ທີມຊາດລາວ U17 ຢູ່ຮ່ວມກຸ່ມ ເອ ຮ່ວມກັບ ໄທ ( ເຈົ້າພາບ ), ເຢເມນ ແລະ ມາເລເຊຍ ແຂ່ງຂັນບານເຕະຊີງແຊ໋ມອາຊີ 2023 U17ຮອບສຸດທ້າຍ

ວັນທີ 30 ມີນາ 2023 ຢູ່ທີ່ ນະຄອນຫຼວງບາງກອກ ປະເທດໄທ, ສະຫະພັນບານເຕະອາຊີ AFC ໄດ້ຈັບສະຫລາກແບ່ງສາຍການແຂ່ງຂັນບານເຕະຊີງແຊ໋ມອາຊີປະຈຳປີ 2023 ຮຸ່ນອາຍຸບໍ່ເກີນ 17 ປິ ຮອບສຸດທ້າຍ ຫຼື AFC U17 ASIAN CUP THAILAND 2023 Final ໂດຍ ປະເທດໄທ ໄດ້ຮັບກຽດເປັນເຈົ້າພາບ ໂດຍມີທັງຫມົດ 16 ທີມ ແບ່ງອອກເປັນ 4 ກຸ່ມ ຜົນການຈັບສະຫລາກມີດັ່ງນີ້:

– ກຸ່ມ A : ໄທ ( ເຈົ້າພາບ ), ເຢເມນ, ມາເລເຊຍ ແລະ ລາວ

– ກຸ່ມ B : ສ.ເກົາຫລີ, ອີຣານ, ອັຟການິສຖານ ແລະ ກາຕ້າ

– ກຸ່ມ C : ທາຈີກິສຖານ, ອົສຕຣາລີ, ຊາອຸດິ ອາຣັບເບຍ, ສປ ຈີນ,

– ກຸ່ມ D : ຍີ່ປຸ່ນ, ອິນເດຍ, ຫວຽດນາມ ແລະ ອຸເບກິສຖານ

ສຳລັບລາຍການດັ່ງກ່າວນີ້ແມ່ນຈະແຂ່ງຂັນ ລະຫວ່າງວັນທີ 15 ມິຖຸນາ ຫາ 2 ກໍລະກົດ

2023 ໂດຍແຂ່ງຂັນ 4 ສະຫນາມຄື: ສະຫນາມກິລາຣາຊະມັງກິລາສະຖານ, ສະຫນາມກິລາທຳມະສາດ, ສະຫນາມກິລາປະທຸມທານີ ແລະ ສະຫນາມກິລາຊົນບູຣີ, ອັນດັບ 1 – 4 ລາຍການນີ້ແມ່ນຈະໄດ້ສິດເຂົ້າຮ່ວມການແຂ່ງຂັນບານເຕະຊີງແຊ້ມໂລກ ຮຸ່ນອາຍຸບໍ່ເກີນ 17 ປີ FIFA U-17 WORLD CUP 2023

ຜົນງານຂອງທີມຊາດລາວ U17 ຮອບຄັດເລືອກ ສ້າງຜົນງານຜ່ານເຂົ້າຮອບ 16 ທີມສຸດທ້າຍ ການແຂ່ງຂັນບານເຕ ຊີງແຊ໋ມອາຊີປິ 2022 ຮອບຄັດເລືອກ ກຸ່ມ I ຫຼື “AFC U17 Asian Cup 2023 Qualifiers Group I” ທີ່ຈັດຂຶ້ນລະຫວ່າງ ວັນທີ 5-9 ຕຸລາ 2022 ທີ່ປະເທດກຽກກິດສະຖານ ລົງແຂ່ງຂັນ 3 ນັດ ໃນກຸ່ມ I ຮອບຄັດເລືອກ ໂດຍຜົນງານນັດທໍາອິດU17 ລາວ ເສຍໃຫ້ ທີມຊາດອີຣານ 0-3, ນັດທີ 2 ຊະນະ ເຂດປົກຄອງພິເສດຮົງກົງ 5-0 ແລະ ນັດສຸດທ້າຍ ຊະນະ ເຈົ້າພາບ ກຽກກິດສະຖານ 2-1 ລວມມີ 6 ຄະແນນ ໄດ້ອັນດັບສອງຂອງກຸ່ມ ແລະ ເປັນອັນດັບສອງທີ່ມີຄະແນນດີສຸດທີມທີ 6 ຈາກ 10 ກຸ່ມ ເຂົ້າຮອບສຸດທ້າຍ.

ປະຫວັດຜົນງານຂອງ ທີມຊາດລາວU17 ປີຜ່ານມາ ເຄີຍຜ່ານການຄັດເລືອກເຂົ້າແຂ່ງຂັນຮອບສຸດທ້າຍ 2 ຄັ້ງ ກໍຄື ໃນປີ 2004 ແລະ 2012.

ທີມຊາດລາວU17 ໄດ້ເລີ່ມເກັບຕົວຝຶກຊ້ອມມາຕັ້ງແຕ່ວັນທີ 06 ມີນາ2023 ເປັນຕົ້ນມາ ໂດຍແມ່ນທ່ານ ກັນລະຍາ ສີສົມຫວັງ ເປັນຫົວຫນ້າຄູຝຶກ ໂດຍໄດ້ຮຽກຕົວນັກກິລາເຍົາວະຊົນ ຈໍານວນ 35 ຄົນ, ໂດຍມີແຜນໄປເກັບຕົວຝຶກຊ້ອມຢູ່ທີ່ຕ່າງປະເທດ.

ສ່ວນຕາຕະລາງແຂ່ງຂັນ , ເວລາ ແລະ ສະຫນາມ ແມ່ນຈະແຈ້ງໃຫ້ຮັບຊາບຕາມພາຍຫລັງ.