ປາກິດສະຖານແຈກແປ້ງຟຣີຊ່ວຍປະຊາຊົນ ແຕ່ວຸ່ນວາຍຈົນຢຽບກັນຕາຍ 11 ຄົນ
ມີຜູ້ເສຍຊີວິດຢ່າງໜ້ອຍ 11 ຄົນ ຈາກເຫດຢຽບກັນ ຢູ່ສູນແຈກແປ້ງຊ່ວຍເຫລືອປະຊາຊົນໃນເມືອງກາຣາຈີຂອງປາກິດສະຖານ.
ວັນທີ 1 ເມສາ, ສໍານັກຂ່າວຕ່າງປະເທດລາຍງານວ່າ: ທາງການເມືອງກາຣາຈີ ເຊິ່ງເປັນເມືອງໃຫຍ່ທີ່ສຸດຂອງປາກິດສະຖານ ແລະ ຕັ້ງຢູ່ທາງຕອນໃຕ້ຂອງປະເທດ ລາຍງານການເກີດເຫດວຸ່ນວາຍ ພາຍໃນສູນແຈກແປ້ງຟຣີປະຈໍາເມືອງ.
ທັງນີ້, ເມືອງກາຣາຈີເປັນໜຶ່ງໃນເມືອງໃຫຍ່ຂອງປາກິດສະຖານ ເຊິ່ງເປັນສະຖານທີ່ຈັດຕັ້ງສູນແຈກແປ້ງຟຣີ ໂດຍເປັນໂຄງການຂອງພາກລັດທີ່ຈັດຕັ້ງຂຶ້ນ ເພື່ອຊ່ວຍເຫລືອປະຊາຊົນ ທ່າມກາງສະພາບເງິນເຟີ້ ເຊິ່ງປັດຈຸບັນຢູ່ລະດັບປະມານ 30% ເປັນສະຖິຕິສູງສຸດໃນຮອບເຄິ່ງສະຕະວັດ ແລະ ແນ່ນອນວ່າ ສົ່ງຜົນໃຫ້ຄ່າຄອງຊີບເພີ່ມສູງຂຶ້ນ.
ແປ້ງເປັນໜຶ່ງໃນອາຫານພື້ນຖານຂອງຊາວປາກິດສະຖານ. ເຖິງຢ່າງໃດກໍຕາມ, ລາຄາສິນຄ້າດັ່ງກ່າວປັບເພີ່ມຂຶ້ນສູງເຖິງ 45% ພາຍໃນໄລຍະ 12 ເດືອນຫລ້າສຸດ ຈຶ່ງຖືວ່າເປັນໜຶ່ງໃນສິນຄ້າທີ່ມີລາຄາແພງທີ່ສຸດໃນເວລານີ້ສໍາລັບຊາວປາກິດສະຖານ ພາຍໃນສູນແຈກແປ້ງຈຶ່ງເຕັມໄປດ້ວຍປະຊາຊົນຈໍານວນຫລາຍທີ່ບຽດສຽດກັນ ຈົນກາຍເປັນການຢຽບກັນ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 11 ຄົນ ແລະ ມີຜູ້ໄດ້ຮັບບາດເຈັບອີກ 5 ຄົນ. ຂະນະທີ່ເປົາແປ້ງຈໍານວນຫລາຍຖືກລັກໄປຈາກສາງ.
