ທ່ານສີຈິ້ນຜິງ ຮ່ວມກັບ ປະທານາທິບໍດີຝຣັ່ງ ແລະ ປະທານຄະນະກຳມາທິການສະຫະພາບເອີຣົບ ພົບປະ 3 ຝ່າຍ

ທ່ານສີຈິ້ນຜິງ ຊີ້ອອກວ່າ: ປີນີ້ແມ່ນຈີນແລະສະຫະພາບເອີຣົບສ້າງສາຍພົວພັນ ຄູ່ຮ່ວມຍຸດທະສາດຮອບດ້ານຄົບຮອບ 20 ປີ. ຝ່າຍຈີນຍິນດີຮ່ວມກັບຝ່າຍສະຫະ ພາບເອີຣົບ, ກຳທິດທາງໃຫຍ່ແລະຫຼັກການພື້ນຖານລວມແຫ່ງການພັດທະນາ ສາຍພົວພັນຈີນ-ສະຫະພາບເອີຣົບໃຫ້ດີ,ຟື້ນຟູການແລກປ່ຽນໃນລະດັບຕ່າງໆຢ່າງຮອບດ້ານ,ກະຕຸ້ນການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດໃນຂົງເຂດຕ່າງໆ,ເຕີມພະລັງຂັບເຄື່ອນໃໝ່ເຂົ້າໃນການພັດທະນາສາຍພົວພັນຈີນ-ສະຫະພາບເອີຣົບແລະສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງໂລກ.

ທ່ານສີຈິ້ນຜິງກ່າວເນັ້ນວ່າ: ຄວາມທັນສະໄໝແບບຈີນແລະການເຊື່ອມໂຍງເຂົ້າເປັນອັນໜຶ່ງອັນດຽວກັນຂອງເອີຣົບແມ່ນທາງເລືອກຍຸດທະສາດຂອງສອງຝ່າຍທີ່ຕ່າງເລັງໃສ່ອະນາຄົດ,ສອງຝ່າຍຕ້ອງເປັນຄູ່ຮ່ວມມືທີ່ໄວ້ໃຈໄດ້ແລະໜ້າ ເຊື່ອຖືບົນເສັ້ນທາງພັດທະນາຂອງໃຜລາວ. ຈີນ-ສະຫະພາບເອີຣົບຕ້ອງຮັກສາການເປີດປະຕູແບບສອງຕໍ່ສອງ, ສະໜອງສະພາບແວດລ້ອມການດຳເນີນທຸລະກິດທີ່ຍຸຕິທຳແລະບໍ່ມີການຈຳແນກໃຫ້ກັບວິສາຫະກິດຂອງສອງຝ່າຍ,ຫຼີກລ່ຽງການຫັນບັນຫາເສດຖະກິດການຄ້າເປັນບັນຫາການເມືອງແລະບັນຫາຄວາມໝັ້ນຄົງ. ສອງຝ່າຍຄວນສ້າງຕ່ອງໂສ້ທີ່ໝັ້ນທ່ຽງ ແລະ ໄວ້ເນື້ອເຊື່ອໃຈກັນ, ເຊື່ອມໂຍງຂໍ້ລິເລີ່ມໜຶ່ງແລວໜຶ່ງເສັ້ນທາງກັບຍຸດທະສາດປະຕູສູ່ທົ່ວໂລກຂອງສະຫະພາບເອີຣົບ,ເພື່ອຊ່ວຍເຮັດໃຫ້ເສດຖະກິດຂອງສອງຝ່າຍມີການເຕີບໂຕຢ່າງໝັ້ນທ່ຽງຍາວນານ.

ທ່ານນາງວອນ ເດີເລເຢນກ່າວວ່າ: ຝ່າຍສະຫະພາບເອີຣົບຍິນດີຮ່ວມກັບ ຝ່າຍຈີນຟື້ນຟູການສົນທະນາລະດັບສູງດ້ານເສດຖະກິດການຄ້າສະຫະພາບເອີ ຣົບ-ຈີນ, ຊຸກຍູ້ໃຫ້ການພົວພັນດ້ານເສດຖະກິດການຄ້າສະຫະພາບເອີຣົບ-ຈີນພັດທະນາໄປຢ່າງໝັ້ນທ່ຽງແລະດຸນດ່ຽງ, ບັນລຸໃຫ້ຕ່າງຝ່າຍຕ່າງໄດ້ຮັບຜົນປະໂຫຍດ.ຫວັງເພີ່ມທະວີການແລກປ່ຽນຄວາມເຫັນແລະການປະສານງານກັບຝ່າຍຈີນ, ຮ່ວມມືກັນເພື່ອຮັບມືກັບສິ່ງທ້າທາຍທົ່ວໂລກ, ເສີມຂະຫຍາຍບົດບາດເທົ່າທີ່ຄວນເຂົ້າໃນການຊຸກຍູ້ສັນຕິພາບ, ສະຖຽນລະພາບແລະການພັດທະນາຂອງໂລກ.

ທ່ານເອັມມານູເອວ ມາຄຣົງກ່າວວ່າ: ໂລກໃນປັດຈຸບັນແມ່ນເຕັມໄປດ້ວຍ ຄວາມບໍ່ແນ່ນອນ, ຕ້ອງການໃຫ້ສະຫະພາບເອີຣົບ-ຈີນທັງສອງຝ່າຍເພີ່ມທະວີ ການສົນທະນາແລະແລກປ່ຽນກັນດ້ວຍທ່າທີຕ່າງຝ່າຍຕ່າງເຄົາລົບເຊິ່ງກັນແລະກັນແລະຈິງໃຈອ່ອນນ້ອມຖ່ອມຕົນ. ສອງຝ່າຍຄວນຮ່ວມກັນພະຍາຍາມ, ບໍ່ຕົກຢູ່ໃນກັບດັກ “ຕັດຂາດການພົວພັນກັນ”, ດຳເນີນການຮ່ວມມືຢ່າງສະເໝີພາບ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ,ຮ່ວມກັນຮັບມືກັບການປ່ຽນແປງຂອງດິນຟ້າອາກາດ ແລະ ສິ່ງທ້າທາຍທົ່ວໂລກທີ່ຮີບດ່ວນອື່ນໆ， ລົງເລິກສາຍພົວພັນຄູ່ຮ່ວມຍຸດທະສາດຮອບດ້ານສະຫະພາບເອີຣົບ-ຈີນຢ່າງບໍ່ຢຸດຢັ້ງ.