ປະທານສະພາແຫ່ງຊາດ ຊີ້ນຳ 8 ວຽກ ຕໍ່ຜູ້ພິພາກສາ ທົ່ວປະເທດ

ການຊີ້ນຳຄັ້ງນີ້, ມີຂຶ້້ນໃນໂອກາດທີ່ ທ່ານ ປອ ໄຊສົມພອນ ພົມວິຫານ ເຂົ້າຮ່ວມກອງປະຊຸມໃຫຍ່ຜູ້ພິພາກສາທົ່ວປະເທດ ຄັ້ງທີ X ໃນວັນທີ 29 ມີນາ 2023 ໂດຍການເປັນປະທານຂອງທ່ານ ປອ ນາງ ວຽງທອງ ສີພັນດອນ ປະທານສານປະຊາຊົນສູງສຸດວ່າ: ຜູ້ພິພາກສາ ມີຄວາມຈຳເປັນ ແລະ ຖືເປັນວຽກງານຮີບດ່ວນ ໂດຍສະເພາະແມ່ນຜູ້ພິພາກສາທົ່ວປະເທດຕ້ອງກຳແໜ້ນ 8 ວຽກ ເຊັ່ນ:

1; ຕ້ອງເຂົ້າໃຈ ແລະ ກໍາແໜ້ນແນວທາງການສ້າງລັດທີ່ປົກຄອງດ້ວຍກົດໝາຍຢູ່ ສປປ ລາວ ໃຫ້ຖືກຕ້ອງ, ເລິກເຊິງຕາມທີ່ກອງປະຊຸມໃຫຍ່ຂອງພັກວາງອອກ ໂດຍຢຶດໝັ້ນຫຼັກການທີ່ວ່າພັກນໍາພາ ແລະ ກໍາອໍານາດຕາມກົດໝາຍ, ລັດຄຸ້ມຄອງສັງຄົມດ້ວຍກົດໝາຍ, ປະຊາຊົນໃຊ້ສິດເປັນເຈົ້າສະເໝີພາບຕໍ່ໜ້າກົດໝາຍ;

2. ເຊີດຊູບົດບາດຂອງອົງການຕຸລາການໃຫ້ເຂັ້ມແຂງ, ໜັກແໜ້ນ ໃຫ້ກາຍເປັນເຄື່ອງມືພະເດັດການທີ່ສັກສິດ ແລະ ເຂັ້ມງວດຂອງພັກ, ເປັນທີ່ເພິ່ງສຸດທ້າຍທາງດ້ານກົດໝາຍຂອງປະຊາຊົນ;

3. ເພີ່ມທະວີປັບປຸງການຈັດຕັ້ງຂອງສານປະຊາຊົນ ໃຫ້ມີຄວາມໜັກແໜ້ນ ເຂັ້ມແຂງ ໂດຍສະເພາະສານຂັ້ນຕົ້ນຕ້ອງມີຄວາມລະອຽດ, ຮອບຄອບໃນການດຳເນີນຄະດີ, ເກັບກຳຂໍ້ມູນຫຼັກຖານໃຫ້ມີຄວາມຄົບຖ້ວນ, ຮອບດ້ານ, ຊັດເຈນ ແລະ ພາວະວິໄສ ເພື່ອຮັບປະກັນໃຫ້ການຕັດ ສິນຄະດີມີຄວາມຖືກຕ້ອງ ແລະ ເປັນທຳ;

4. ເອົາໃຈໃສ່ບໍາລຸງ-ສ້າງຜູ້ພິພາກສາ, ພະນັກງານຂອງສານ ຖ້າຜູ້ພິພາກສາດີ-ເກັ່ງ ກໍຈະເຮັດໃຫ້ການຕັດສິນຄະດີມີຄວາມຖືກຕ້ອງ, ເປັນທໍາ; 5. ປັບປຸງກົນໄກ, ແບບແຜນການຄົ້ນຄວ້າ, ຕັດສິນ ແລະ ພິພາກສາຄະດີໃຫ້ມີຄວາມຮັດກຸມ, ໂປ່ງໄສ ແລະ ກວດກາໄດ້, ສ້າງເງື່ອນໄຂໃຫ້ທະນາຍຄວາມ, ໂຈດ ແລະ ຈໍາເລີຍ ເຂົ້າຮ່ວມໃນການດໍາເນີນຄະດີ, ເພີ່ມທະວີໃຫ້ໂຈດ-ຈໍາເລີຍ ໂຕ້ແຍ່ງ-ໂຕ້ຖຽງກ່ຽວກັບຂໍ້ມູນຫຼັກຖານທີ່ແຕ່ລະຝ່າຍຍື່ນຕໍ່ສານໃຫ້ລະອຽດ, ຄົບຖ້ວນ ແລະ ສິ້ນສຸດຂະບວນການໂຕ້ແຍ່ງຕາມກົດໝາຍ;

6. ຍົກສູງຄວາມຮັບຜິດຊອບຂອງຜູ້ພິພາກສາໃນການດໍາເນີນ, ຕັດສິນ ແລະ ພິພາກສາຄະດີ;

7. ເພີ່ມທະວີການຕິດຕາມກວດກາການປະຕິບັດໜ້າທີ່ຕັດສິນຄະດີຂອງຜູ້ພິພາກສາ ແລະ ພະນັກງານກົດໝາຍ ໃຫ້ເປັນປົກກະຕິດ້ວຍການ ປັບປຸງກົນໄກແບບແຜນວິທີເຮັດວຽກພາຍໃນການຈັດຕັ້ງຂອງສານແຕ່ລະຂັ້ນ ໂດຍການເປີດກວ້າງດ້ວຍການຕໍານິສົ່ງຂ່າວ, ຊ່ວຍເຫຼືອເຊິ່ງກັນແລະກັນ ເພື່ອຊອກໃຫ້ເຫັນຜູ້ທີ່ດີ ກໍຍ້ອງຍໍຊົມເຊີຍ ແລະ ສຶກສາອົບຮົມ, ກ່າວເຕືອນ ຫຼື ປະຕິບັດວິໄນຕໍ່ພະນັກງານທີ່ກະທໍາຜິດລະບຽບກົດໝາຍເປັນແຕ່ກໍລະນີ;

8. ເອົາໃຈໃສ່ປະສານສົມທົບກັບອົງການປົກປ້ອງກົດໝາຍ ແກ້ໄຂຄໍາຮ້ອງຂໍຄວາມ ເປັນທໍາຂອງປະຊາຊົນ ທີ່ຍັງຄ້າງຢູ່ສະພາ, ຢູ່ປະຕິບັດຄຳຕັດສິນ ຫຼື ພາກສ່ວນອື່ນໃຫ້ມີຜົນສຳເລັດ.