ເຈົ້າໜ້າທີ່ກວດກາການຄ້າ ແຂວງຈຳປາສັກ ເຄື່ອນໄຫວສ້າງບົດບັນທຶກກັບຮ້ານຄ້າຕ່າງໆ ເພື່ອບໍ່ໃຫ້ສວຍໂອກາດຂຶ້ນລາຄາສິນຄ້າໄລຍະບຸນປີໃໝ່ລາວ
ວັນທີ 5 ເມສາ 2023 ນີ້, ເຈົ້າໜ້າທີ່ກວດກາການຄ້າ ຂະແໜງການຄ້າພາຍໃນ ພະແນກອຸດສາຫະກໍາ ແລະ ການຄ້າ ແຂວງຈໍາປາສັກ, ນໍາໂດຍ ທ່ານ ໄກ່ທອງ ສຸວັນນາດີ ຮອງຫົວໜ້າຂະແໜງການຄ້າພາຍໃນ ສົມທົບກັບ ຫ້ອງການອຸດສາຫະກໍາ ແລະ ການຄ້ານະຄອນປາກເຊ, ເຈົ້າໜ້າທີ່ຈັດສັນ ແລະ ເຈົ້າໜ້າທີ່ກ່ຽວຂ້ອງ ເຄື່ອນໄຫວເກັບກໍາຕິດຕາມ ແລະ ສ້າງບົດບັນທຶກຕາມບັນດາບໍລິສັດນຳເຂົ້ານໍ້າມັນເຊື້ອໄຟ, ຕະຫລາດ, ຫ້າງຮ້ານຕ່າງໆ ພາຍໃນເຂດເທດສະບານນະຄອນປາກເຊ ເພື່ອບໍ່ໃຫ້ສວຍໂອກາດຂຶ້ນລາຄາສິນຄ້າ ແລະ ຄ່າບໍລິການ ໃນໄລຍະການສະຫລອງບຸນປີໃໝ່ລາວ ປີ 2023.
ທ່ານ ຮອງຫົວໜ້າຂະແໜງການຄ້າພາຍໃນ ໃຫ້ຮູ້ວ່າ: ເພື່ອເຮັດໃຫ້ສັງຄົມມີຄວາມສະຫງົບ, ປົກປ້ອງສິດຜົນປະໂຫຍດຂອງຜູ້ບໍລິໂພກໃນການຊົມໃຊ້ສິນຄ້າໃຫ້ໄດ້ຮັບຄວາມເປັນທໍາທາງດ້ານລາຄາ, ປະລິມານ ແລະ ຄຸນນະພາບຕາມມາດຕາຖານ ໂດຍສະເພາະແມ່ນສິນຄ້າທີ່ມີຄວາມຈຳເປັນ ແລະ ມີຜົນກະທົບໄວຕໍ່ຊີວິດການເປັນຢູ່ຂອງປະຊາຊົນບັນດາເຜົ່າເຊັ່ນ: ສິນຄ້າປະເພດ ສະບຽງອາຫານ (ຊີ້ນງົວ, ຄວາຍ, ໝູ, ປາ, ເປັດ, ໄກ່, ໄຂ່ໄກ່ ແລະ ພືດຜັກຕ່າງໆ) ແລະ ຫລີກເວັ້ນການສວຍໂອກາດກັກຕຸນສິນຄ້າ, ປັ່ນປ່ວນ ເພື່ອຂຶ້ນລາຄາສິນຄ້າຕາມລຳພັງໃຈ.
ສຳລັບສິນຄ້າອຸປະໂພກ-ບໍລິໂພກ ທີ່ໄດ້ກໍານົດໄວ້ໃນແຈ້ງການຂອງພະແນກອຸດສາຫະກຳ ແລະ ການຄ້າແຂວງຈໍາປາສັກ ເລກທີ 659/ພອຄ.ຈສ, ວັນທີ 4 ເມສາ 2023, ໃນນັ້ນ ລາຄາຈຳໜ່າຍເຂົ້າຕາມທ້ອງຕະຫລາດພາຍໃນນະຄອນປາກເຊ ປະເພດເຂົ້າສານໜຽວທີ 1 ລາຄາ 14.000 ກີບ/ກິໂລກຣາມ; ເຂົ້າສານໜຽວທີ 2 ລາຄາ 13.000 ກີບ/ກິໂລກຣາມ; ເຂົ້າສານຈ້າວທີ 1 ລາຄາ 13.000 ກີບ/ກິໂລກຣາມ; ເຂົ້າສານຈ້າວທີ 2 ລາຄາ 11.000 ກີບ/ກິໂລກຣາມ; ເຂົ້າສານຈ້າວມະລິລາວ ລາຄາ 13.000 ກີບ/ກິໂລກຣາມ; ລາຄາຈຳໜ່າຍ ຊີ້ນງົວ, ຄວາຍ ປະເພດຊີ້ນງົວ-ຄວາຍ ປະເພດ 1 ລາຄາ 120.000 ກີບ/ກິໂລກຣາມ; ຊີ້ນງົວ-ຄວາຍ ປະເພດສອງ ລາຄາ 110.000 ກີບ/ກິໂລກຣາມ; ຊີ້ນໝູ ເປັນໜ້າຟາມລາຄາຂາຍສູງສຸດ ລາຄາ 49.317 ກີບ/ກິໂລກຣາມ. ຊີ້ນໝູ ປະເພດ 1 ລາຄາ 70.000 ກີບ/ກິໂລກຣາມ; ຊີ້ນໝູປະເພດສອງ ລາຄາ 65.000 ກີບ/ກິໂລ.
ສ່ວນລາຄາ ໄກ່ພັນປອກ ແມ່ນ 60.000 ກີບ/ກິໂລກຣາມ; ໄກ່ລາດປອກ ລາຄາ 80.000 ກີບ/ກິໂລກຣາມ; ປານິນ ຈຳໜ່າຍຢູ່ໜ້າກະຊັງ ລາຄາ 40.000 ກີບ/ກິໂລກຣາມ; ປານິນ ຈຳໜ່າຍຍ່ອຍ ຕາມທ້ອງຕະຫລາດ ລາຄາ 44.000 ກີບ/ກິໂລກຣາມ; ປາດຸກພັນລ້ຽງ ລາຄາ 38.000 ກີບ/ກິໂລກຣາມ ແລະ ລາຄາຈຳໜ່າຍໄຂ່ພັນເບີ 1 ລາຄາ 61.000 ກີບ/ແຕະ; ໄຂ່ພັນເບີ 2 ລາຄາ 58.000 ກີບ/ແຕະ; ໄຂ່ພັນເບີ 3 ລາຄາ 54.000 ກີບ/ແຕະ; ໄຂ່ພັນເບີ 4 ລາຄາ 53.000 ກີບ/ແຕະ; ໄຂ່ພັນເບີ 5 ລາຄາ 51.000 ກີບ/ແຕະ.
ທັງໝົດນີ້ຖ້າຫາກພົບເຫັນສິນຄ້າທີ່ນຳມາວາງຂາຍບໍ່ຖືກຕ້ອງເປັນຕົ້ນ: ສິນຄ້າໝົດອາຍຸ, ຂາຍສິນຄ້າລາຄາແພງບໍ່ຖືກຕ້ອງກັບພາກລັດກໍານົດ ແລະ ອື່ນໆ ທີ່ຜິດຕໍ່ລະບຽບ, ກົດໝາຍ ທ່ານສາມາດໂທແຈ້ງສາຍດ່ວນການຄ້າ ເພື່ອປົກປ້ອງຜູ້ຊົມໃຊ້ ທີ່ໝາຍເລກ 1510 ເພື່ອໃຫ້ເຈົ້າໜ້າທທີ່ກວດກາການຄ້າໄດ້ແກ້ໄຂຢ່າງທັນການ.
