ເມືອງໂພນໂຮງ ສຶກສາອົບຮົມປະຊາຊົນ 65 ຄົນ ທີ່ບຸກລຸກປ່າໄມ້-ທຳລາຍປ່າ ເຂດປ່າສະຫງວນແຫ່ງຊາດ ພູພະນັງ ບ້ານໂພນສົມບູນ

ວັນທີ 29 ມີນາ 2023 ຜ່ານມາ, ເມືອງໂພນໂຮງ ສຶກສາອົບຮົມປະຊາຊົນ ຜູ້ບຸກລຸກ ປ່າໄມ້-ທຳລາຍປ່າ ເຂດປ່າສະຫງວນແຫ່ງຊາດ ພູພະນັງ ເຂດບ້ານໂພນສົມບູນ, ໂດຍການເປັນປະທານ ຂອງທ່ານ ສົມປະສົງ ສຸວົງຄຳຈັນ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງໂພນໂຮງ, ມີ ທ່ານ ອົງອາດ ໄຊຍະແສນ ຫົວໜ້າກອງກວດກາປ່າໄມ້ແຂວງ, ມີຄະນະຮັບຜິດຊອບຂັ້ນແຂວງ, ເມືອງ ແລະ ຄອບຄົວເປົ້າໝາຍບ້ານໂພນສົມບູນເຂົ້າຮ່ວມ.

ທ່ານ ຫົງທອງ ວົງສຸກ ຫົວໜ້າຫ້ອງການກະສິກຳ-ປ່າໄມ້ເມືອງໄດ້ໃຫ້ຮູ້ຈຸດປະສົງການສຶກສາອົບຮົມຕໍ່ຜູ້ລະເມີດ ເຂດປ່າສະຫງວນໄດ້ກ່າວວ່າ: ເພື່ອເປັນການເຜີຍແຜ່ກົດໝາຍວ່າດ້ວຍປ່າໄມ້ ແລະ ຄວາມສຳຄັນຂອງປ່າໄມ້,ຊັບພະຍາກອນປ່າໄມ້ໃຫ້ພໍ່ແມ່ປະຊາຊົນໃຫ້ຮັບຮູ້ມີຄວາມເຂົ້າໃຈ ຕໍ່ລະບຽບກົດໝາຍໃນການປົກປັກຮັກສາປ່າໄມ້ແນໃສ່ເຮັດໃຫ້ຜູ້ລະເມີດໃຫ້ມີຄວາມຕື່ນຕົວ ຢຸດຕິການບຸກລຸກ ຕົ້ນໄມ້-ທຳລາຍປ່າໄມ້ເຂດປ່າສະຫງວນໃຫ້ຫລຸດໜ້ອຍຖອຍລົງ. ການສຶກສາອົບຮົມຄັ້ງນີ້ມີຜູ້ເຂົ້າຮ່ວມທັງໝົດ 65 ຄົນ ເຂດບ້ານໂພນສົມບູນ ຜູ້ຮັບການສຶກສາອົບຮົມຈະໄດ້ຮັບຟັງການເຜີຍແຜ່ເປັນຕົ້ນກົດໝາຍວ່າດ້ວຍປ່າໄມ້, ຄວາມສຳຄັນຂອງປ່າໄມ້ ແລະ ບາງມາດຕາກ່ຽວກັບກົດໝາຍແພ່ງ ແລະ ກົດໝາຍອາຍາກ່ຽວກັບປ່າໄມ້ ເພື່ອໃຫ້ຜູ້ໄດ້ຮັບການສຶກສາອົບຮົມໄດ້ຮັບຮູ້ມີຄວາມເຂົ້າໃຈ ແລະ ເປັນເຈົ້າການປະຕິບັດກົດໝາຍຢ່າງເຂັ້ມງວດ.