ຈະສະເໜີ ຮ່າງດໍາລັດ ວ່າດ້ວຍຄອນໂດມີນຽມ ຜ່ານກອງປະຊຸມລັດຖະບານ ປະຈໍາເດືອນ ພຶດສະພາ 2023
April 1, 2023 - 12:04 PM
ວັນທີ 31 ມີນາ 2023 ຜ່ານມາ, ທີ່ຫ້ອງປະຊຸມໃຫຍ່ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ຈັດກອງປະຊຸມທາບທາມຮ່າງດໍາລັດ ວ່າດ້ວຍຄອນໂດມີນຽມ ຂັ້ນສູນກາງ ໂດຍການເປັນປະທານຮ່ວມຂອງທ່ານ ປອ. ລີວາເມັງ ບົວປາວ, ຮອງຫົວໜ້າກົມທີ່ດິນ ແລະ ທ່ານ ບຸນລັດ ວໍລະຈິດ, ຮອງຫົວໜ້າຫ້ອງການກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ການເຂົ້າຮ່ວມຂອງບັນດາທ່ານໃນຄະນະຮັບຜິດຊອບສ້າງດໍາລັດ ວ່າດ້ວຍຄອນໂດມີນຽມ ຊຶ່ງຕາງ ໜ້າໃຫ້ຫ້ອງວ່າການສໍານັກງານນາຍົກລັດຖະມົນຕີ, ກະຊວງຍຸຕິທໍາ, ກະຊວງອຸດສາຫະກໍາ ແລະ ການຄ້າ, ກະຊວງໂຍທາທິການ ແລະ ຂົນສົ່ງ, ກະຊວງແຜນການ ແລະ ການລົງທຶນ. ນອກນີ້, ຍັງມີແຂກຖືກເຊີນຈາກກົມວິຊາການກະຊວງການເງິນ, ທະນາຄານ ແຫ່ງ ສປປ ລາວ, ກະຊວງປ້ອງກັນຄວາມສະຫງົບ, ບັນດາກົມວິຊາການຂອງກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ພ້ອມດ້ວຍບັນດາທ່ານຜູ້ຕາງໜ້າຈາກສະພາການຄ້າ ແລະ ອຸດສາຫະກໍາແຫ່ງຊາດລາວ, ສະພາການຄ້າ ແລະ ອຸດສາຫະກໍານະຄອນຫຼວງວຽງຈັນ, ບັນດາຜູ້ຕາງໜ້າຈາກທະນາຄານທຸລະກິດ, ຜູ້ພັດທະ ນາໂຄງການໃນເຂດເສດຖະກິດພິເສດ ແລະ ຜູ້ພັດທະນາໂຄງການທີ່ມີສັນຍາເຊົ່າ-ສໍາປະທານທີ່ດິນລັດ ຢູ່ພາຍໃນນະຄອນຫຼວງວຽງຈັນ ເຂົ້າຮ່ວມ 65 ທ່ານ.
ການສ້າງດໍາລັດວ່າດ້ວຍຄອນໂດມີນຽມ ແມ່ນການຈັດຕັ້ງຜັນຂະຫຍາຍທິດຊີ້ນໍາທີ 6 ກ່ຽວກັບການຫນັທີ່ດິນເປັນທຶນ ແລະ ການສ້າງຕະຫຼາດໃໝ່ ຕາມມະຕິຂອງຄະນະບໍລິຫານງານສູນກາງພັກວ່າດ້ວຍເພີ້ມທະວີວຽກງານຄຸ້ມຄອງ ແລະ ພັດທະນາທີ່ດິນ ໃນໄລຍະໃໝ່ ເລກທີ 026 /ຄບສພ,
ລົງວັນທີ 03 ສິງຫາ 2017 ແລະ ມາດຕາ 130 ຂອງກົດໝາຍວ່າດ້ວຍທີ່ດິນ ສະບັບປັບປຸງ ເລກທີ 70/ສພຊ, ລົງວັນທີ 21 ມິຖຸນາ 2019 ຊຶ່ງໄດ້ກໍານົດກ່ຽວກັບການໄດ້ສິດນໍາໃຊ້ທີ່ດິນ ຈາກການຊື້ຫ້ອງຊຸດໃນຄອນໂດມີນຽມ ແນ່ໃສ່ການນຳໃຊ້ ແລະ ພັດທະນາທີ່ດິນປຸກສ້າງ ໃຫ້ມີມູນຄ່າເພີ່ມຂຶ້ນ ແລະ ເກີດປະໂຫຍດສູງສຸດ ລວມທັງການປົກປ້ອງສິດນຳໃຊ້ທີ່ດິນ, ກຳມະສິດລວມໝູ່ ແລະ ກຳມະສິດສ່ວນຕົວ ຂອງຜູ້ທີ່ເປັນເຈົ້າຂອງກຳມະສິດຫ້ອງຊຸດໃນຄອນໂດມີນຽມ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ໃຫ້ມີຄວາມຢືນຍົງ ດັ່ງນີ້:
1. ຜູ້ຊື້ ຫ້ອງຊຸດໃນຄອນໂດມີນຽມ ທີ່ເປັນພົນລະເມືອງລາວ ມີສິດນໍາ ໃຊ້ທີ່ດິນໃນຕອນດັ່ງ ກ່າວ ຕາມອັດຕາສ່ວນເນື້ອທີ່ຂອງຫ້ອງຊຸດຕໍ່ຕາແມັດ ໃນເນື້ອທີ່ດິນປຸກສ້າງຄອນໂດມີນຽມ ທີ່ໄດ້ກໍານົດໄວ້ໃນບົດວິພາກເສດຖະກິດ-ເຕັກນິກຂອງຄອນໂດມີນຽມ ແລະ ມີກໍາມະສິດໃນຫ້ອງຊຸດທີ່ຊື້ນັ້ນ ຕາມສັນຍາ.
2. ສໍາລັບຄົນຕ່າງດ້າວ, ຄົນບໍ່ມີສັນຊາດ, ຄົນຕ່າງປະເທດ ແລະ ຄົນຕ່າງປະເທດທີ່ເປັນເຊື້ອຊາດລາວ ທີ່ຊື້ຫ້ອງຊຸດໃນຄອນໂດມີນຽມ ມີແຕ່ກຳມະສິດໃນຫ້ອງຊຸດເທົ່ານັ້ນຢ່າງຍາວນານ ໂດຍມີກຳນົດເວລາຕາມອາຍຸຂອງສິ່ງປຸກສ້າງ. ສ່ວນສິດນຳໃຊ້ທີ່ດິນທີ່ປຸກສ້າງຄອນໂດມີນຽມນັ້ນ ຍັງເປັນສິດນຳໃຊ້ທີ່ດິນຂອງນິຕິບຸກຄົນທີ່ເປັນເຈົ້າຂອງສິດນຳໃຊ້ທີ່ດິນດັ່ງກ່າວ.
3. ຖ້າເປັນທີ່ດິນຂອງລັດ ຜູ້ຊື້ຫ້ອງຊຸດໃນຄອນໂດມີນຽມ ຈະເປັນພົນ ລະເມືອງລາວ, ຄົນຕ່າງດ້າວ, ຄົນບໍ່ມີສັນຊາດ, ຄົນຕ່າງປະເທດ ແລະ ຄົນຕ່າງ ປະເທດທີ່ເປັນເຊື້ອຊາດລາວ ກໍຕາມຈະມີແຕ່ສິດນໍາໃຊ້ທີ່ດິນຂອງລັດ ຮ່ວມກັນ ເທົ່ານັ້ນ.
4. ຜູ້ເປັນເຈົ້າຂອງກໍາມະສິດໃນຫ້ອງຊຸດ ຕ້ອງຂຶ້ນທະບຽນກໍາມະສິດ ນໍາຂະແໜງການຊັບພະ ຍາກອນທໍາມະຊາດ ແລະ ສິ່ງແວດລ້ອມ.
ຊຶ່ງພາຍຫຼັງສໍາເລັດກອງປະຊຸມທາບທາມຂັ້ນສູງກາງຄັ້ງນີ້ແລ້ວ ໃນລະຫວ່າງວັນທີ 6-7 ເມສາ 2023 ຄະນະຮັບຜິດຊອບສ້າງດໍາລັດວ່າດ້ວຍຄອນໂດມີນຽມ ຈະໄດ້ສຶບຕໍ່ຈັດກອງປະຊຸມທາບທາມຄໍາຄິດຄໍາເຫັນ ຢູ່ 3 ພາກ ຂອງປະເທດເຮົາ ຄື: (1) ພາກເໜືອ ຈັດຢູ່ແຂວງຫຼວງພະບາງ, (2) ພາກກາງຈັດຢູ່ແຂວງວຽງຈັນ ແລະ (3) ພາກໃຕ້ຈັດຢູ່ແຂວງຈໍາປາສັກ ແນໃສ່ເພື່ອຮັບຟັງຄໍາຄິດຄໍາເຫັນຈາກພາກສ່ວນຕ່າງໆຢ່າງກ້ວາງຂວາງ, ຄົບຖ້ວນດ້ານເນື້ອໃນ ກ່ອນກວດກາຄວາມສອດຄ່ອງດ້ານກົດໝາຍຮ່ວມກັບກົມກົດໝາຍກະຊວງຍຸຕິທໍາ ໃນທ້າຍເດືອນ ເມສາ 2023 ຈາກນັ້ນຈຶ່ງນໍາສະເໜີຜ່ານກອງປະຊຸມລັດຖະບານ ປະຈໍາເດືອນ ພຶດສະພາ 2023.
