ອົງການອະນາໄມໂລກຮັບຮອງອາເຊີໄບຈານ-ທາຈິກິດສະຖານ “ເປັນປະເທດປອດພະຍາດມາລາເຣຍ”
ໃນວັນທີ 29 ມີນາຜ່ານມາ, ອົງການອະນາໄມໂລກ (WHO) ຮັບຮອງໃຫ້ອາເຊີໄບຈານ ແລະ ທາຈິກິດສະຖານ ເປັນປະເທດປອດພະຍາດມາລາເຣຍ.
ວັນທີ 31 ມີນາ, ສໍານັກຂ່າວຕ່າງປະເທດລາຍງານວ່າ: ທ່ານ ເທດຣອສ ແອດຮານອມ ເກເບຣເຢຊຸສ ຜູ້ອໍານວຍການ WHO ຍອມຮັບ “ຄວາມພະຍາຍາມທີ່ຍາວນານ” ຂອງທັງສອງປະເທດ ໃນການກໍາຈັດພະຍາດນີ້ ໂດຍທ່ານກ່າວວ່າ: ນີ້ຄືຂໍ້ພິສູດເພີ່ມຕື່ມ ເຊິ່ງເຮັດໃຫ້ເຫັນວ່າ: ຈາກຊັບພະຍາກອນທີ່ເໝາະສົມ ແລະ ຄວາມມຸ່ງໝັ້ນທາງການເມືອງ ການກໍາຈັດພະຍາດມາເລເຣຍຈຶ່ງເປັນສິ່ງທີ່ເປັນໄປໄດ້.
ຕາມຂໍ້ມູນຂອງ WHO ປະເທດທີ່ຈະໄດ້ຮັບການຮັບຮອງວ່າ: “ປອດພະຍາດມາລາເຣຍ” ຕ້ອງສະແດງໃຫ້ເຫັນວ່າ: ວົງຈອນການແພ່ເຊື້ອມາລາເຣຍພື້ນເມືອງໂດຍຍຸງກົ້ນຊີ້ ຢຸດລົງທົ່ວປະເທດເປັນເວລາ 3 ປີຕິດຕໍ່ກັນ ແລະ ຕ້ອງມີຄວາມສາມາດໃນການປ້ອງກັນການແພ່ລະບາດຊໍ້າອີກ.
ຜູ້ຕິດເຊື້ອມາລາເຣຍພລາສໂມດຽມ ໄວແວັກ (PV) ຄົນສຸດທ້າຍຂອງອາເຊີໄບຈານ ຖືກກວດພົບໃນປີ 2012. ຂະນະທີ່ທາຈິກິດສະຖານ ພົບຜູ້ຕິດເຊື້ອຄົນສຸດທ້າຍໃນອີກ 2 ປີຕໍ່ມາ ໂດຍທັງສອງປະເທດມີລະບົບເຝົ້າລະວັງພະຍາດມາລາເຣຍແບບເອເລັກໂຕຣນິກລະດັບປະເທດ.
ຜົນສໍາເລັດດັ່ງກ່າວ ເຮັດໃຫ້ໃນປັດຈຸບັນມີປະເທດປອດພະຍາດມາລາເຣຍທີ່ຮັບຮອງໂດຍ WHO ທັງໝົດ 41 ປະເທດ ແລະ 1 ດິນແດນ ເຊິ່ງຫລາຍກວ່າເຄິ່ງໜຶ່ງຂອງຈໍານວນດັ່ງກ່າວຢູ່ພາກພື້ນເອີຣົບ.
ນອກຈາກນີ້, WHO ຍັງຍອມຮັບຄວາມພະຍາຍາມຂອງອາເຊີໄບຈານ ແລະ ທາຈິກິດສະຖານ ເຊິ່ງສົ່ງຜົນໃຫ້ເກີດການລົງທຶນທີ່ຍືນຍົງ ແລະ ການທຸ້ມເທຂອງເຈົ້າໜ້າທີ່ສາທາລະນະສຸກ ຄຽງຄູ່ກັບການປ້ອງກັນທີ່ຖືກເປົ້າ ຕະຫລອດຈົນການກວດຫາ ແລະ ການປິ່ນປົວຜູ້ຕິດເຊື້ອພະຍາດມາລາເຣຍທຸກຄົນນັບແຕ່ຫົວທີ.
