ທ່ານ ໂບລໂຊນາໂຣ ເດີນທາງກັບເບຣຊິນ ຫລັງເດີນທາງໄປປິ່ນປົວອາການບໍ່ສະບາຍຢູ່ອາເມລິກາ ຕິດຕາມການເມືອງເບຣຊິນອາດຮ້ອນຂຶ້ນອີກ

ທ່ານ ຍາອີ ໂບລໂຊນາໂຣ ອະດີດປະທານາທິບໍດີເບຣຊິນ ເດີນທາງກັບປະເທດແລ້ວ ຫລັງຈາກເສຍໄຊການເລືອກຕັ້ງປະທານາທິບໍດີໃນທ້າຍປີ 2022 ໃຫ້ທ່ານ ລູອິສ ອິນາຊິໂອ ລູລາ ດາ ຊິລວາ ປະທານາທິບໍດີເບຣຊິນຄົນປັດຈຸບັນ ໂດຍທ່ານ ໂບລໂຊນາໂຣ ໄດ້ເດີນທາງໄປປິ່ນປົວອາການບໍ່ສະບາຍຢູ່ອາເມລິກາ ກ່ອນທີ່ທ່ານ ດາ ຊິລວາ ຈະເຂົ້າພິທີສາບານຕົນຮັບຕໍາແໜ່ງຜູ້ນໍາເບຣຊິນຄົນໃໝ່ ໃນຕົ້ນປີ 2023 ຜ່ານມາ.

ການເດີນທາງກັບປະເທດຂອງອະດີດຜູ້ນໍາເບຣຊິນໃນຄັ້ງນີ້ ເຮັດໃຫ້ສະໜາມບິນນາໆຊາດໃນນະຄອນຫລວງບຣາຊິເລຍ ຂອງເບຣຊິນ ໜາແໜ້ນໄປດ້ວຍບັນດາກຸ່ມຜູ້ສະໜັບສະໜູນທ່ານ ໂບລໂຊນາໂຣ ຈໍານວນຫລາຍທີ່ມາຖ້າຕ້ອນຮັບການກັບປະເທດຂອງທ່ານໃນຮອບ 3 ເດືອນ.

ຕົ້ນປີ 2023 ບັນດາຜູ້ສະໜັບສະໜູນທ່ານ ໂບລໂຊນາໂຣ ໄດ້ບຸກເຂົ້າອາຄານໜ່ວຍງານຂອງລັດຫລາຍແຫ່ງ ທັງອາຄານທໍານຽບລັດຖະສະພາ ລວມທັງສານສູງສຸດ ເພື່ອສະແດງຄວາມບໍ່ພໍໃຈຜົນການເລືອກຕັ້ງທີ່ທ່ານ ໂບລໂຊນາໂຣ ເປັນຝ່າຍເສຍໄຊ ແລະ ຮຽກຮ້ອງໃຫ້ມີການກວດສອບຜົນການເລືອກຕັ້ງຄືນໃໝ່ ໂດຍທ່ານ ໂບລໂຊນາໂຣ ໄດ້ຖືກກ່າວຫາວ່າ: ເປັນຜູ້ປຸກລະດົມ ແລະ ຢູ່ເບື້ອງຫລັງເຫດການຄວາມບໍ່ສະຫງົບທາງການເມືອງໃນຄັ້ງນັ້ນ.

ອ້າງອີງ:

https://www.aljazeera.com/…/bolsonaro-lands-back-in-brazil

https://www.bbc.com/news/world-latin-america-65120313

https://www.reuters.com/…/bolsonaro-lands-back-brazil…/