ປາກຽວ ຢືນຢັນເອງພ້ອມກັບສູ່ເສັ້ນທາງລ່າແຊ໊ມ ມວຍໂລກ ໃນໄວ 44 ປີ
ແມນນີ ປາກຽວ ຍອດນັກຊົກຊາວຟີລິບປິນ ອະດີດແຊ໊ມມວຍໂລກ 8 ພິກັດ ຮຸ່ນ ເວລເຕີເວດ ເປີດເຜີຍວ່າກຽມໄລ່ລ່າບັນລັງແຊ໊ມປຽນໂລກອີກຄັ້ງໃນໄວ 44 ປີ.
ປາກຽວ ເຊິ່ງປະກາດແຂວນນວມເພື່ອໄປລົງສະຫມັກຊີງຕຳແໜ່ງປະທານທິບໍດີຟີລິບປິນ ເຖິງຈະຜິດຫວັງ ແຕ່ກໍໄດ້ຄະແນນສຽງຢູ່ໃນອັນດັບ 3 ມີຂ່າວວ່າກັບມາຊົກມວຍອີກຄັ້ງກັບ ດີເຄ ຢູ ນັກສູ້ ເອັມເອັມເອ ຊາວ ສ.ເກົາຫລີ ກຽມຂຶ້ນສັງວຽນມວຍໂລກ ປະເດີມດ້ວຍນັດພິເສດທີ່ຍີ່ປຸ່ນ 29 ກໍລະກົດນີ້ ກ່ອນທີ່ຈະກັບມາຊົກເພື່ອໄລ່ລ່າແຊ໊ມໂລກຢ່າງເປັນທາງການໃນໄລຍະເດືອນຕຸລາ-ພະຈິກ ນີ້.
“ ຂ້ອຍຄິດເຖິງມວຍ ຂ້ອຍໂອເຄກັບການຊົກນັດພິເສດ ແຕ່ສຳລັບຂ້ອຍ ຂ້ອຍຕ້ອງການຈະເປັນແຊ໊ມໂລກອີກຄັ້ງ ມັນເປັນຄວາມຝັນສະເຫມີທີ່ຈະໄດ້ກັບມາຊົກມວຍອີກ ຕອນນີ້ຂ້ອຍສຸມໃສ່ການກຽມພ້ອມຮ່າງກາຍ ແລະ ການຝຶກຊ້ອມ ເຊິ່ງຂ້ອຍຍັງຮັກສາຄວາມໄວ ແລະ ພາລະກຳລັງຂອງຕົນເອງໄດ້ດີ ດ້ວຍອາຍຸຂອງຂ້ອຍຕອນນີ້ ຂ້ອຍຍັງເຄື່ອນໄຫວໄດ້ເຫມືອນຄົນອາຍຸ 20-30 ຄົງເປັນພອນຂອງພະເຈົ້າ ”.
ສຳລັບ ປາກຽວ ນັດສຸດທ້າຍເສຍໃຫ້ ຢໍດານິສ ອູກັສ ນັກຊົກຄິວບາ ແຊ໊ມໂລກຮຸ່ນ ຮຸ່ນເວລເຕີເວດ ສະມາຄົມມວຍໂລກ (WBA) ເມື່ອ ປີ 2021 ກ່ອນປະກາດແຂວນນວມເພື່ອຫລິ້ນການເມືອງ.
