ເຈົ້າໜ້າທີ່ຕໍາຫລວດຈະລາຈອນ ນະຄອນຫລວງວຽງຈັນ ຈະສຸມກໍາລັງ 485 ສະຫາຍ ເພື່ອປ້ອງກັນໃນຊ່ວງບຸນປີໃໝ່ລາວ ພສ 2566
ວັນທີ 10 ເມສາ 2023 ນີ້, ເຈົ້າໜ້າທີ່ຕໍາຫລວດຈະລາຈອນ ນະຄອນຫລວງວຽງຈັນ ຈັດກອງປະຊຸມຜ່ານແຜນການປ້ອງກັນບຸນປີໃໝ່ລາວ ພສ 2566 ໂດຍເປັນກຽດເຂົ້າຮ່ວມຂອງ ທ່ານ ພັທ ກິງຄໍາ ພົມມະຫາໄຊ ຮອງຫົວໜ້າກົມຕໍາຫລວດຈະລາຈອນ, ພັທ ທ່ານ ວິລະພົງ ສະເໜ່ຫາ ຫົວໜ້າພະແນກຕໍາຫລວດຈະລາຈອນ ນະຄອນຫລວງວຽງຈັນ, ມີຮອງພະແນກ, ກອງວິຊາສະເພາະ ແລະ ກອງຈະລາຈອນ 9 ຕົວເມືອງເຂົ້າຮ່ວມ.
ທ່ານ ພັທ ທອງສະຫວັນ ນາມວົງ ຮອງພະແນກຕໍາຫລວດຈະລາຈອນ ນະຄອນຫລວງວຽງຈັນ ກ່າວວ່າ: ເພື່ອເຮັດໃຫ້ການສະເຫລີມສະຫລອງບຸນປີໃໝ່ລາວ ພສ 2566 (ຄສ 2023) ແຕ່ວັນທີ 14-16 ເມສາ 2023 ທີ່ຈະມາເຖິງນີ້ ເປັນໂອກາດໜຶ່ງທີ່ສໍາຄັນໃນການສືບຕໍ່ເສີມຂະຫຍາຍມູນເຊື້ອຮີດຄອງປະເພນີອັນດີງາມ ແລະ ຄວາມສາມັກຄີເປັນປຶກແຜ່ນຂອງຊາດທີ່ມີມາແຕ່ດົນນານ ແລະ ເປັນບຸນປາງໃຫຍ່ປະຈຳຊາດ ຕິດພັນກັບການສົ່ງເສີມການທ່ອງທ່ຽວລາວ ແລະ ຈັດຕັ້ງສະເຫລີມສະຫລອງດ້ວຍບັນຍາກາດອັນເບີກບານມ່ວນຊື່ນ ອວຍໄຊໃຫ້ພອນເຊິ່ງກັນ ແລະ ກັນ ຢູ່ພາຍໃນຄອບຄົວ, ວັດວາອາຣາມ ແລະ ສະຖານທີ່ສັກກະລະບູຊາຕ່າງໆຢ່າງເບີກບານມ່ວນຊື່ນ, ທັງຮັບປະກັນໄດ້ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ມີຄວາມສະອາດຈົບງາມ. ສະນັ້ນ, ພະແນກຕຳຫລວດຈະລາຈອນ ຫ້ອງຕຳຫຼວດ ປກສ ນະຄອນຫລວງວຽງຈັນ ຈຶ່ງໄດ້ສ້າງແຜນປ້ອງກັນ ແລະ ເຄື່ອນໄຫວວຽກງານວິຊາສະເພາະຂຶ້ນ. ໃນນັ້ນ, ໄດ້ສຸມກໍາລັງຕໍາຫລວດຈະລາຈອນເຂົ້າຮ່ວມປ້ອງກັນທັງໝົດ 486 ສະຫາຍ, ຍິງ 15 ສະຫາຍ. ໃນນີ້, ມີກໍາລັງປະຈໍາຈຸດ, ຈັດລະບຽບກວດກາຕາມສາຍທາງ, ຈຸດກວດກາ ແລະ ຄອຍເຫດ ທັງໝົດ 285 ສະຫາຍ, ຍິງ 15 ສະຫາຍ; ກໍາລັງປະຈໍາປ້ອມ 201 ສະຫາຍ; ຕັ້ງຈຸດກວດກາທັງໝົດ 11 ຈຸດ. ໃນນັ້ນ, ຈຸດກວດກາຕະຫຼອດ 24 ຊົ່ວໂມງ 5 ຈຸດຄື: ເສັ້ນທາງ 13 ໃຕ້, ເສັ້ນທາງ 13 ເໜືອ, ເສັ້ນທາງເລກ 10, ເສັ້ນທາງເລກ 11 ແລະ ເສັ້ນທາງທ່າເດື່ອ; ມີວັດ 9 ຈຸດ, ຈຸງານຈັດລະບຽບກວດກາຕາມສາຍທາງ 4 ຈຸ, ປະຈຳການຄອຍເຫດ 10 ຈຸ, ປ້ອມ 67 ປ້ອມ; ພາຫະນະຮັບໃຊ້ 16 ຄັນ.
