຖານບໍ່ທັນດີ ໂດຍສະເພາະສິນຄ້າສົ່ງອອກໄປຕ່າງປະເທດ ແລະ ການຜະລິດສິນຄ້າທົດແທນນຳເຂົ້າ ແລະ ສົ່ງອອກ ຍັງບໍ່ມີທັນຫລາຍ, ອັດຕາການຂາດດຸນລະຫວ່າງການນຳເຂົ້າ ແລະ ສົ່ງອອກໂດຍລວມ ເຫັນວ່າຍັງສູງ, ກະແສເງິນຕາໄຫລອອກນອກປະເທດຫລາຍກວ່າຈຳນວນເງິນໄຫລເຂົ້າປະເທດ.

ຕໍ່ກັບສະພາບຄວາມຫຍຸ້ງຍາກທາງດ້ານເສດຖະກິດ ແລະ ການເງິນ, ອັດຕາເງິນເຟີ້, ລາຄານໍ້າມັນ ແລະ ສິນຄ້າແພງຂຶ້ນ ໃນຂະນະທີ່ອຸດສາຫະກຳ ແລະ ການຜະລິດພາຍໃນຍັງອ່ອນ ແລະ ຂະຫຍາຍຕົວຊ້າ. ສະນັ້ນ, ຈຶ່ງຮຽກຮ້ອງໃຫ້ຂະແໜງອຸດສາຫະກຳ ແລະ ການຄ້າ ຕ້ອງໄດ້ບຸກໜ້າບືນຕົວ ແລະ ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ເພື່ອຈະເປັນກຳລັງແຮງທາງດ້ານເສດຖະກິດ ຊ່ວຍລັດຖະບານ ໂດຍເນັ້ນໃຫ້ເອົາໃຈໃສ່ວຽກງານຈຸດສຸມສຳຄັນຄື:

1. ເພີ່ມທະວີຄວາມເອົາໃຈໃສ່ ໃນການປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ພົວພັນກັບຂະແໜງອຸດສາຫະກຳ ແລະ ການຄ້າ ຕາມມະຕິ 07/ລບ ໃຫ້ສຳເລັດຜົນ.
2. ຍົກສູງປະສິດທິພາບ ແລະ ປະສິດທິຜົນ ໃນການປະຕິບັດພາລະບົດບາດຂອງຂະແໜງອຸດສາຫະກຳ ແລະ ການຄ້າ ເປັນຕົ້ນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 9 ຕາມ 5 ແຜນງານຫລັກຂອງຂະແໜງການ.
3. ສຸມໃສ່ວຽກງານທີ່ລັດຖະບານ ກໍຄືສັງຄົມເລັ່ງທວງ ໃຫ້ຂະແໜງອຸດສາຫະກຳ ແລະ ການຄ້າ ຕ້ອງເອົາໃຈໃສ່ ແລະ ປະຕິບັດ ໃຫ້ເຫັນໝາກເຫັນຜົນໄວ ເປັນຕົ້ນແມ່ນການຄຸ້ມຄອງການນຳເຂົ້າ, ການຈຳໜ່າຍ ແລະ ປັບລາຄານໍ້າມັນເຊື້ອໄຟ ເພື່ອຮັບປະກັນຄວາມໝັ້ນຄົງ ໃນການສະໜອງນໍ້າມັນເຊື້ອໄຟ ເພື່ອການຜະລິດ ແລະ ການຊົມໃຊ້ພາຍໃນ;ຄຸ້ມຄອງລາຄາສິນຄ້າ ແລະ ຄ່າບໍລິການ ໃຫ້ຢູ່ໃນລະດັບທີ່ເໝາະສົມ, ບໍ່ກະທົບແຮງຕໍ່ຊີວິດການເປັນຢູ່ຂອງປະຊາຊົນ ແຕ່ກໍ່ເປັນທຳຕໍ່ຜູ້ຜະລິດ ແລະ ປະກອບທຸລະກິດ; ຄຸ້ມຄອງການນຳເຂົ້າ ແລະ ສົ່ງອອກ ສິນຄ້າໃຫ້ຮັດກຸມ, ສ້າງ ແລະ ເຊື່ອມຕໍ່ຖານຂໍ້ມູນ ສິນຄ້ານໍາເຂົ້າ ແລະ ສົ່ງອອກ ໃຫ້ເປັນລະບົບ ຄົບຖ້ວນ-ຊັດເຈນ; ສົ່ງເສີມການຜະລິດເປັນສິນຄ້າ ເພື່ອທົດແທນການນຳເຂົ້າ ແລະ ສົ່ງອອກ ຢ່າງແຂງແຮງ; ສົ່ງເສີມຈຸລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ຢ່າງແຂງແຮງ; ກວດກາການຄ້າ ແລະ ການດຳເນີນທຸລະກິດ ທີ່ບໍ່ສອດຄ່ອງກັບກົດໝາຍ ແລະ ລະບຽບການ ໃຫ້ຮັດກຸມ ແລະ ເຂັ້ມງວດກວ່າເກົ່າ ເພື່ອປົກປ້ອງຜົນປະໂຫຍດຂອງລັດ ແລະ ປະຊາຊົນ; ສົ່ງເສີມການພັດທະນາພາກທຸລະກິດ ແລະ ຜູ້ປະກອບການ ໃຫ້ເຂັ້ມແຂງກວ່າເກົ່າ; ເສີມຂະຫຍາຍການພົວພັນຮ່ວມມື ແລະ ການເຊື່ອມໂຍງສາກົນ ເພື່ອຂະຫຍາຍຕາໜ່າງ ແລະ ບໍລິມາດການຄ້າລະຫວ່າງປະເທດ ໃຫ້ນັບມື້ນັບຫລາຍຂຶ້ນ.
4. ເປັນເຈົ້າການຄົ້ນຄວ້າ ແລະ ປັບປຸງນິຕິກຳ ທີ່ບໍ່ສອດຄ່ອງກັບສະພາບ ແລະ ຄວາມຮຽກຮ້ອງຕ້ອງການຂອງວຽກງານ ເປັນຕົ້ນ: ດຳລັດວ່າດ້ວຍການຄຸ້ມຄອງລາຄາ ແລະ ຄ່າບໍລິການ, ດຳລັດວ່າດ້ວຍທຸລິກິດນໍ້າມັນເຊື້ອໄຟ, ດຳລັດວ່າດ້ວຍດ່ານຊາຍແດນ, ດຳລັດວ່າດ້ວຍການກວດກາການຄ້າ ແລະ ອື່ນໆ.
5. ປະສານສົມທົບກັບຂະແໜງການກ່ຽວຂ້ອງ ປັບປຸງກົນໄກການປະສານງານ ແລະ ປະສານສົມທົບ ເພື່ອໃຫ້ການປະຕິບັດພາລະບົດບາດ ຂອງແຕ່ລະພາກສ່ວນມີຄວາມຄ່ອງຕົວ, ມີປະສິດທິພາບ ແລະ ມີປະສິດທິຜົນສູງຂຶ້ນ