ອູແກຣນສົ່ງອອກໄຟຟ້າໄດ້ຄັ້ງທໍາອິດໃນຮອບ 6 ເດືອນ ຫລັງຣັດເຊຍໂຈມຕີໂຄງສ້າງດ້ານພະລັງງານຢ່າງໜັກ

ທາງການອູແກຣນສົ່ງອອກໄຟຟ້າໄດ້ເປັນຄັ້ງທໍາອິດໃນຮອບ 6 ເດືອນ ຫລັງຈາກຖືກກອງທັບຣັດເຊຍໂຈມຕີໂຄງລ່າງພື້ນຖານດ້ານພະລັງງານຢ່າງໜັກນັບແຕ່ເດືອນຕຸລາ 2022 ເຮັດໃຫ້ຊາວອູແກຣນຕ້ອງຜະເຊີນວິກິດດ້ານພະລັງງານຄັ້ງໃຫຍ່ໃນຊ່ວງລະດູໜາວຜ່ານມາ.

ໂດຍທ່ານ ເຮີມັນ ຮາລຸເຊນໂກ ລັດຖະມົນຕີກະຊວງພະລັງງານຂອງອູແກຣນ ເປີດເຜີຍວ່າ: ລະບົບກໍາລັງການຜະລິດໄຟຟ້າໄດ້ກັບເຂົ້າສູ່ສະພາບປົກກະຕິມາເກືອບ 2 ເດືອນແລ້ວ ເຊິ່ງປັດຈຸບັນຊາວອູແກຣນບໍ່ໄດ້ຜະເຊີນຂໍ້ຈໍາກັດໃດໆດ້ານພະລັງງານອີກຕໍ່ໄປ ໂດຍສະເພາະພະລັງງານໄຟຟ້າ.

ເຖິງຢ່າງໃດກໍຕາມ, Ukrenergo ຜູ້ຜະລິດ ແລະ ໃຫ້ບໍລິການດ້ານພະລັງງານລາຍໃຫຍ່ຂອງອູແກຣນ ປະກາດເຕືອນວ່າ: ອູແກຣນບໍ່ສາມາດໄວ້ວາງໃຈບັນຫານີ້ໄດ້ ເນື່ອງຈາກກອງທັບຣັດເຊຍອາດໂຈມຕີໂຄງລ່າງພື້ນຖານດ້ານພະລັງງານຂອງອູແກຣນອີກໃນອະນາຄົດ. ຂະນະທີ່ໂຮງໄຟຟ້ານິວເຄຼຍຊາປໍຣິເຊຍຂອງອູແກຣນຍັງຕົກຢູ່ພາຍໃຕ້ການຄວບຄຸມຂອງກອງທັບຣັດເຊຍ.

ໂດຍກາງປີ 2022 ທາງການອູແກຣນເຄີຍຕັ້ງເປົ້າຈະສ້າງລາຍໄດ້ 1,5 ພັນລ້ານເອີໂຣ ຈາກການສົ່ງການສົ່ງອອກໄຟຟ້າໄປສະຫະພາບເອີຣົບ ເຊິ່ງເປັນຕະຫລາດສົ່ງອອກຫລັກດ້ານພະລັງງານ ນັບແຕ່ສົງຄາມຣັດເຊຍ-ອູແກຣນເລີ່ມຂຶ້ນ, ແຕ່ບໍ່ບັນລຸເປົ້າ ເນື່ອງຈາກໂຄງສ້າງດ້ານພະລັງງານໄດ້ຮັບຄວາມເສຍຫາຍຢ່າງໜັກຈົນຕ້ອງອາໄສການຊ່ວຍເຫລືອຈາກຕ່າງປະເທດ.

ອ້າງອີງ:

https://www.bbc.com/news/world-europe-65220003

https://ubn.news/ukraine-will-start-exporting…/

https://www.reuters.com/…/ukraine-able-resume…/