1 ປີຜ່ານມາ ກະຊວງອຸດສາຫະກໍາ ແລະ ການຄ້າ ກວດກາສິນຄ້ານອກລະບົບ ຄິດເປັນມູນຄ່າລວມຫລາຍກວ່າ 4 ຕື້ກີບ

ວັນທີ 5 ເມສາ 2023, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມສະຫລຸບ-ຖອດຖອນບົດຮຽນການຈັດຕັ້ງປະຕິບັດວຽກງານກວດກາການຄ້າ ໃນໄລຍະ ປີ 2022 ຜ່ານມາ ແລະ ທິດທາງແຜນການ  ປີ 2023, ໂດຍການເປັນປະທານຂອງທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ (ອຄ),  ມີທ່ານ ບຸນເຖິງ ດວງສະຫວັນ ຮອງລັດຖະມົນຕີ, ຜູ້ຊີ້ນໍາກົມການຄ້າພາຍໃນ ພ້ອມພາກສ່ວນກ່ຽວຂ້ອງເຂົ້າຮ່ວມ.

ໃນໄລຍະ 1 ປີ ຜ່ານມາໃນທົ່ວປະເທດ ລວມທັງສູນກາງສາມາດກວດກາໄດ້ການລະເມີດລະບຽບການຄຸ້ມຄອງການຄ້າ, ການຄ້າສິນຄ້ານອກລະບົບ ແລະ ການດຳເນີນທຸລະກິດທີ່ບໍ່ມີທະບຽນວິສາຫະກິດໄດ້ທັງໝົດ 859  ກໍລະນີ, ໃນນັ້ນແກ້ໄຂແລ້ວ 855 ກໍລະນີ, ຍັງຄ້າງ 4 ກໍລະນີ, ຄິດເປັນມູນຄ່າລວມທັງໝົດຫລາຍກວ່າ 4 ຕື້ກີບ, ໄດ້ຢຶດ ແລະ ນຳສິນຄ້າໝົດອາຍຸ, ລອກຮຽນແບບ, ບໍ່ມີຄຸນນະພາບ, ຢາສູບເຖື່ອນ ໄປທໍາລາຍຖິ້ມມີມູນຄ່າ 3,9 ຕື້ກວ່າກີບ, ພ້ອມທັງປັບໃໝຜູ້ລະເມີດຕາມກົດໝາຍ ແລະ ລະບຽບການ.

ນອກນັ້ນ, ຍັງໄດ້ສືບຕໍ່ປະສານສົມທົບກັບ ຂະແໜງການທີ່ກ່ຽວຂ້ອງ ເພື່ອສະກັດກັ້ນການຄ້າຂາຍນອກລະບົບ ຊຶ່ງສາມາດກັກ, ຢຶດ ບາງປະເພດສິນຄ້າອຸປະໂພກ ແລະ ບໍລິໂພກ ໄດ້ຈຳນວນໜຶ່ງ ເປັນຕົ້ນແມ່ນສິນຄ້າປະເພດບໍລິໂພກທີ່ໝົດອາຍຸ, ສິນຄ້າອຸປະໂພກທີ່ເຊື່ອມຄຸນນະພາບໝົດອາຍຸການນຳໃຊ້ ແລະ ສິນຄ້າປອມແປງໄດ້ຫລາຍລາຍການ ຊຶ່ງທັງໝົດນັ້ນແມ່ນໄດ້ໃຊ້ມາດຕະການຕໍ່ຜູ້ລະເມີດຕາມລະບຽບ ແລະ ກົດໝາຍ.

ໂອກາດນີ້, ທ່ານ ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ ໂອ້ລົມ ແລະ ໃຫ້ທິດຊີ້ນຳໂດຍເນັ້ນບາງບັນຫາ ເຊັ່ນ:

1). ໃຫ້ອົງການປະຕິບັດວຽກງານກວດກາການຄ້າ ທັງສູນກາງ ແລະ ທ້ອງຖິ່ນ ເອົາໃຈໃສ່ໃນການຕິດຕາມກວດກາຕ້ານ, ສະກັດກັ້ນ ການຄ້າສິນຄ້ານອກລະບົບ, ການຄ້າສິນຄ້າປອມແປງ, ສິນຄ້າຮຽນແບບ, ສິນຄ້າເສື່ອມຄຸນ, ເສຍຄຸນ, ການດຳເນີນທຸລະກິດທີ່ບໍ່ມີອະນຸຍາດ ຫລື ບໍ່ຖືກກັບວັດຖຸປະສົງ ຕາມພາລະບົດບາດຂອງຕົນຢ່າງເຂັ້ມງວດ;

2). ໃຫ້ເອົາໃຈໃສ່ຈັດຕັ້ງປະຕິບັດວຽກງານກວດກາການຄ້າຕາມສິດ ແລະ ໜ້າທີ່ຂອງຕົນທີ່ໄດ້ກຳນົດໄວ້ໃນ ມາດຕາ 24, 25 ຂອງດຳລັດວ່າດ້ວຍກາກວດກາການຄ້າ ສະບັບເລກທີ 508/ລບ, ລົງວັນທີ 4 ທັນວາ 2021 ແລະ ມາດຕາ 5, 6 ,7 ແລະ ມາດຕາ 13, 15 ຂອງຂໍ້ຕົກລົງ ວ່າດ້ວຍການປະຕິບັດວຽກງານກວດກາການຄ້າ ເລກທີ 1499/ອຄ.ກຄພນ, ລົງວັນທີ 08 ກັນຍາ 2017;

3). ໃຫ້ເອົາໃຈໃສ່ຂອດປະສານກັບຂະແໜງການທີ່ກ່ຽວຂ້ອງໃຫ້ມີຄວາມກົມກຽວ ແລະ ມີຄວາມເປັນເອກະພາບສູງໃນການຮ່ວມມືກັນໃນການຈັດຕັ້ງປະຕິບັດໃຫ້ໄດ້ຮັບປະສິດທິພາບສູງ;

4). ໃຫ້ໝູນໃຊ້ປະສົບການ ແລະ ບົດຮຽນຕົວຈິງ ເພື່ອປັບປຸງເຂົ້າກັບສະພາບຕົວຈິງຂອງບ້ານເຮົາຢ່າງມີຫົວຄິດປະດິດສ້າງ ແລະ ແທດເໜາະເປົ້າໝາຍກໍເພື່ອເຮັດໃຫ້ວຽກງານກວດກາການຄ້າ ແລະ ປົກປ້ອງຜູ້ຊົມໃຊ້ໃຫ້ມີຄວາມກ້າວໜ້າຂຶ້ນໄປເລື້ອຍໆ ທັງເປັນການປະກອບສ່ວນຢ່າງຕັ້ງໜ້າເຂົ້າໃນການເຄື່ອນໄຫວຕ້ານ ແລະ ສະກັດກັ້ນການລະເມີດລະບຽບກົດໝາຍທາງດ້ານການຄ້າ, ການຄ້າສິນຄ້ານອກລະບົບ, ເພື່ອຊ່ວຍໜູນ ຫັນໃຫ້ຜູ້ດຳເນີນທຸລະກິດຫັນເຂົ້າສູ່ກົດໝາຍ ແລະ ລະບຽບການ.

ຂໍ້ມູນ: ກະຊວງ ອຄ