ຄ່າແຮງແຊງ ໂຣນັລໂດ້! ອັລ ຮິລາ ພ້ອມທຸ້ມເງິນຄວ້າ ເມສຊີ່ ຮ່ວມທີມ

ມີລາຍງານວ່າ ອັລ-ຮິລາ ກຽມເຊັນສັນຍາກັບ ລີໂອເນວ ເມສຊີ່ ດ້ວຍຄ່າແຮງທີ່ແພງທີ່​ສຸດ​ໃນ​ໂລກ​ແຊງໜ້າ ຄຣິສເຕຍໂນ ໂຣນັລໂດ້.

ດາວເຕະແຊ້ມບານໂລກ 2022 ຈະໝົດສັນຍາກັບ ປາຣີ ແຊັງ-ແຊກແມ໊ງ ຫລັງຈົບລະດູການນີ້ ເຊິ່ງຖ້າວ່າລາວເລືອກຈະຂະຫຍາຍສັນຍາ ຈະຕ້ອງຍອມຫລຸດຄ່າຈ້າງລົງຈາກເດີມທີ່ໄດ້ຢູ່ 3 ລ້ານປອນຕໍ່ເດືອນ ເນື່ອງຈາກ ເປແອສເຊ ກຳລັງສຸ່ມສ່ຽງຕໍ່ການລະເມີດກົດລະບຽບການເງິນຂອງສະຫະພັນບານເຕະເອີຣົບ.

ໃນຂະນະທີ່ທາງ ເມສຊີ່ ເບິ່ງຄືວ່າບໍ່ຕ້ອງການຫລຸດຄ່າແຮງລົງ ເຮັດໃຫ້ ອັລ-ຮິລາ ກຽມຍື່ນຂໍ້ສະເໜີມາລໍ້ໃຈ ເມສຊີ່ ໂດຍການຈ່າຍຄ່າຈ້າງຫລາຍກ່ວາຄູ່ແຂ່ງຮ່ວມຊາດທີ່ ອັລ-ນາສເຊີ ຈ່າຍໃຫ້ ຄຣິສເຕຍໂນ ໂຣນັລໂດ້.

ທັງນີ້ ໂຣນັລໂດ້ ເປັນນັກເຕະທີ່ມີຄ່າຈ້າງສູງທີ່ສຸດໃນໂລກໃນປັດຈຸບັນ. ຈາກການເຊັນສັນຍາກັບ ອັລ-ນາສເຊີ ທີ່ຈ່າຍໃຫ້ເຂົາໃນລາຄາສູງເຖິງ 173 ລ້ານປອນ, ເຊິ່ງຖ້າຫາກວ່າ ເມສຊີ ຍ້າຍໄປຢູ່ກັບ ອັລ-ຮິລາ ກໍ່ຈະໄດ້ຮັບຄ່າຈ້າງຫລາຍກວ່າ. ເຖິງແມ່ນວ່າຍັງບໍ່ໄດ້ມີການລະບຸຕົວເລກແຕ່ຢ່າງໃດ.