ຂໍ້ມູນ iPhone ຮຸ່ນໃຫມ່ຮົ່ວກ່ອນເຖິງງານເປີດໂຕ ວັນທີ 12 ກັນຍານີ້
ແອັບເປີນຜະເຊີນວິກິດຂໍ້ມູນຮົ່ວໄຫຼຄັ້ງໃຫຍ່ອີກຄັ້ງ ເມື່ອສື່ມວນຊົນດ້ານໄອທີບາງສໍານັກໄດ້ຮັບຂໍ້ມູນຈາກບຸກຄົນລຶກລັບ ເຊິ່ງຊີ້ທາງໃຫ້ເຂົ້າເຖິງລາຍລະອຽດຂອງຜະລິດຕະພັນຮຸ່ນໃຫມ່ ທັ້ງໄອໂຟນເອັກ, ແອັບເປິລວອທຊ໌ ແລະ ຊຸດແຮນດ໌ເຊັດໃຫມ່ຂອງ iPhone 8 ທີ່ກໍາລັງຈະມີການເປີດໂຕໃນວັນທີ 12 ກັນຍານີ້.
ຂໍ້ມູນທີ່ຮົ່ວໄຫຼອອກມາຄັ້ງນີ້ ຍັງລວມເຖິງລາຍລະອຽດຂອງເຕັກໂນໂລຊີຈົດຈໍາໃບໜ້າ ຫຼື ເຟຊໄອດີ (Face-ID) ທີ່ຈະໃຊ້ເປັນທັງຂໍ້ມູນບົ່ງບອກເອກະລັກບຸກຄົນຂອງຜູ້ໃຊ້ iPhone ເພື່ອປົດລັອກເຄື່ອງ, ຊື້ສິນຄ້າໃນໄອສໂຕຣ໌ ແລະ ໃຊ້ສ້າງ ແອມິໂມຈິ (Animoji) ເຊິ່ງເປັນຕົວອີໂມຈີທີ່ສ້າງຈາກການສະແດງອອກທາງສີໜ້າຂອງຜູ້ໃຊ້ໂດຍກົງ.
ມີການຕັ້ງຂໍ້ສົງໄສວ່າ: ຂໍ້ມູນມີທີ່ຮົ່ວໄຫຼຄັ້ງນີ້ບໍ່ໄດ້ເກີດຈາກຄວາມຜິດພາດທາງເຕັກນິກ, ແຕ່ອາດເປັນຝີມືຂອງພະນັກງານພາຍໃນບໍລິສັດແອັບເປິນເອງກໍເປັນໄດ້ ໂດຍມີການເປີດເຜີຍລາຍຊື່ຂອງເວັບແອດເຄຣສ ທີ່ບັນຈຸຂໍ້ມູນເຫຼົ່ານີ້ ເຊິ່ງເກັບເຊື່ອງໄວ້ຢ່າງດີຕໍ່ບຸກຄົນພາຍນອກ, ສ່ວນສື່ມວນຊົນທີ່ໄດ້ຮັບການຊີ້ທາງໃຫ້ເຂົ້າເຖິງຂໍ້ມູນຕ່າງໆກໍບໍ່ຍອມເປີດເຜີຍແຫຼ່ງຂ່າວຜູ້ເຜີຍຄວາມລັບນີ້.
ກ່ອນໜ້ານີ້ ແອັບເປິນ ເຄີຍຜະເຊີນກັບເຫດຂໍ້ມູນຮົ່ວໄຫຼມາຫຼາຍຄັ້ງ ຈົນປະທານເຈົ້າໜ້າທີ່ບໍລິຫານກ່າວວ່າ: ຈະຕ້ອງເພີ່ມມາດຕະການຮັກສາຄວາມລັບທາງເຕັກໂນໂລຊີໃຫ້ເຂັ້ມງວດຂຶ້ນເປັນສອງເທົ່າ ໂດຍບໍ່ດົນມານີ້ ມີລາຍງານວ່າ: ແອັບເປິນໄດ້ຈ້າງອະດີດເຈົ້າໜ້າທີ່ຂອງສໍານັັກງານຄວາມໝັ້ນຄົງແຫ່ງຊາດສະຫະລັດອາເມລິກາ (NSA) ລວມທັງອະດີດເຈົ້າໜ້າທີ່ FBI ແລະ ໜ່ວຍຂ່າວລັບອື່ນໆ ເພື່ອໃຫ້ສືບຫາບຸກຄົນທີ່ປ່ອຍຄວາມລັບໃນອົງການໃຫ້ໄດ້.
ເຖິງວ່າຄວາມລັບຂອງແອັບເປິນທີ່ຮົ່ວໄຫຼອອກມາອາດເຮັດໃຫ້ການເປີດໂຕຜະລິດຕະພັນໃຫມ່ໃນວັນທີ 12 ກັນຍານີ້ ບໍ່ມີຄວາມຕື່ນເຕັ້ນແບບທີ່ຈະເປັນ, ແຕ່ຜູ້ຊ່ຽວຊານເບິ່ງວ່າທຸກເຫດການດັ່ງກ່າວຈະບໍ່ກະທົບຕໍ່ຍອດຂາຍຂອງ iPhone ແລະ ຜະລິດຕະພັນອື່ນໆທີ່ຕະຫຼາດຍັງຄົງມີຄວາມຕ້ອງການສູງຢ່າງແນ່ນອນ.
