ເລສເຕີ ຊິຕີ ບັນລຸຂໍ້ຕົກລົງກັບ ເຈສຊີ ມາສ ຄຸມທີມໄລຍະຍາວ

ເລສເຕີ ຊິຕີ ກຽມໄດ້ຜູ້ຈັດການທີມມາກູ້ວິກິດໜີຕົກຊັ້ນທ້າຍລະດູການ ໂດຍມີຂ່າວສາມາດບັນລຸຂໍ້ຕົກລົງກັບ ເຈສຊີ ມາສ ດ້ວຍສັນຍາໄລຍະຍາວຮຽບຮ້ອຍແລ້ວ.

ສຳນັກຂ່າວເທເລກຣາຟ ລາຍງານວ່າ ເລສເຕີ ຊິຕີ ແຫ່ງພຣີເມຍລີກ ອັງກິດ ສາມາດບັນລຸຂໍ້ຕົກລົງໄລຍະຍາວກັບ ເຈສຊີ ມາສ ຜູ້ຈັດການທີມຊາວອາເມລິກາ ໃຫ້ມາຮັບຕຳແໜ໋ງຜູ້ຈັດການທີມຄົນໃຫມ່.

ເວລານີ້ ເລສເຕີ ພວມປະເຊີນສະຖານະການວິກິດ ລົງເຕະເກມພຣີເມຍລີກໄປແລ້ວ 30 ນັດ ເກັບໄປພຽງ 25 ຄະແນນ ຢູ່ອັນດັບ 19 ເຊິ່ງເປັນຮອງທ້າຍຕາຕະລາງ ແລະ ມີໂອກາດຕົກຊັ້ນສູງ ກ່ອນໜ້ານີ້ທີມຫາກໍປົດ ເບຣນດອນ ຣ໊ອດເຈີ ພົ້ນຕຳແໜ່ງຜູ້ຈັດການທີມໄປແລ້ວ.

ຂະນະທີ່ ມາສ ຫວ່າງວຽກຢູ່ ຫລັງຖືກ ລີດ ຢູໄນເຕັດ ທີມພຣີເຍລີກອີກທີມ ສັ່ງປົດເມື່ອເດືອນກຸມພາທີ່ຜ່ານມາ ໂດຍກ່ອນໜ້ານີ້ລາວກໍເຄຍຄຸມທີມດັງໃນຢູໂຣບແລ້ວເຊ່ັນ ເຣດບູລ ຊັລບວກ ທີມໃນອອສເຕຣຍ ແລະ ໄລຊິກ ໃນເຢຍລະມັນ.

ລາຍງານລະບຸວ່າ ເລສເຕີ ທີ່ພວມດຳເນີນການເຈລະຈາກັບຜູ້ຈັດການທີມຄົນອື່ນໆ ທີ່ສະໂມສອນສົນໃຈຢູ່ຮູ້ສຶກມັກແຜນງານຂອງ ມາສ ທີ່ສຸດ ໂດຍຜູ້ບໍລິຫານ ເລສເຕີ ຈະໃຫ້ສັນຍາ ມາສ ຄຸມທີມຈົນຈົບລະດູການນີ້ ບວກກັບໃຫ້ເຮັດວຽກຄຸມທີມຕໍ່ໄປອີກ 3 ປີ.