ເຈົ້າຄອງນະຄອນຫລວງ ຢ້ຽມຢາມ ແລະ ພົບປະໂອ້ລົມປະຊາຊົນບ້ານດອນຊິງຊູ້

ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ ພ້ອມຄະນະ ໄດ້ຢ້ຽມຢາມ ແລະ ພົບປະໂອ້ລົມປະຊາຊົນບ້ານດອນຊິງຊູ້ ເມືອງສີໂຄດຕະບອງ ນວ ໃນວັນທີ 29 ມີນາ 2023, ໂດຍການຕ້ອນຮັບຂອງ ທ່ານ ທະວີໄຊ ເໝົາຊົມພູ ເຈົ້າເມືອງສີໂຄດຕະບອງ ພ້ອມອຳນາດການປົກຄອງບ້ານ ແລະ ປະຊາຊົນພາຍໃນບ້ານເຂົ້າຮ່ວມ.

ທ່ານ ສຸນັນ ເຮືອງປະເສີດ ນາຍບ້ານດອນຊິງຊູ້ ລາຍງານວ່າ: ບ້ານດອນຊິງຊູ້ ຕັ້ງຢູ່ໃຈກາງຂອງແມ່ນ້ຳຂອງ ມີເນື້ອທີ່ທັງໝົດ 133,29 ເຮັກຕາ ມີພົນລະເມືອງຈຳນວນ 253 ຄົນ, ຍິງ 122 ຄົນ, ມີ 56 ຄອບ ຄົວ 57 ຫລັງຄາເຮືອນ, ມີວັດ 1 ແຫ່ງ, ໂຮງຮຽນຊັ້ນປະຖົມ 1 ແຫ່ງ (ປ1 ແລະ ປ2) ແລະ ກອງຮ້ອຍຊາຍແດນ ພາຍໃນບ້ານມີ 2 ຊົນເຜົ່າຄື: ຊົນເຜົ່າລາວລຸ່ມ ແລະ ກຶມມຸ, ບ້ານດອນຊິງຊູ້ມີເນື້ອທີ່ທຳການຜະລິດປະເພດພືດລົ້ມລຸກທັງໝົດ 64 ເຮັກຕາ ປະຊາຊົນພາຍໃນບ້ານສ່ວນໃຫຍ່ທຳການຜະລິດກະສິກຳ ແລະ ລ້ຽງສັດເປັນອາຊີບຫລັກ. ປັດຈຸບັນ, ປະຊາຊົນພາຍໃນບ້ານໄດ້ຊົມໃຊ້ໄຟຟ້າໝົດທຸກຄອບຄົວ ສ່ວນນ້ຳໃຊ້ປະຈຳວັນແມ່ນຍັງອາໃສ່ນ້ຳຂອງ ແລະ ນ້ຳບາດານ.

ໂອກາດນີ້ ທ່ານ ເຈົ້າຄອງ ໄດ້ເນັ້ນໃຫ້ປະຊາຊົນ ເຂົ້າຮ່ວມຢ່າງຕັ້ງໜ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ, ຕ້ານ ແລະ ສະກັດກັ້ນບັນດາປະກົດການຫຍໍ້ທໍ້ຢູ່ພາຍໃນບ້ານ ເປັນຕົ້ນບັນຫາຢາເສບຕິດ, ອອກແຮງຊ່ວຍກຳລັງຫລວງ, ສົມທົບກັບອົງການປົກຄອງບ້ານ, ອອກແຮງຊີ້ນຳ ປກສ ແລະ ກອງຫລອນ ໃຫ້ຮູ້ຈັກເຄື່ອນໄຫວຕາມພາລະບົດບາດໜ້າທີ່, ກວດກາສະລະເວຮ່ວມກັບກອງຮ້ອຍຊາຍແດນທີ່ປະຈຳຢູ່ບ້ານ, ເອົາໃຈໃສ່ຄຸ້ມຄອງບຸກຄົນທີ່ຈະລັກລອບເຂົ້າ-ອອກ ຕາມສາຍແດນປະເທດ ລວມທັງເປົ້າໝາຍລັກລອບຂົນສົ່ງສິ່ງທີ່ຜິດກົດໝາຍ ຢາເສບຕິດ ສິນຄ້າລົບຫລີກພາສີ ແລະ ເປົ້າໝາຍອື່ນໆ. ເພື່ອປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ, ມີຄວາມສະຫງົບຕາມຈຸດຫລໍ່ແຫລມໃຫ້ເປັນປົກກະຕິ.

ພ້ອມທັງເອົາໃຈໃສ່ຊຸກຍູ້ການຜະລິດຂອງປະຊາຊົນພາຍໃນບ້ານ ພາກັນປູກ-ການລ້ຽງໃຫ້ຫລາຍກາຍເປັນສິນຄ້າ, ສຸມໃສ່ແກ້ໄຂຄອບຄົວທຸກຍາກ ແລະ ສູ້ຊົນສ້າງບ້ານດອນຊິງຊູ້ ໃຫ້ເປັນບ້ານພັດທະນາ ແລະ ສ້າງບ້ານພັດທະນາໃຫ້ໄດ້ ໃນປີ 2025.

ຂໍ້ມູນ: Vientiane Mai