ເມືອງເຟືອງ ສະຖານທີ່ທ່ອງທ່ຽວທີ່ໂອບເອື້ອດ້ວຍມົນສະເໜ່ຂອງທໍາມະຊາດ

ໂດຍ: ທິດກໍ່າ

ເມືອງເຟືອງຍອດຕໍານານແຫ່ງນະວະນິຍາຍການຕໍ່ສູ້ກັນລະຫວ່າງສັງສິນໄຊກັບຍັກກຸມພັນຈົນກາຍມາເປັນທີ່ມາຂອງຜາທໍ່ໜໍ່ຄໍາ ແລະ ສາມໝື່ນຕູບເຟືອງ ເຊິ່ງໃນປັດຈຸບັນ ກໍກາຍມາເປັນເມືອງເຟືອງ ທີ່ໂອບເອື້ອດ້ວຍມົນສະເໜ່ຂອງທໍາມະຊາດ. ອີກສິ່ງໜຶ່ງທີ່ຍັງຝັງໃຈກັບຄົນລາວເຮົາຈໍານວນບໍ່ໜ້ອຍກໍຄືຊາວເມືອງເຟືອງແມ່ນສຽງເພງ “ສາມໝື່ນເມືອງເຟືອງ” ເຊິ່ງຍັງມີຄວາມຜູກພັນໂດ່ງດັງເປັນອໍາມະຕະເກາະຕິດກັບຈິດໃຈຂອງຄົນລາວ ໂດຍສະເພາະຄົນເມືອງເຟືອງຈົນມາຮອດທຸກວັນນີ້.

ປັດຈຸບັນ ເມືອງເຟືອງເປັນເມືອງໜຶ່ງໃນຈໍານວນ 11 ເມືອງທີ່ຂຶ້ນກັບແຂວງວຽງຈັນ ເຊິ່ງຕັ້ງຢູ່ທິດຕາເວັນຕົກຂອງແຂວງວຽງຈັນຫ່າງຈາກເທສະບານແຂວງປະມານ 70 ກວ່າກິໂລແມັດ ແລະ ຫ່າງຈາກນະຄອນຫລວງວຽງຈັນປະມານໜຶ່ງຮ້ອຍກວ່າກິໂລແມັດ. ເມືອງເຟືອງເປັນເມືອງທີ່ມີຕໍານານອັນລຶກລັບ, ມີພູຜາປ່າໄມ້ຫ້ວຍນໍ້າລໍາເຊ, ມີທົ່ງນາປ່າເຂົາ, ທິວທັດທໍາມະຊາດທີ່ສວຍສົດງົດງາມ ຢູ່ຫລາຍແຫ່ງທີ່ໜ້າໄປທ່ຽວໄປຊົມເພື່ອສໍາຜັດກັບບັນຍາກາດຕົວຈິງ.

ໃນໂອກາດປີໃໝ່ລາວ ພສ 2566 ຄສ 2023 ທີ່ຈະມາເຖິງນີ້ ຈຸດເດັ່ນໆທີ່ໜ້າໄປທ່ຽວໄປຊົມເມືອງເຟືອງກໍຄື ຜາທໍ່ໜໍ່ຄໍາ, ທ່ຽວເລາະຊົມຕູບເຟືອງທີ່ຕັ້ງຢັງຢາຍເດຍລະດາດ ແລະ ພູຜາທີ່ຕັ້ງເຈີ້ນເທີ້ນຕາມທົ່ງນາປ່າເຂົາ ເຊິ່ງບາງບ່ອນກໍຫລຽວເຫັນຢູ່ໄກໆ, ບາງບ່ອນກໍສະຫລັບສັບຊ້ອນກັນ ເຊິ່ງເຫັນພາບທໍາມະຊາດນີ້ແລ້ວເໝືອນມີຄົນເອົາໜ່ວຍພູໄປຕັ້ງຢອງໄວ້ໃນທິວທັດທໍາມະຊາດອັນຍາວຢຽດສຸດສາຍຕາ.

ນອກຈາກສິ່ງທີ່ເວົ້າມານີ້ແລ້ວ ຜູ້ທີ່ໄດ້ໄປທ່ອງທ່ຽວກໍຂີ່ເຮືອຕາມສາຍນໍ້າລີກ, ໃສ່ບາດຍາມເຊົ້າທີ່ເຮືອແພ, ຊົມວັດວາອາຮາມຕ່າງໆຕາມອັດທະຍາໄສ. ນີ້ຄືມົນສະເໜ່ຂອງເມືອງເຟືອງທີ່ຊັກຊວນອວນໃຈແຂກພາຍໃນ ແລະ ຕ່າງປະເທດໃນພາກັນໄປທ່ຽວເມືອງເຟືອງຢ່າງອີ່ມເອີບ ແລະ ເຕັມໃຈ. ເພາະສະນັ້ນ ໂອກາດປີໃໝ່ລາວທີ່ຈະມາເຖິງເມືອງເຟືອງອາດເປັນຈຸດປາຍທາງທີ່ນັກທ່ອງທ່ຽວຄວນໄປສໍາຜັດກັບທໍາມະຊາດອັນສວຍສົດງົດງາມ.

ຈາກນະຄອນຫລວງວຽງຈັນຫາເມືອງເຟືອງດຽວນີ້ສະພາບເສັ້ນທາງສະດວກສະບາຍ ເຊິ່ງສາມາດຂີ່ລົດຈາກນະຄອນຫລວງວຽງຈັນຕາມສາຍທາງດ່ວນວຽງຈັນ-ວັງວຽງ ເມື່ອເວລາໄປຮອດຫີນເຫີບໃກ້ຈະຮອດສົ້ນຂົວກໍລ້ຽວຊ້າຍເດີນທາງໄປພຽງໜຶ່ງຊົ່ວໂມງກວ່າໆກໍຈະຮອດເມືອງເຟືອງ ເພາະຈາກຫີນເຫີບໄປເມືອງເຟືອງໄດ້ມີການກໍ່ສ້າງບູລະນະຄືນໃໝ່ເປັນທີ່ຮຽບຮ້ອຍແລ້ວ ຫົນທາງສະດວກສະບາຍ ແລະ ຫລັງຈາກນັ້ນ ທ່ານກໍທ່ຽວຕາມອັດທະຍາໄສ ໂດຍເລາະສໍາຜັດກັບແຫລ່ງທ່ອງທ່ຽວຕາມຈຸດຕ່າງໆທີ່ໂອບເອື້ອດ້ວຍທໍາມະຊາດ ຮັບຮອງວ່າເມື່ອໄດ້ສໍາຜັດແລ້ວຈະບໍ່ຜິດຫວັງຢ່າງແນ່ນອນ.