ຢູ-10 ເຈົ້າພາບ ປະເດີມສະໜາມຖະຫລົ່ມ ມາສເຕີ້ ເຊເວັ້ນ 5-1 ເປັນທີມນຳກຸ່ມ ບານເຕະ ມາສດາ ຢູດລີກ 2023

ທີມເຍົາວະຊົນ ຮຸ່ນອາຍຸບໍ່ເກີນ 10 ປີ ຫຼື ຢູ-10 ສະໂມສອນ ມາສດາ ລາວຈີບີ ເອັບຊີ ດີກຣີແຊ໋ມ ລາຍການ ລາລີກາ ແອັດສະປາຍ ແລະ ເສິກແຊ໋ມຊົນແຊ໋ມ ປະເທດໄທ ປະເດີມສະໜາມໄດ້ຢ່າງສວຍງາມ ດ້ວຍການໄລ່ຖະຫລົ່ມ ສະໂມສອນ ມາສເຕີ້ ເຊເວັ້ນ ເອັບຊີ ໄປແບບຂາດຮອຍ 5-1 ເປັນທີມນຳກຸ່ມ ໃນການແຂ່ງຂັນເຕະບານ 7 ຄົນ ລາຍການ ມາສດາ ຢູດລີກ 2023 ຫລື “Mazda Youth League 2023”.

ການແຂ່ງຂັນເຕະບານລາຍການດັ່ງກ່າວ ໄດ້ເປີດສາກຂຶ້ນຢ່າງເປັນທາງການ ເມື່ອທ້າຍອາທິດຜ່ານມາ (1-2 ເມສາ) ທີ່ສະໜາມກິລາຕ່າງໆພາຍໃນສູນກາງ ແລະ ອີກໜຶ່ງສະໜາມທີ່ແຂວງບໍລິຄຳໄຊ, ພາຍໃຕ້ການເປັນປະທານຈັດງານຂອງ ທ່ານ ທິບພະເນດ ແກ້ວມະນິວົງ ປະທານບໍລິສັດ ແກ້ວໂອໂຕ ກຣຸບ ຈຳກັດ ຊຶ່ງລາຍການນີ້ ນຳໃຊ້ລະບົບ ແຂ່ງຂັນແບບລີກ ມີຮອບຂາໄປ-ຂາກັບ ຜັດປ່ຽນກັນແຂ່ງຂັນໃນບ້ານ-ນອກບ້ານ. ຊຶ່ງມີ 3 ຮຸ່ນ ຄື: ຢູ-10, ຢູ-12 ແລະ ຢູ-14 ສຳລັບ ຢູ-10 ມີ 6 ພາກສ່ວນ ປະກອບມີ ເຈົ້າພາບ ມາສດາ ລາວ ຈີບີ ເອັບຊີ, ເອໄອເອັດ, ມາສເຕີ ເຊເວັເນ ເອັບຊີ, ວຽງຈັນ ເອັບທີ, ຈຳປາຮັກ ແລະ ດັບເບິນຢູໄອຈີ ນາຄາ. ສ່ວນ ຢູ-12 ມີ 10 ພາກສ່ວນ ຄື: ປາກຊັນ ເອັບຊີ, ເອັມພີທີ ເອັບຊີ, ເອັບຊີ ຕາລັນຕ້າ, ວຽງຈັນ ເອັບທີ, ດັບເບິນຢູໄອຈີ ນາຄາ, ຈຳປາຮັກ ເອັບຊີ, ບີບີບີ ໂອໂຕ ເອັບຊີ, ເອໄອເອັດ, ມັດສະດາ ຈີບີ ເອັບຊີ ແລະ ມາສເຕີ ເຊເວັນ ເອັບຊີ. ຂະນະທີ່ ຢູ-14 ມີ 10 ພາກສ່ວນ ປະກອບມີ ປາກຊັນ ເອັບຊີ, ມະຫາວິທະຍາໄລແຫ່ງຊາດ, ເອັບຊີ ຕາລັນຕ້າ, ວຽງຈັນ ເອັບທີ, ເອັບເຮັດແອວ ເອັບຊີ, ຈຳປາຮັກ ເອັບຊີ, ເອສຣາ, ເອໄອເອັດ, ມັດສະດາ ຈີບີ ເອັບຊີ ແລະ ມາດເຕີ ເຊເວັນ ເອັບຊີ.

ຜ່ານການແຂ່ງຂັນອາທິດທຳອິດ ໃນຮອບຂາໄປ ໃນວັນທີ 1 ເມສາ ຜ່ານມາ ມີແຂ່ງຂັນ 7 ຄູ່ ປະກົດວ່າ: ຢູ-12 ບີບີບີ ໂອໂຕ ເອັບຊີ ຖະຫຼົ່ມ ເອັມພີທີ ເອັບຊີ 7-0 ປະຕູ, ຈຳປາຮັກ ບຸກໄປຕີສະເໝີ ປາກຊັນ ເອັບຊີ 3-3 ປະຕູ, ມາສດາ ສະເໝີ ວຽງຈັນ ເອັບທີ 4-4 ປະຕູ, ເອັບຊີ ຕາລັນຕ້າ ຊະນະ ເອໄອເອັດ 6-0 ປະຕູ. ສ່ວນ ຢູ-14 ປາກຊັນ ເອັບຊີ ເປີດບ້ານຖະຫຼົ່ມ ຈຳປາຮັກ ເອັບຊີ 4-0 ປະຕູ, ມາສດາ ລາວ ຈີບີ ເອັບຊີ ໄລ່ຕ້ອນ ວຽງຈັນ ເອັບທີ 2-0 ປະຕູ, ເອສຣາ ເອັບຊີ ຖະຫລົ່ມ ມະຫາວິທະຍາໄລແຫ່ງຊາດ ຫຼື ມຊ 5-0 ປະຕູ, ເອັບເຮັດແອວ ເອັບຊີ ຊະນະ ພີເອັມທີ ເອັບຊີ 3-1 ປະຕູ ແລະ ເອັບຊີ ຕາລັນຕ້າ ຊະນະ ເອໄອເອັດ 4-1 ປະຕູ. ຂະນະທີ່ ຢູ-10 ມາສດາ ລາວ ຈີບີ ເອັບຊີ ຊະນະ ມາສເຕີ ເຊເວັນ ເອັບຊີ 5-1 ປະຕູ ແລະ ເອໄອເອັດ ຖະຫລົ່ມ ຈຳປາຮັກ ເອັບຊີ 5-2 ປະຕູ.

ພາບ-ຂ່າວ:ໜັງສືພິມສຶກສາ-ກິລາລາຍວັນ