ຫາລືກ່ຽວກັບເນື້ອໃນແບບສອບຖາມສຳຫລັບການສຳຫລວດພົນລະເມືອງ ແລະ ທີ່ຢູ່ອາໄສ ປີ 2025
ສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ຮ່ວມກັບ ອົງການສະຫະປະຊາຊາດ ກອງທຶນສໍາລັບປະຊາກອນ (UNFPA) ແລະ ອົງການພັດທະນາສາກົນອາເມຣິກາ (USAID) ໄດ້ຈັດກອງປະຊຸມປຶກສາຫາລື ກ່ຽວກັບເນື້ອໃນແບບສອບຖາມ ການສຳຫລວດພົນລະເມືອງ ແລະ ທີ່ຢູ່ອາໄສ ທົ່ວປະເທດ ຄັ້ງທີ 5 ປີ 2025 (PHC 2025) ໃນວັນທີ 30 ມີນາ 2023 ຜ່ານມາ, ໂດຍການເປັນປະທານຮ່ວມຂອງ ທ່ານ ນາງ ພອນສະຫລີ ສຸກສະຫວັດ ຫົວໜ້າສູນສະຖິຕິແຫ່ງຊາດ, ທ່ານ ນາງ ມາລຽມ ເອ ຄານ (Mariam A. Khan) ຜູ້ຕາງໜ້າອົງການ UNFPA ປະຈໍາລາວ ແລະ ທ່ານ ມິກເຊວລ ຣອນນິ້ງ (Michael Ronning) ຜູ້ຕາງໜ້າອົງການ USAID ປະຈໍາລາວ, ມີພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ພອນສະຫລີ ສຸກສະຫວັດ ກ່າວວ່າ: ການສຳຫລວດພົນລະເມືອງ ແລະ ທີ່ຢູ່ອາໄສ ແມ່ນສໍາຫຼວດ ໃນທຸກໆ 10 ປີ ໂດຍແມ່ນສູນສະຖິຕິແຫ່ງຊາດ ເປັນເຈົ້າການຫລັກໃນການຈັດຕັ້ງປະຕິບັດ. ຜ່ານການສໍາຫລວດດັ່ງກ່າວໃນ 4 ຄັ້ງທີ່ຜ່ານມາ, ໄດ້ສະໜອງຂໍ້ມູນທີ່ສໍາຄັນ ກ່ຽວກັບສະພາບການດໍາລົງຊິວິດຂອງພົນລະເມືອງ, ບັນຫາທາງດ້ານສຸຂະພາບ ແລະ ໂພຊະນາການຂອງແມ່ຍິງ-ເດັກນ້ອຍ ແລະ ການເຂົ້າເຖິງການບໍລິການຕ່າງໆ ຂອງປະຊາຊົນບັນດາເຜົ່າໃນຂອບເຂດທົ່ວປະເທດ, ເປັນແຫລ່ງຂໍ້ມູນທີ່ສໍາຄັນ ນໍາໃຊ້ເຂົ້າໃນການປະເມີນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VIII, ເປັນບ່ອນອີງໃຫ້ແກ່ການສ້າງແຜນ 5 ປີ ຄັ້ງທີ IX ແລະ ການສ້າງບົດລາຍງານແຫ່ງຊາດ ແບບສະໝັກໃຈ ຄັ້ງທີ 1 ແລະ 2 (VNR1 ແລະ VNR2) ຂອງລັດຖະບານ.
ການກະກຽມເນື້ອໃນແບບສອບຖາມດັ່ງກ່າວ, ແມ່ນສໍາຄັນຫລາຍ ຊຶ່ງຕ້ອງໄປຕາມຈຸດປະສົງຂອງການສໍາຫລວດ ເພື່ອໃຫ້ໄດ້ຂໍ້ມູນທີ່ຕ້ອງການ ແລະ ມີຄຸນນະພາບຕາມຄາດຫວັງ ແລະ ສອດຄ່ອງກັບບຸລິມະສິດຂອງການພັດທະນາປະເທດ. ເນື້ອໃນຂອງແບບສອບຖາມໃນຄັ້ງນີ້, ແມ່ນອີງໃສ່ບັນດາຄໍາຖາມຂອງການສໍາຫລວດໃນຄັ້ງທີ 4 ປີ 2015 ທີ່ຜ່ານມາ ເປັນພື້ນຖານ ແລະ ໄດ້ມີການເພີ່ມຕື່ມບາງເນື້ອໃນ ຄໍາຖາມ ເຊັ່ນ: ພາກແຮງງານ, ພາກການເຄື່ອນຍ້າຍ ເພື່ອໃຫ້ມີຄວາມຄົບຖ້ວນຂອງການເກັບກໍາຂໍ້ມູນ ຈາກການສໍາຫຼວດໃຫ້ສາມາດຕອບສະໜອງໄດ້ຕາມຄວາມຕ້ອງການ. ເມື່ອເຫັນໄດ້ຄວາມສໍາຄັນຂອງການສໍາຫລວດພົນລະເມືອງ ແລະ ທີ່ຢູ່ອາໄສ ຄືດັ່ງກ່າວມານັ້ນ ຈຸດປະສົງຂອງກອງປະຊຸມໃນຄັ້ງນີ້ ຈະໄດ້ປຶກສາຫາລືຄື: ນໍາສະເໜີຮ່າງແບບສອບຖາມຂອງການສໍາຫລວດພົນລະເມືອງ ແລະ ທີ່ຢູ່ອາໄສ ຕໍ່ກັບບັນດາຂະແໜງການທີ່ກ່ຽວຂ້ອງ ແລະ ຄູ່ຮ່ວມພັດທະນາ ເພື່ອອະນຸມັດຮັບຮອງແບບສອບຖາມ ແລະ ຮັບປະກັນຄວາມຕ້ອງການ ແລະ ຄວາມຄົບຖ້ວນຂອງຂໍ້ມູນພື້ນຖານ ທີ່ຈໍາເປັນສໍາລັບການພັດທະນາປະເທດ; ສະເໜີຄວາມຄືບໜ້າໃນການກະກຽມການສໍາຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ 5 ປີ 2025 ແລະ ແຜນການໃນຕໍ່ໜ້າໃຫ້ກັບບັນດາຂະແໜງການ ແລະ ຄູ່ຮ່ວມພັດທະນາ ໄດ້ຮັບຊາບ.
