ສະພາອາເມລິກາລົງມະຕິ ເພື່ອຍົກເລີກຄໍາສັ່ງອະນຸຍາດໃຊ້ກໍາລັງທະຫານໃນອີຣັກ ຫລັງສົງຄາມຜ່ານມາ 20 ປີ

ວຸດທິສະພາອາເມລິກາ ຫລື ສະພາສູງ ລົງມະຕິເພື່ອຍົກເລີກຄໍາສັ່ງອະນຸຍາດໃຫ້ມີການໃຊ້ກໍາລັງທາງທະຫານ (Authorizations for the Use of Military Force: AUMF) ໃນອີຣັກ ວັນທີ 29 ມີນາ ໃນໂອກາດຄົບຮອບ 20 ປີການບຸກອີຣັກຂອງກອງທັບອາເມລິກາ ຖືເປັນເຫດການສໍາຄັນຂອງຝ່າຍນິຕິບັນຍັດອາເມລິກາທີ່ເຄີຍກ່ຽວຂ້ອງກັບການອ້າງສິດໃຊ້ອໍານາດແຊກແຊງກິດຈະການທາງທະຫານໃນຕ່າງປະເທດ.

ທ່ານ ເຄວິນ ແມກຄາທີ ປະທານສະພາຜູ້ແທນລາສະດອນອາເມລິກາ ເປີດເຜີຍວ່າ: ປັດຈຸບັນຍັດຕິດັ່ງກ່າວຖືກສົ່ງຕໍ່ໃຫ້ສະພາຜູ້ແທນລາສະດອນອາເມລິກາເພື່ອລົງມະຕິ ເຊິ່ງຄາດວ່າຈະໄດ້ຮັບມະຕິເຫັນພ້ອມຈາກສະມາຊິກສະພາສັງກັດພັກເດໂມແຄຣດ ແລະ ພັກຣີພັບລິກັນໃນການຍົກເລີກຄໍາສັ່ງອະນຸຍາດດັ່ງກ່າວ.

ຂະນະທີ່ທໍານຽບຂາວອາເມລິກາ ຊີ້ວ່າ: ຖ້າສະພາສູງ ແລະ ສະພາຕໍ່າເຫັນພ້ອມໃຫ້ຍົກເລີກຄໍາສັ່ງອະນຸຍາດໃຫ້ມີການໃຊ້ກໍາລັງທາງທະຫານໃນປີ 1991 ແລະ ປີ 2002 ຈະເປັນການສະຫລຸບເຫດຄວາມຂັດແຍ່ງຢ່າງເປັນທາງການ ແລະ ເປັນການຢືນຢັນທາງສັນຍາລັກເຖິງຄວາມສາມາດຂອງສະພາຄອງເກຣດອາເມລິກາໃນການປະກາດສົງຄາມກັບປະເທດອື່ນ.

ທໍານຽບຂາວລະບຸວ່າ: ການຍົກເລີກຄໍາສັ່ງອະນຸຍາດດັ່ງກ່າວຈະບໍ່ສົ່ງຜົນກະທົບຕໍ່ປະຕິບັດການທາງທະຫານຂອງກອງທັບອາເມລິກາໃນປັດຈຸບັນ. ອີກທັງປະທານາທິບໍດີ ໂຈ ໄບເດນ ຍັງເນັ້ນຈະປະສານງານກັບສະພາຄອງເກຣດ ເພື່ອໃຫ້ແນ່ໃຈວ່າຄໍາສັ່ງອະນຸຍາດທີ່ຫລ້າສະໄໝນີ້ ຈະໄດ້ຮັບການແທນບ່ອນດ້ວຍການຮ່ວມມືສະເພາະເຈາະຈົງ ແລະ ມີຄວາມເໝາະສົມຫລາຍກວ່າໃນການປົກປ້ອງພົນລະເມືອງອາເມລິກາຈາກໄພຄຸກຄາມຂອງຜູ້ກໍ່ການຮ້າຍສະໄໝໃໝ່.

ອ້າງອີງ:

https://edition.cnn.com/…/senate-vote-aumf/index.html

https://www.cbsnews.com/…/iraq-war-aumf-senate-vote…/

https://www.npr.org/…/29/1165581083/aumf-iraq-war-senate