ທ່ານ ໄບເດນ ຕັ້ງເປົ້າລົງສະໝັກຊີງຕໍາແໜ່ງຜູ້ນຳສະໄໝທີ 2 ໃນການເລືອກຕັ້ງປະທານາທິບໍດີອາເມລິກາ 2024
ປະທານາທິບໍດີ ໂຈ ໄບເດນ ຂອງອາເມລິກາ ເປີດເຜີຍໃນເວລາໃຫ້ສໍາພາດຕໍ່ສໍານັກຂ່າວ NBC ວ່າ: ທ່ານວາງແຜນຈະລົງສະໝັກຊີງຕໍາແໜ່ງຜູ້ນໍາອາເມລິກາສະໄໝທີ 2 ໃນການເລືອກຕັ້ງປະທານາທິບໍດີອາເມລິກາ ປີ 2024 ແຕ່ຍັງບໍ່ພ້ອມຈະປະກາດຢ່າງເປັນທາງການ.
ໂດຍທ່ານ ໄບເດນ ແລະ ທ່ານ ນາງ ຄາມາລາ ແຮຣິສຮອງປະທານາທິບໍດີຂອງອາເມລິກາ ທັງສອງຕັ້ງເປົ້າຈະສະມັກລົງຊີງຕໍາແໜ່ງຜູ້ນໍາເບີ 1 ແລະ ເບີ 2 ຂອງອາເມລິກາອີກສະໄໝໃນການເລືອກຕັ້ງຜູ້ນໍາອາເມລິກາທີ່ຈະຈັດຂຶ້ນໃນປີໜ້າ.
ກ່ອນໜ້ານີ້ເຈົ້າໜ້າທີ່ທໍານຽບຂາວເຄີຍຄາດຄະເນວ່າ: ທ່ານ ໄບເດນ ຈະປະກາດລົງສະໝັກຕໍາແໜ່ງຜູ້ນໍາອາເມລິກາຢ່າງເປັນທາງການໃນເດືອນກຸມພາຜ່ານມາ ກ່ອນຈະມີທ່າອ່ຽງເລື່ອນໄປເປັນເດືອນກໍລະກົດປີນີ້ ໂດຍລາຍງານຫລ້າສຸດຄາດວ່າ: ທ່ານ ໄບເດນ ອາດລໍຖ້າຈົນກວ່າໄຕມາດການລະດົມທຶນຂອງໂຄງການໃໝ່ຈະເລີ່ມຕົ້ນຂຶ້ນໃນເດືອນກໍລະກົດ ເພື່ອໃຫ້ທ່ານມີເວລາຮວບຮວມເງິນບໍລິຈາກໃຫ້ໄດ້ຫລາຍທີ່ສຸດ ກ່ອນຈະເປີດເຜີຍຕໍ່ສາທາລະນະຢ່າງເປັນທາງການ ເຊິ່ງຍອດລະດົມທຶນລາຍໄຕມາດມັກຖືກເບິ່ງວ່າເປັນຕົວບົ່ງຊີ້ສໍາຄັນທີ່ສະທ້ອນໃຫ້ເຫັນເຖິງຄວາມແຂງແຮງຂອງໂຄງການນັ້ນໆ.
ປັດຈຸບັນຜູ້ທີ່ປະກາດຈະລົງສະໝັກຊີງຕໍາແໜ່ງປະທານາທິບໍດີອາເມລິກາໃນນາມພັກເດໂມແຄຣດແລ້ວຢ່າງໜ້ອຍ 2 ຄົນຄືທ່ານ ນາງ ມາຣຽນ ວິວລຽມສັນ ນັກຂຽນຊື່ດັງ ແລະ ທ່ານ ໂຣເບີດ ເຄນເນດີ ຈູເນຍ ນັກເຄື່ອນໄຫວຕໍ່ຕ້ານການສັກວັກຊີນ. ເບື້ອງຕົ້ນຍັງບໍ່ມີສະມາຊິກພັກເດໂມແຄຣດທີ່ໂດດເດັ່ນຄົນໃດປະກາດຈະລົງຊີງໄຊຕໍາແໜ່ງຜູ້ແທນພັກໃນການເລືອກຕັ້ງຄັ້ງໃຫຍ່ທີ່ກໍາລັງຈະມາເຖິງ.
ປັດຈຸບັນທ່ານ ໄບເດນ ມີອາຍຸ 80 ປີ ເຮັດໃຫ້ທ່ານກາຍເປັນປະທານາທິບໍດີອາເມລິກາ ທີ່ມີອາຍຸຫລາຍທີ່ສຸດໃນປະຫວັດສາດການເມືອງອາເມລິກາ ແລະ ຖ້າທ່ານສາມາດໄດ້ຮັບໄຊຊະນະໃນການເລືອກຕັ້ງຜູ້ນໍາອາເມລິກາໃນປີ 2024 ໄດ້ສໍາເລັດ ວາລະການດໍາລົງຕໍາແໜ່ງປະທານາທິບໍດີອາເມລິກາສະໄໝທີ 2 ຂອງທ່ານຈະສິ້ນສຸດລົງໃນເວລາທ່ານມີອາຍຸເຖິງ 86 ປີ ເຊິ່ງຄົນຈໍານວນບໍ່ໜ້ອຍຕ່າງສະແດງຄວາມກັງວົນເຖິງອາຍຸທີ່ເພີ່ມຂຶ້ນ ລວມທັງບັນຫາດ້ານສຸຂະພາບຂອງທ່ານທີ່ອາດສົ່ງຜົນຕໍ່ການບໍລິຫານປະເທດບໍ່ຫລາຍກໍໜ້ອຍ.
ອ້າງອີງ:
www.bbc.com/news/world-us-canada-65208051
http://www.reuters.com/…/president-biden-says-he-will…/
http://www.abc.net.au/…/united-states…/102206668
