ບຸນປີໃໝ່ລາວປີ 2023 ນີ້ ນະຄອນຫລວງວຽງຈັນ ຕ້ອງມີຄວາມສະຫງົບ-ປອດໄພດີ

ກອງປະຊຸມຜ່ານແຜນປ້ອງກັນໃນໄລຍະສະເຫລີມສະຫລອງປີໃໝ່ລາວ (14-16 ເມສາ 2023)  ທີ່ຈັດຂຶ້ນວັນທີ 6 ເມສາ 2023 ຜ່ານມາ ຢູ່ກອງບັນຊາການ ປກສ ນວ.

ທ່ານ ພົຈວ ບົວພັນ ຟອງມະນີ ຫົວໜ້າກອງບັນຊາການ ປກສ ນະຄອນຫລວງວຽງຈັນ ໃນນາມເປັນປະທານກອງປະຊຸມ ກ່າວເນັ້ນວ່າ: ບັນດາຫ້ອງ, ກອງພັນ, ເມືອງ, ຄ້າຍຄຸ້ມຂັງ-ດັດສ້າງ, ຕ້ອງເອົາໃຈໃສ່ຕິດຕາມກວດກາການເຄື່ອນໄຫວຂອງກຸ່ມຄົນບໍ່ດີ ໂດຍສະເພາະແມ່ນບັນດາເມືອງທີ່ມີກິດກະກຳຕ່າງໆ; ພ້ອມທັງສ້າງແຜນປະຈໍາການ ແລະ ເຂົ້າປະຈໍາການຕະຫລອດ 24 ຊົ່ວໂມງ ເພື່ອກຽມຄວາມພ້ອມໃນການແກ້ໄຂປະກົດການຫຍໍ້ທໍ້ຕ່າງໆ ທີ່ອາດຈະເກີດຂຶ້ນ, ເຂັ້ມງວດກວດກາຄວາມເປັນລະບຽບຮຽບຮ້ອຍ ຢູ່ພາຍໃນຄ້າຍຄຸມຂັງ-ດັດສ້າງ ບໍ່ໃຫ້ມີນັກໂທດ ຫລື ຜູ້ຖືກຫາໂຕນຄຸກ. ນອກນີ້, ຕ້ອງກວດກາພາຫະນະມອດໄຟໃຫ້ມີຄວາມພ້ອມໃຊ້ງານຕະຫລອດເວລາ; ພ້ອມທັງອອກກວດກາຈຸດຫລໍ່ແຫລມ, ຈຸດສ່ຽງຢູ່ຂອບເຂດແຕ່ລະເມືອງ, ປະສານສົມທົບກັບການຈັດຕັ້ງບ້ານ, ທະຫານຊາຍແດນ ຕິດຕາມກວດກາບໍ່ໃຫ້ມີການລັກລອບເຂົ້າເມືອງຢ່າງເດັດຂາດ ແນໃສ່ເຮັດໃຫ້ໄລຍະສະເຫລີມສະຫລອງປີໃໝ່ລາວມີຄວາມສະຫງົບ ແລະ ເປັນລະບຽບຮຽບຮ້ອຍ.

ໃນກອງປະຊຸມ, ທ່ານ ພັທ ບຸນລັບ ໄຊຍະວົງ ຮອງຫົວໜ້າຫ້ອງການ ປກສ ນວ ໃຫ້ຮູ້ວ່າ: ໜ້າວຽກຂອງເຫລົ່າວິຊາສະເພາະທີ່ຕ້ອງສຸມໃສ່ປະຕິບັດມີ 11 ວຽກສຳຄັນ ເປັນຕົ້ນແມ່ນ: ເຄື່ອນໄຫວວຽກງານໂຄສະນາຢູ່ຕາມໝູ່ບ້ານ, ຫົວໜ່ວຍທຸລະກິດ, ສໍານັກງານ-ອົງການ, ໂຄສະນາຜ່ານສື່ດ້ວຍຮູບການຕ່າງໆ ເພື່ອໃຫ້ຄົນທົ່ວສັງຄົມຕື່ນຕົວເຂົ້າຮ່ວມວຽກງານປ້ອງກັນ ແລະ ມີສະຕິລະວັງຕົວຕໍ່ກົນອຸບາຍຂອງກຸ່ມບໍ່ຫວັງດີ; ຕັ້ງໜ້າປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະ ເຄື່ອນໄຫວວຽກງານສະກັດກັ້ນ, ແກ້ໄຂປະກົດການຫຍໍ້ທໍ້ໃນສັງຄົມທີ່ພົ້ນເດັ່ນເຊັ່ນ: ກຸ່ມແກ້ງກວນເມືອງ, ປຸ້ນຊັບ, ຊີງຊັບ, ລັກຊັບ, ອາຊະຍາກໍາທາງດ້ານເຕັກໂນໂລຊີ ແລະ ອື່ນໆ; ຄຸ້ມຄອງຄົນເຂົ້າ-ອອກເມືອງ ຢູ່ຕາມດ່ານສາກົນ ແລະ ດ່ານປະເພນີ ທີ່ຢູ່ໃນຄວາມຮັບຜິດຊອບຂອງນະຄອນຫລວງວຽງຈັນ, ປະສານສົມທົບກັບທະຫານຊາຍແດນ ສະກັດກັ້ນການລັກລອບເຂົ້າ-ອອກຕາມຊາຍແດນລາວ-ໄທ; ຈັດວາງກຳລັງຈະລາຈອນຢູ່ຕາມຈຸດ, ເສັ້ນທາງ ເພື່ອອຳນວຍຄວາມສະດວກການສັນຈອນ, ກວດກາພາຫະນະ, ກວດທາດເຫລົ້າ, ສິ່ງທີ່ຜິດກົດໝາຍທຸກປະເພດ, ຖ້າພົບເຫັນຜູ້ຂັບຂີ່ພາຫະນະທຸກປະເພດເມົາເກີນກໍານົດໃຫ້ຢຸດພັກເຊົາຈົນກວ່າສ່ວງເມົາມີສະຕິຈຶ່ງອະນຸຍາດໃຫ້ເດີນທາງຕໍ່ ແລະ ຈັດຕັ້ງຈຸປະຈຳການຕະຫລອດ 24 ຊົ່ວໂມງ ເພື່ອແກ້ໄຂອຸບັດຕິດເຫດ; ຈັດຕັ້ງກຳລັງ, ພາຫະນະກຽມພ້ອມເຮັດວຽກງານສະກັດກັ້ນ ແລະ ຕ້ານອັກຄີໄພ; ຈັດຕັ້ງກໍາລັງປ້ອງກັນເຄື່ອນທີ່, ສະຖານີ 1191 ສົມທົບກັບກຳລັງທະຫານນະຄອນຫລວງວຽງຈັນ, ກຳລັງກະຊວງປ້ອງກັນຄວາມສະຫງົບ ເຄື່ອນໄຫວລາດຕະເວນຕາມເສັ້ນທາງສ່ຽງ, ຈຸດຫລໍ່ແຫລມ; ສົມທົບກັບອົງການປົກຄອງ, ກໍາລັງ ປກສ, ກອງຫລອນບ້ານເຮັດວຽກງານປ້ອງກັນເວນຍາມ, ຄຸ້ມຄອງການເຄື່ອນໄຫວໄປ-ມາ, ເຂົ້າ-ອອກບ້ານຂອງພົນລະເມືອງ, ສ້າງບົດບັນທຶກຮັກສາຄວາມສະຫງົບກັບຄອບຄົວ, ຫົວໜ່ວຍທຸລະກິດຕ່າງໆ ທີ່ມີຄວາມສ່ຽງ; ຈັດຕັ້ງຈຸດປ້ອງກັນຢູ່ບັນດາເສັ້ນທາງເຂົ້າ-ອອກນະຄອນຫລວງວຽງຈັນ, ຈຸດຈັດກິດຈະກຳສະຫລອງບຸນປີໃໝ່ ແລະ 6 ຈຸດສໍາຄັນໃນນະຄອນຫລວງ, ພື້ນທີ່ຕັ້ງຢູ່ເມືອງໃດ ແມ່ນມອບໃຫ້ເມືອງນັ້ນຮັບຜິດຊອບ ໂດຍສົມທົບກັບເຫລົ່າຮົບວິຊາສະເພາະ ບັນດາຫ້ອງ ແລະ ເຫລົ່າຮົບວິຊາສະເພາະ ຂອງກະຊວງ ປກຊ-ປກສ.