ກອງທຶນປົກປັກຮັກສາສິ່ງແວດລ້ອມ ສະໜອງທຶນເກືອບ 4 ຕື້ກີບ ເພື່ອສ້າງເງື່ອນໄຂໃຫ້ 7 ໂຄງການປົກປັກຮັກສາສິ່ງແວດລ້ອມ
ກອງທຶນປົກປັກຮັກສາສິ່ງແວດລ້ອມ (ກປສ) ສະໜອງທຶນເກືອບ 4 ຕື້ກີບ ໃຫ້ກັບ 7 ໂຄງການ ເພື່ອປະກອບສ່ວນເຂົ້າໃນການຈັດຕັ້ງປະຕິບັດໂຄງການຈຳນວນດັ່ງກ່າວໃຫ້ບັນລຸຕາມຈຸດປະສົງຄາດໝາຍທີ່ວາງໄວ້ນັ້ນ, ກໍຄື ການສ້າງເງື່ອນໄຂໃຫ້ບັນດາໂຄງການໃນການປົກປັກຮັກສາສິ່ງແວດລ້ອມ.
ສຳລັບໂຄງການທີ່ໄດ້ຮັບທຶນປະກອບມີ: ໂຄງການຫລຸດຜ່ອນຜົນກະທົບ ລະ ຫ່ວາງ ຄົນ ກັບ ຊ້າງປ່າ ໄລຍະການຈັດຕັ້ງປະຕິບັດ 2023-2025 ມູນຄ່າ 664,6 ລ້ານກີບ; ໂຄງການສົ່ງເສີມການມີສ່ວນຮ່ວມຈາກຊຸມຊົນ ເພື່ອການຄຸ້ມຄອງ ແລະ ປົກປັກຮັກສາປ່າໄມ້ແບບຍືນຍົງ ໄລຍະການຈັດຕັ້ງປະຕິບັດ 2022-2025 ມູນຄ່າ 800 ລ້ານກີບ; ໂຄງການຈັດຕັ້ງປະຕິບັດແຜນການຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມ ຂັ້ນສູງກາງ ແລະ ທ້ອງຖິ່ນ ໄລຍະການຈັດຕັ້ງປະຕິບັດ 2023-2025 ມູນຄ່າ 560 ລ້ານກີບ; ໂຄງການປັບປຸງທັດສະນີຍະພາບ ເດີ່ນໜ້າກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໃຫ້ຂຽວ, ສະອາດ, ງາມຕາ, ກາຍເປັນກະຊວງສີຂຽວ ແລະ ປົກປັກຮັກສາສິ່ງແວດລ້ອມ ຕາມເສັ້ນທາງຕັດໃໝ່ໜອງບຶກ ໄລຍະການຈັດຕັ້ງປະຕິບັດ 2023-2024 ມູນຄ່າ 359,08 ລ້ານກວ່າກີບ.
ສ່ວນອີກ 2 ໂຄງການປະກອບມີ: ໂຄງການສ້າງໂຮງຮຽນ ແລະ ພະແນກ ການໃຫ້ກາຍເປັນສະຖານທີ່ຕົວແບບດ້ານສິ່ງແວດລ້ອມຂຽວ, ສະອາດ, ງາມຕາ ຢູ່ໃນນະຄອນຫລວງພະບາງ ໄລຍະການຈັດຕັ້ງປະຕິບັດ 2023-2024 ມູນຄ່າ 289 ລ້ານກີບ ແລະ ໂຄງການສ້າງບ້ານ, ໂຮງຮຽນຕົວແບບຂຽວ, ສະອາດ, ງາມຕາ ແຂວງໄຊຍະບູລີ ໄລຍະການຈັດຕັ້ງປະຕິບັດ 2023-2024 ມູນຄ່າ 500 ລ້ານກີບ.
ເຊິ່ງພິທີລົງນາມສັນຍາສະໜອງທຶນດັ່ງກ່າວໄດ້ຈັດຂຶ້ນໃນອາທິດຜ່ານມາ ທີ່ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ (ຊສ), ໂດຍການລົງນາມໂດຍ ທ່ານ ນາງ ບົວຄໍາ ສຸລິວັນ ຫົວໜ້າຫ້ອງການກອງທຶນປົກປັກຮັກສາສິ່ງ ແວດລ້ອມ (ຕາງໜ້າຜູ້ໃຫ້ທຶນ) ແລະ ຜູ້ຕາງໜ້າຈາກ 7 ໂຄງການທີ່ໄດ້ຮັບທຶນ ມີ ທ່ານ ພູວົງ ຫລວງໄຊຊະນະ ຮອງລັດຖະມົນຕີກະຊວງ ຊສ, ພ້ອມດ້ວຍ ບັນດາກົມ ຄະນະຊີ້ນໍາໂຄງການ ແລະ ຫົວໜ້າໂຄງການເຂົ້າຮ່ວມ.
ຂໍ້ມູນ: Vientiane Mai
