ຂະແໜງ ອຄ ບັນລຸ ການຜະລິດອຸດສາຫະກຳ-ປຸງແຕ່ງ ໄດ້ 13.210 ຕື້ກີບ

ທ່ານ ມະໂນທອງ ວົງໄຊ ຮອງລັດຖະມົນຕີກະຊວງ ອຄ ໄດ້ລາຍງານວຽກງານອັນພົ້ນເດັ່ນ ຂອງຂະແໜງ ອຄ ຈັດຕັ້ງປະຕິບັດ ຕໍ່ກອງປະຊຸມປະຈຳປີ 2022 ຂອງຂະແໜງອຸດສາຫະກຳ ແລະ ການຄ້າ  ວັນທີ 6  ເມສາ 2023 ນີ້ວ່າ: ໄລຍະ 1 ປີຜ່ານມາ ຂະແໜງ ອຄ ສາມາດຈັດຕັ້ງປະຕິບັດວຽກງານດັ່ງກ່າວໃນ ຫຼາຍດ້ານ ໂດຍສະເພາະ ການຈັດຕັ້ງປະຕິບັດວຽກງານດ້ານການຜະລິດອຸດສາຫະກຳປຸງແຕ່ງ ແລະ ຫັດຖະກຳ ສາມາດບັນລຸໄດ້ 13.210 ຕື້ກີບ ເທົ່າກັບ 101,56% ຂອງແຜນການ ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 11,21% ມູນຄ່າການບໍລິການ ຈໍລະຈອນສິນຄ້າ (ຂາຍຍົກ-ຂາຍຍ່ອຍ ແລະ ຄ່າບໍລິການສ້ອມແປງ) ສາມາດບັນລຸໄດ້ 72.622 ຕື້ກີບ ເທົ່າກັບ 107% ຂອງແຜນການປີ ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 18,87% ມູນຄ່ານຳເຂົ້າ-ສົ່ງອອກບັນລຸໄດ້ 15.006 ລ້ານໂດລາສະຫະລັດ ທຽບໃສ່ປີຜ່ານມາເພີ່ມຂຶ້ນ 11% ແລະ ສາມາດບັນລຸໄດ້ 110 % ຂອງແຜນການປີ 2022 ໃນນີ້ ມູນຄ່າສົ່ງອອກ ປະຕິບັດໄດ້ 8.198 ລ້ານໂດລາສະຫະລັດ ເພີ່ມຂຶ້ນ 7,5% ແລະ ບັນລຸໄດ້ 107,87% ຂອງແຜນການປີ ມູນຄ່ານຳເຂົ້າ ປະຕິບັດໄດ້ 6.808 ລ້ານໂດລາສະຫະລັດ ເພີ່ມຂຶ້ນ 15,6% ເທົ່າກັບ112,53% ຂອງແຜນການປີ ຈາກຕົວເລກດັ່ງກ່າວເຫັນວ່າ ມູນຄ່າການຄ້າແມ່ນເກີນດຸນ 1.390 ລ້ານໂດລາສະຫະລັດ ໃນນີ້ຖ້າບໍ່ລວມຕົວເລກນຳເຂົ້າ ແລະ ສົ່ງອອກ ຂະແໜງໄຟຟ້າແມ່ນຍັງຂາດດຸນການຄ້າຢູ່ປະມານ 928 ລ້ານໂດລາສະຫະລັດ.

ສຳລັບການສູ້ຊົນວຽກງານຕົ້ນຕໍໃນປີ 2023 ຂອງຂະແໜງ ອຸດສາຫະກຳ ແລະ ການຄ້າ ເປັນຕົ້ນດ້ານອຸດສາຫະກຳປຸງແຕ່ງ ແລະ ຫັດຖະກຳ ຈະສືບຕໍ່ສູ້ຊົນສ້າງມູນຄ່າຜະລິດອຸດສາຫະກຳປຸງແຕ່ງ ແລະ ຫັດຖະກຳ ຄາດຄະເນໃຫ້ບັນລຸ 14.029,09 ຕື້ກີບ ດ້ານການຄ້າພາຍໃນ ສູ້ຊົນສ້າງມູນຄ່າຈໍລະຈອນສິນຄ້າ (ຂາຍົກ-ຂາຍ່ອຍ ແລະ ຄ່າບໍລິການສ້ອມແປງ) ຄາດຄະເນໃຫ້ບັນລຸ 73.541,08 ຕື້ກີບ ດ້ານການຄ້າຕ່າງປະເທດ ສູ້ຊົນສ້າງມູນຄ່າການນຳເຂົ້າ ແລະ ສົ່ງອອກ ຄາດຄະເນໃຫ້ບັນລຸ15.325 ລ້ານໂດລາສາຫະລັດ ໃນນີ້ ມູນຄ່າການສົ່ງອອກ 8.225 ລ້ານໂດລາສາຫະລັດ ແລະ ມູນຄ່ານຳເຂົ້າ 7.100 ລ້ານໂດລາສາຫະລັດ ແລະ ອື່ນໆ.