ເອີຣົບ ຈະບໍ່ອະນຸຍາດໃຫ້ຈຳໜ່າຍລົດໃຊ້ນ້ຳມັນເຊື້ອໄຟ ນັບແຕ່ປີ 2035 ເປັນຕົ້ນໄປ

ປະເທດໃນສະຫະພາບເອີຣົບ (EU) ໄດ້ອະນຸມັດກົດໝາຍສໍາຄັນ ເຊິ່ງຈະສົ່ງຜົນໃຫ້ EU ຢຸດການຈໍາໜ່າຍລົດທີ່ປ່ອຍແກັສກາກບອນໃນປີ 2035 ຫລື ອີກ 12 ປີຕໍ່ໜ້າ.

ການອະນຸມັດຈາກບັນດາລັດຖະມົນຕີກະຊວງພະລັງງານຂອງ 27 ປະເທດໃນ EU ຄັ້ງນີ້ ຈະສົ່ງຜົນໃຫ້ນະໂຍບາຍການຮັບມືສະພາບໂລກປັ່ນປ່ວນສໍາລັບກຸ່ມລົດຍົນຈະມີຜົນບັງຄັບໃຊ້ທັນທີ ໂດຍກົດໝາຍສະບັບນີ້ຈະບັງຄັບໃຫ້ລົດໃໝ່ທຸກຄັນທີ່ຈະອອກສູ່ຕະຫລາດນັບແຕ່ປີ 2035 ເປັນຕົ້ນໄປ ຈະຕ້ອງບໍ່ປ່ອຍແກັສກາກບອນສູ່ຊັ້ນບັນຍາກາດໂລກ ແລະ ນັບແຕ່ປີ 2030 ລົດທຸກຄັນທີ່ຈໍາໜ່າຍຈະຕ້ອງປ່ອຍກາກບອນໜ້ອຍລົງ 55% ຈາກລະດັບຂອງປີ 2021.

ເຖິງຢ່າງໃດກໍຕາມ, ຄະນະກໍາມາທິການເອີຣົບໄດ້ໃຫ້ຄໍາໝັ້ນວ່າ ໃນອະນະຄົດຈະມີການກໍານົດແນວທາງປະຕິບັດກົດໝາຍສໍາລັບການຈໍາໜ່າຍລົດໃໝ່ທີ່ໃຊ້ເຊື້ອໄຟໄຟຟ້າ (E-fuels) ໃນຊ່ວງຫລັງປີ 2035 ຫລັງຈາກເຢຍລະມັນຮຽກຮ້ອງໃຫ້ມີການຍົກເວັ້ນຂໍ້ກໍານົດນີ້ ຈົນເຮັດໃຫ້ການອະນຸມັດກົດໝາຍຊັກຊ້າອອກໄປ.

ທັງນີ້, ບໍ່ແມ່ນທຸກປະເທດໃນ EU ຈະເຫັນພ້ອມຕໍ່ການລົງມະຕິດັ່ງກ່າວ ເພາະໂປໂລຍລົງມະຕິບໍ່ເຫັນພ້ອມ. ຂະນະທີ່ອິຕາລີ, ບຸນກາລີ ແລະ ໂຣມານີ ງົດອອກສຽງ ເນື່ອງຈາກປະເທດເຫລົ່ານີ້ກັງວົນວ່າກົດໝາຍນີ້ຈະເຮັດໃຫ້ຕົ້ນທຶນລົດເພີ່ມສູງຂຶ້ນຫລາຍກວ່າເກົ່າ. ຂະນະທີ່ອິຕາລີໄດ້ຊຸກຍູ້ໃຫ້ມີການຍົກເວັ້ນສໍາລັບລົດທີ່ໃຊ້ເຊື້ອໄຟຊີວະພາບ.

ການເຄື່ອນໄຫວດັ່ງກ່າວເປັນສ່ວນໜຶ່ງໃນຄວາມພະຍາຍາມຂອງ EU ທີ່ຈະຄວບຄຸມການປ່ອຍແກັສກາກບອນ ເຊິ່ງມີຜົນກະທົບຢ່າງໃຫຍ່ຫລວງຕໍ່ສະພາບໂລກປັ່ນປ່ວນ ຕະຫລອດຈົນຜົນກະທົບທີ່ຕາມມາອີກຈໍານວນຫລາຍ ເຊິ່ງເປັນອັນຕະລາຍຕໍ່ໂລກ ໂດຍຂະແໜງຂົນສົ່ງຂອງ EU ມີຍອດການປ່ອຍມົນລະພິດອັດຕາສູງເຖິງ 25% ຈາກຈໍານວນທັງໝົດ.

ອ້າງອີງ:

https://www.dw.com/…/eu-passes-law-to-ban…/a-65151688

https://www.reuters.com/…/eu-countries-poised-approve…/