ເຮືອອູ່ສ້ອມແປງສັກສິດ ຮຸ່ງເຮືອງຊັບ ຄອງແຊ໋ມຊ່ວງເຮືອ ປະຈຳປີ 2023 ທີ່ເມືອງຈອມເພັດ

ສີພາຍເຮືອອູ່ສ້ອມແປງສັກສິດ ຮຸ່ງເຮືອງຊັບ ຮ່ວມແຮງຮ່ວມໃຈກັນຈ້າວບຶດຈ້ຳບຶດ ເຂົ້າເສັ້ນໄຊເປັນອັນດັບທີ 1 ຄວ້າແຊ໋ມການແຂ່ງຂັນຊ່ວງເຮືອ ປະຈຳປີ 2023 ທີ່ເມືອງຈອມເພັດ ແຂວງຫຼວງພະບາງ ໄປຄອງ ພ້ອມຮັບຂັນເງິນ ນຳ້ໜັກ 1 ກິໂລກຣາມ ແລະ ເງິນສົດ 4.000.000 ກີບ. ຂະນະທີ່ອັນດັບທີ 2 ຕົກເປັນຂອງ ເຮືອຕົ້ນກ້າສັງລວຍ ໄດ້ຂັນເງິນ 1 ໜ່ວຍ ນໍ້າໝັກ 0,8 ກິໂລກຣາມ ພ້ອມ ເງິນສົດ 3.000.000 ກີບ.

ການແຂ່ງຂັນຊ່ວງເຮືອໃນຄັ້ງນີ້ ໄດ້ມີຂຶ້ນໃນວັນທີ 4 ເມສາ 2023 ທີ່ທ່ານ້ຳຫ້ວຍຈ່ານ ບ້ານໂພລາດ ເມືອງຈອມເພັດ ແຂວງຫຼວງພະບາງ, ໂດຍການເປັນປະທານຂອງ ທ່ານ ສາຍສະໝອນ ສາຍລິວົງ ເຈົ້າເມືອງຈອມເພັດ, ໃຫ້ກຽດເຂົ້າຮ່ວມຊົມຂອງ ທ່ານ ວົງສະຫວັນ ເທບພະຈັນ ປະທານສະພາປະຊາຊົນແຂວງຫຼວງພະບາງ ພ້ອມດ້ວຍການນຳຂອງແຂວງ,ເມືອງອ້ອມຂ້າງ, ແຂກຖືກເຊີນ ແລະ ມວນຊົນທັງພາຍໃນ ແລະ ຕ່າງເມືອງຢ່າງຫຼວງຫຼາຍ.

ໂອກາດນີ້, ທ່ານ ສາຍສະໝອນ ສາລິວົງ ກ່າວເປີດພິທີວ່າ: ການຈັດບຸນຊ່ວງເຮືອ ປະຈຳປີ 2023 ຢູ່ເມືອງຈອມເພັດ ໄດ້ຈັດຂຶ້ນເປັນປີທີສອງຂອງຊາວບ້ານໂພລາດ ຊຶ່ງເປັນບຸນຫໍ່ເຂົ້າຕົ້ມດອກຊໍ້ຂອງໄທລື້ທີ່ບ້ານໂພລາດ, ສະເພາະປີນີ້ ອົງການປົກຄອງເມືອງຈອມເພັດ ໄດ້ກະກຽມຄວາມພ້ອມຫຼາຍດ້ານ ທັງໄດ້ປຸກລະດົມເຮືອຊ່ວງຈາກບັນດາບ້ານພາຍໃນເມືອງ, ຕ່າງເມືອງ ແລະ ຫົວໜ່ວຍທຸລະກິດຢູ່ໃນແຂວງຫຼວງພະບາງ ເຂົ້າຮ່ວມແຂ່ງຂັນ ເພື່ອໃຫ້ງານບຸນໃນປີນີ້ ມີຄວາມເບີກບານມ່ວນຊື່ນ.

ສຳລັບການແຂ່ງຂັນຊ່ວງເຮືອໃນປີນີ້ ມີເຮືອເຂົ້າຮ່ວມຊີງໄຊທັງໝົດ 14 ລໍາ ແລະ ບັນຈຸສີພາຍບໍ່ເກີນ 12-15 ຄົນ, ເປັນປະເພດເຮືອກາບ. ຜ່ານການແຂ່ງຂັນປະກົດວ່າ: ຊະນະເລີດ ເຮືອອູ່ສ້ອມແປງສັກສິດ ຮຸ່ງເຮືອງຊັບ(1) ໄດ້ຮັບ ຂັນເງິນ 1 ໜ່ວຍ ນໍ້າໜັກ 1 ກິໂລກຣາມ ພ້ອມເງິນສົດ 4.000.000 ກີບ, ອັນດັບທີ 2 ເຮືອຕົ້ນກ້າສັງລວຍ ໄດ້ຂັນເງິນ 1 ໜ່ວຍ ນໍ້າໜັກ 0,8 ກິໂລກຣາມ ພ້ອມເງິນສົດ 3.000.000ກີບ, ອັນດັບທີ 3 ເຮືອເພັດລົດຈົກ ບ້ານຫາດຫ່ຽນ ໄດ້ຮັບຂັນເງິນ 1 ໜ່ວຍ ນໍ້າໜັກ 0,5 ກິໂລກຣາມ ພ້ອມເງິນສົດ 2.500.000 ກີບ, ອັນດັບທີ 4 ເຮືອຮ້ານຂາຍລົດ ບ້ານດອນແຊ໋ມ ໄດ້ຮັບເງິນສົດ 2.500.000 ກີບ, ອັນດັບທີ 5 ເຮືອບໍລິສັດພັດທະນາກະສິກຳ ໄດ້ຮັບເງິນສົດ 2.000.000 ກີບ, ອັນດັບທີ 6 ເຮືອອາດເຮືອບັກນາວາສາຍຮຸ່ງ ໄດ້ຮັບເງິນສົດ 1.900.000 ກີບ, ອັນດັບທີ 7 ເຮືອບ້ານຈ່ານໃຕ້ ໄດ້ຮັບເງິນສົດ 1.800.000 ກີບ, ອັນດັບທີ 8 ເຮືອບ້ານໂພລາດສວນອາຍອຸ່ນບໍລິສັດໜຶ່ງການຄ້າ ໄດ້ຮັບເງິນສົດ 1.700.000 ກີບ, ອັນດັບທີ 9 ເຮືອບ້ານຈອມງົວ ຮ້ານຂາຍໄມ້ເຄວີ (Kv) ເດີ່ນຮົ່ມ ໄດ້ຮັບເງິນສົດ 1.600.000 ກີບ ແລະ ລາງວັນຊົມເຊີຍ ໄດ້ຮັບເງິນສົດ ລໍາລະ 1.500.000ກີບ.

ການຈັດການບຸນຊ່ວງເຮືອຄັ້ງນີ້ ເພື່ອເປັນການອະນຸລັກ ປົກປັກຮັກສາ ພ້ອມທັງເສີມຂະຫຍາຍມູນເຊື້ອວັດທະນະທຳຂອງເຜົ່າລື້ ໂດສະເພາະກໍແມ່ນອາຫານພື້ນເມືອງຂອງເຜົ່າລື້ ໃຫ້ຕິດພັນກັບການທ່ອງທ່ຽວຂອງເມືອງ, ເປັນການສ້າງຄວາມສາມັກຕີຂອງປະຊາຊົນບັນດາເຜົ່າຢູ່ເມືອງຈອມເພັດໃຫ້ຍືນຍົງຕະຫຼອດໄປ.

ພາບ-ຂ່າວ:ໜັງສືພິມສຶກສາ-ກິລາລາຍວັນ