ທະນາຄານ ແຫ່ງ ສປປ ລາວ ອອກມາແຈ້ງການ ເລື່ອງໃບທະນະບັດ 5 ແສນກີບທີ່ແຊກັນໃນເຟສ ເປັນຂ່າວປອມ
ວັນທີ 10 ເມສາ 2023 ນີ້ ທະນຄານແຫ່ງ ສປປ ລາວ ອອກມາແຈ້ງການລະບຸວ່າ: ໃນປັດຈຸບັນມີບຸກຄົນບໍ່ຫວັງດີ ໄດ້ນໍາເອົາດ້ານໜ້າຂອງໃບທະນະບັດ ປະເພດໃບ 100.000 ກີບ (ປີ 2011) ມາຕັດຕໍ່ໃສ່ເຮັດເປັນທະນະບັດ ປະເພດໃບ 500.000 ກີບ, ດ້ວຍການນໍາເອົາຮູບປະທານ ສຸພານຸວົງ ປ່ຽນໃສ່ແທນຮູບປະທານ ໄກສອນ ພົມວິຫານ ແລະ ດັດແປງຕົວເລກມູນຄ່າທີ່ເປັນຕົວເລກສາກົນ 100.000 ກີບ ມາເປັນ 500.000 ກີບ ແລະ ຕົວເລກລາວ ໑໐໐໐໐໐ ມາເປັນ ໕00000 ແລ້ວນໍາລົງສື່ອອນລາຍ, ເຮັດໃຫ້ເກີດຄວາມເຂົ້າໃຈຜິດຂອງສັງຄົມ ແລະ ມີການແຊຕໍ່ໆ ກັນໄປວ່າຈະມີການອອກນໍາໃຊ້, ຊຶ່ງເປັນຂ່າວທີ່ບໍ່ມີມູນຄວາມຈິງແຕ່ປະການໃດ (ເປັນຂ່າວປອມ).
ຂ່າວປອມດັ່ງກ່າວເຄີຍເກີດແລ້ວໃນປີ 2020 ທີ່ຜ່ານມາ ໄດ້ມີກຸ່ມຄົນບໍ່ຫວັງດີສ້າງຄວາມປັ່ນປ່ວນເຮັດຂ່າວປອມລັກສະນະນີ້ມາກ່ອນແລ້ວ ແລະ ຫ້ອງການ ທະນາຄານແຫ່ງ ສປປ ລາວ ໄດ້ອອກແຈ້ງການ ຊີ້ແຈງໃຫ້ສັງຄົມໄດ້ ຮັບຮູ້ ແລະ ເຂົ້າໃຈຕໍ່ຂໍ້ມູນຂ່າວສານ ທີ່ຖືກຕ້ອງວ່າເປັນການສ້າງຄວາມປັ່ນປ່ວນ ແລະ ຄວາມບໍ່ສະຫງົບໃນສັງຄົມ.
ພ້ອມທັງຂໍຢັ້ງຢືນວ່າເປັນຂ່າວປອມ ແລະ ຂໍແຈ້ງໃຫ້ສັງຄົມຊາບວ່າໂຄງປະກອບປະເພດໃບທະນະບັດ ຂອງ ສປປ ລາວ ທີ່ມີມູນຄ່າສູງສຸດໃນປັດຈຸບັນແມ່ນມີພຽງແຕ່ປະເພດໃບ 100.000 ກີບເທົ່ານັ້ນ, ພ້ອມນີ້ຂໍແຈ້ງມາຍັງທຸກພາກສ່ວນ ຈົ່ງມີສະຕິລະວັງຕົວບໍ່ໃຫ້ຫຼົງເຊື່ອຕໍ່ການປັ່ນປ່ວນສ້າງຂ່າວປອມດັ່ງກ່າວ.
ດັ່ງນັ້ນ, ຈຶ່ງແຈ້ງມາເພື່ອຊາບ ແລະ ຈົ່ງມີສະຕິລະວັງຕົວບໍ່ໃຫ້ຫລົງເຊື່ອຕໍ່ການໂຄສະນາໃນຮູບແບບຕ່າງໆຂອງ ກຸ່ມຄົນທີ່ບໍ່ຫວັງບໍ່ດີ ທີ່ຈະສ້າງຄວາມປັ່ນປ່ວນ ແລະ ຄວາມບໍ່ສະຫງົບໃນສັງຄົມ,
