ສປປ ລາວ ແລະ ສ ກູບາ ເພີ່ມທະວີຮ່ວມມືພັດທະນາຊັບພະຍາກອນມະນຸດ

ວັນທີ 5 ເມສາ 2023 ນີ້, ໄດ້ພິທີເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ສະຖາບັນການຕ່າງປະເທດ ກະຊວງການຕ່າງປະເທດ ແຫ່ງ ສປປ ລາວ ແລະ ສະຖາບັນພົວພັນສາກົນຊັ້ນສູງ, ກະຊວງການຕ່າງປະເທດ ແຫ່ງ ສ ກູບາ ກ່ຽວກັບການຮ່ວມມືດ້ານພັດທະນາຊັບພະຍາກອນມະນຸດ ສຳລັບການຝຶກອົບຮົມ ແລະ ຍົກລະດັບທັກສະວິຊາຊີບ ຂອງນັກການທູດ ພາຍໃຕ້ການເພີ່ມທະວີການພົວພັນ ລະຫວ່າງ ສອງສະຖາບັນ.

ໂດຍການລົງນາມຕາງໜ້າຝ່າຍລາວ ຂອງ ທ່ານ ໄມ ໄຊຍະວົງສ໌ ຫົວໜ້າສະຖາບັນການຕ່າງປະເທດ ແລະ ຕາງໜ້າສະຖາບັນພົວພັນສາກົນຊັ້ນສູງ ຂອງ ສ ກູບາ ໂດຍທ່ານນາງ ເອນນາ ເອັສເທີ ວຽນ ວອລເດສ (Enna Esther VIANT VALDES) ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສ ກູບາ ປະຈໍາ ສປປ ລາວ. ໂດຍມີ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ, ພ້ອມດ້ວຍຕາງໜ້າສອງຝ່າຍເຂົ້າຮ່ວມ.

ເພື່ອເປັນການເສີມຂະຫຍາຍການພົວພັນ ແລະ ການຮ່ວມມືແບບເພື່ອນມິດ ລະຫວ່າງ ສອງສະຖາບັນ ກໍຄື ສອງກະຊວງການຕ່າງປະເທດ ແລະ ເປັນການສ້າງກົນໄກການຮ່ວມມືກັບສະຖາບັນພົວພັນສາກົນຊັ້ນສູງກູບາ ເພື່ອແລກປ່ຽນປະສົບການ ແລະ ຖອດຖອນບົດຮຽນ ໃນຫລັກສູດການຮຽນ-ການສອນ, ຝຶກອົບຮົມ, ການຄົ້ນຄວ້າບັນຫາພົ້ນເດັ່ນ, ແລກປ່ຽນຂໍ້ມູນຂ່າວສານ ແລະ ອື່ນໆ ທີ່ສອງຝ່າຍມີຄວາມສົນໃຈຮ່ວມກັນ, ທັງເປັນການສ້າງໃຫ້ມີນິຕິກໍາຮ່ວມກັນ ເພື່ອເປັນເອກະສານອ້າງອີງ ໃຫ້ແກ່ທັງຝ່າຍລາວ ແລະ ສ ກູບາ ໃນການພົວພັນຮ່ວມມືກັນໃນອະນາຄົດ.