Sabaidee fest 2023 ສັນຍະລັກງານສື່ສໍາພັນສາຍເລືອດເຊື້ອຊາດລາວ
ໂດຍ: ທິດກໍ່າ
ນັບວ່າເປັນໂອກາດດີ ແລະ ກໍໜ້າຍົກຍ້ອງຊົມເຊີຍຕໍ່ຄະນະຮັບຜິດຊອບຈັດງານອັນຍິ່ງໃຫຍ່ທີ່ມີຫົວຂໍ້ວ່າ: “Sabaidee fest 2023” ທີ່ໄດ້ຈັດຂຶ້ນຢູ່ລັດແຄລິຟໍເນຍ ສະຫະລັດອາເມລິກາ. ແນ່ນອນວ່າໃນຄັ້ງທີ່ຜ່ານໆມານັ້ນ ອາດມີການຈັດງານນີ້ມາແລ້ວ ແຕ່ຜູ້ຂຽນຂໍຍົກເອົາສະເພາະໃນປີ 2023 ມາວິເຄາະເຈາະເລິກພໍຫອມປາກຫອມຄໍ ແລະ ຫອມໃຈດ້ວຍຄວາມປາຖະໜາດີ.
ງານ Sabaidee fest 2023 ເຊິ່ງໄດ້ຈັດຂຶ້ນໃນວັນທີ 18-19 ມີນາ 2023 ຖືວ່າເປັນງານທີ່ຍິ່ງໃຫຍ່ອະລັງການ ທັງປະສານຕາປະສານໃຈ ອັນເປັນນິມິດໝາຍທີ່ດີ ເພາະມັນເປັນງານພົບປະການສະແດງສີ, ສຽງ ແລະ ດົນຕີຂອງຫລາຍປະເທດໃນອາຊີຕາເວັນອອກສຽງໃຕ້ໄປໄດ້ລວມຕົວກັນເຜີຍແຜ່ວັດທະນະທໍາ ໂດຍສະເພາະແມ່ນສຽງເພງ ແລະ ສຽງດົນຕຣີທີ່ມີເອກະລັກຂອງບັນດາປະຊາຊາດໃນອາຊີຕາເວັນອອກສຽງໃຕ້ (Southeast Asian Music Festival Ever in USA March 18-19 2023) ອັນເປັນການເຊື່ອມໂຍງດົນຕຣີ ແລະ ສິລະປະໃຫ້ຫຍັບເຂົ້າໃກ້ກັນຫລາຍຂຶ້ນ.
ສໍານັກສິລະປິນລາວທີ່ໄດ້ໄປຮ່ວມໃນງານຄັ້ງນີ້ກໍມີມາກໜ້າຫລາຍຕາທີ່ເຄີຍໂດ່ງດັງສ້າງຊື່ສຽງໃນວົງການເພງລາວ ທັງມີຜົນງານຢ່າງໂດດເດັ່ນມາແລ້ວຫລາຍປີ ເປັນຕົ້ນທີມງານລູກເຂີຍໃສ່ມອງ, ໂສພະນາ, ບິກໃຫຍ່, ຖິ່ນລໍາພອນ, ຊາມີໂອພີ, ນັດດາວ, ທອນບັນດິດ ແລະ ຜູ້ອື່ນໆຈໍານວນ 9 ຄົນ. ພິເສດຈາກຜົນງານເພງທີ່ພວມໂດ່ງດັງ ທັງໄດ້ຮັບຄວາມນິຍົມຊົມຊອບຈາກແຟນເພງໜຸ່ມໆສາວໆໃນປັດຈຸບັນກໍຄືເພງ All Day All Nigt ຂອງຖິ່ນລໍາພອນ ແລະ ຊາມີໂອພີ.
ໃນຖານະທິດກໍ່າເປັນຄົນລາວຢູ່ທີ່ ສປປ ລາວ ໄດ້ຕິດຕາມຜົນງານການເຄື່ອນໄຫວສະແດງຂອງຮຸ່ນ ລູກຫລານ ເຫັນວ່າໄດ້ສ້າງຊື່ສຽງບົດບາດໃຫ້ແກ່ປະເທດຊາດບ້ານເມືອງເປັນຢ່າງດີ. ອັນທີ່ພິເສດສຸດການສະແດງຂອງທີມງານສິລະປິນລາວຄັ້ງນີ້ ແມ່ນສາມາດສື່ສານ, ສື່ສາຍສໍາພັນຄວາມຮັກຄວາມແພງລະຫວ່າງຄົນເຊື້ອຊາດລາວທີ່ຢູ່ໃນປະເທດສະຫະລັດອາເມລິກາ ໂດຍສະເພາະແມ່ນຢູ່ໃນລັດແຄລິຟໍເນຍ ເຊິ່ງໃນມື້ເປີດການສະແດງໄດ້ມີຄົນເຂົ້າຊົມເຖິງ 5 ພັນກວ່າຄົນ. ນອກຈາກນັ້ນ ໃນລັດອື່ນໆທີ່ໄດ້ໄປເຄື່ອນໄຫວສະແດງກໍໄດ້ຮັບການຕ້ອນຮັບຈາກພີ່ນ້ອງຄົນເຊື້ອຊາດລາວທີ່ຢູ່ສະຫະລັດອາເມລິກາຢ່າງມາກໜ້າຫລາຍຕາ ແລະ ເປັນກັນເອງ. ນີ້ມັນກໍສະແດງໃຫ້ເຫັນເຖິງຄວາມຜູກພັນລະຫວ່າງເຊື້ອຊາດເຜົ່າພັນ, ນໍາເອົານໍ້າໃຈສາມັກຄີຮັກແພງ, ເບິ່ງແຍງ, ສະໜັບສະໜູນ, ຊ່ວຍເຫລືອເຊິ່ງກັນ ແລະ ກັນໃນຖານະພວກເຮົາມີເລືອດເນື້ອເຊື້ອໄຂອັນດຽວກັນ ຄືຊາດລາວຄົນລາວນັ້ນເອງ.
ໃນຄວາມເປັນຈິງແລ້ວ, ເມື່ອຫວນຄືນມູນເຊື້ອປະຫວັດສາດແຫ່ງຄວາມເປັນລາວ ບໍ່ວ່າຍຸກໃດສະໄໝໃດ, ຢູ່ໃສ, ປະເທດໃດຕ່າງກໍຍັງມີຄວາມຮັກຄວາມສາມັກຄີກັນ, ຍັງບໍ່ລືມມາຕຸພູມອັນເປັນຕົ້ນກໍາເນີດຂອງພໍ່ແມ່ປູ່ຍ່າຕານາຍເຮົາ. ພິເສດໃນຍຸກປັດຈຸບັນ ພັກ ແລະ ລັດຖະບານລາວເຮົາຍິ່ງຍຶດຖືນະໂຍບາຍຕໍ່ຄົນເຊື້ອຊາດລາວທີ່ໄປດໍາລົງຊີວິດຢູ່ຕ່າງປະເທດນັ້ນ, ຖືເປັນໜຶ່ງໃນວົງຄະນາຍາດແຫ່ງຊາດ, ຂໍໃຫ້ຄົນເຊື້ອຊາດລາວບໍ່ວ່າຢູ່ແຫ່ງຫົນຕໍາບົນໃດ ທຸກຊົນຊາດຊົນເຜົ່າໃນທົ່ວໂລກຈົ່ງສາມັກຄີຮັກແພງກັນ, ໄປຫາມາແວ່, ຢ້ຽມຢາມກັນ, ໄປພຸ້ນກິນປາມາພີ້ກິນເຂົ້າ ເຕົ້າໂຮມສາມັກຄີເໝືອນດັ່ງປັ້ນເຂົ້າໜຽວ ແລະ ປ່ຽງເຜິ້ງ, ເໝືອນດັ່ງລູກແຄນແດນຈໍາປາທີ່ບັນພະບູລຸດຂອງພວກເຮົາໄດ້ສ້າງໄວ້.
