ຈະນຳໃຊ້ມາດຕະການເດັດຂາດຕໍ່ຜູ້ລະເມີດ ໃຊ້ນໍ້າສີໝາຍຈອງບ່ອນຂາຍເຄື່ອງ ໃນງານຕະຫລາດນັດແບບມວນຊົນ ນະຄອນຫລວງພະບາງ

ທ່ານ ສົມຫວັງ ພົມມະກອນ ຫົວໜ້າຫ້ອງການອຸດສາຫະກຳ ແລະ ການຄ້າ ນະຄອນ ຫຼວງພະບາງ ໄດ້ໃຫ້ສຳພາດວ່າ: ເພື່ອເຮັດໃຫ້ງານຕະຫຼາດນັດ ຫລື ງານໂລະລາດແບບມວນຊົນ ໃນໂອກາດບຸນປີໃໝ່ລາວໃນປີນີ້ ມີຄວາມເປັນລະບຽບຮຽບຮ້ອຍ ປະທານຈັດງານບຸນ ໄດ້ແຕ່ງຄະນະກຳມະການ ເພື່ອຈັດສັນ ແລະ ກວດກາຄວາມເປັນລະບຽບຮຽບຮ້ອຍ ຕາມລະບຽບການທີ່ທ່ານເຈົ້າແຂວງໄດ້ກຳນົດ ແນໃສ່ເຮັດໃຫ້ເຂດການຈັດງານໂລະລາດ ມີຄວາມຈົບງາມ ທັງອຳນວຍຄວາມສະດວກໃຫ້ກັບມວນຊົນທີ່ເຂົ້າໄປທ່ຽວຊົມ, ສຳລັບຜູ້ທີ່ລະເມີດຕໍ່ລະບຽບການ ໂດຍສະເພາະນຳໃຊ້ສີສະເປ, ນ້ຳສີ ແລະ ເຊືອກຟາງ ໝາຍຈຸດຂາຍເຄື່ອງ ຈະໄດ້ນຳໃຊ້ມາດຕະການສຶກສາອົບຮົມ ແລະປັບໃໝ ຕາມລະບຽບການ.

ນອກນັ້ນທ່ານຍັງໃຫ້ຮູ້ຕື່ມວ່າ: ສຳລັບບຸກຄົນ ຫລື ຫົວໜ່ວຍທຸລະກິດ ຫາກມີຈຸດປະສົງຕ້ອງການຂາຍເຄື່ອງ ຫລື ຕັ້ງສະຖານທີ່ໂຄສະນາສິນຄ້າ ພາຍໃນງານໂລະລາດ ຂໍໃຫ້ເຂົ້າໄປພົວພັນກັບຄະນະຮັບຜິດຊອບ ເພື່ອຈະໄດ້ຈັດສັນໃຫ້ມີຄວາມຖືກຕ້ອງ ແລະ ເໝາະສົມ.