ລາວ-ຫວຽດນາມ ຫາລືຮ່ວມກັນສະກັດກັ້ນ-ຕ້ານອາຊະຍາກໍາ ເພື່ອຮັກສາຄວາມເປັນລະບຽບຮຽບຮ້ອຍໃນສັງຄົມ

ວັນທີ 29 ມີນາ 2023 ທີ່ນະຄອນຫຼວງວຽງຈັນ ລາວ-ຫວຽດນາມ ຈັດກອງປະຊຸມຮ່ວມມືສະກັດກັ້ນ-ຕ້ານອາຊະຍາກໍາ ແລະ ຮັກສາຄວາມເປັນລະບຽບຮຽບຮ້ອຍໃນສັງຄົມ ລະຫວ່າງ ກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບ ສປປ ລາວ ແລະ ອົງການຕຳຫລວດ, ສືບສວນ-ສອບສວນ ກະຊວງປ້ອງກັນຄວາມສະຫງົບ ສສ ຫວຽດນາມ ຄັ້ງທີ XII ປີ 2023 ,ຝ່າຍລາວນໍາໂດຍ ທ່ານ ພົນຈັດຕະວາ ນິລະວົງ ເຈືອງຕະວະລາດ ຮອງຫົວໜ້າກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບ ແຫ່ງ ສປປ ລາວ, ຝ່າຍ ສສ ຫວຽດນາມ ນຳໂດຍ ພົນຕີ ໂດ້ ວັນ ແຮ່ວງ ຫົວໜ້າຫ້ອງການ, ຮອງຫົວໜ້າອົງການສືບສວນ-ສອບສວນ, ກະຊວງປ້ອງກັນຄວາມ ສະຫງົບ ແຫ່ງ ສສ ຫວຽດນາມ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.

ໃນກອງປະຊຸມ, ຄະນະຜູ້ແທນທັງສອງຝ່າຍ ລາວ-ຫວຽດນາມ ໄດ້ປຶກສາຫາລື ແລະ ແລກປ່ຽນບົດຮຽນເຊິ່ງກັນແລະກັນ ຢ່າງກົງໄປກົງມາ ເພື່ອຊອກຫາວິທີທາງແກ້ໄຂບັນຫາອາຊະຍາກໍາປະເພດຕ່າງໆ ທີ່ພົວພັນເຖິງ ສອງຊາດ ລາວ ແລະ ຫວຽດນາມ. ສະນັ້ນ, ການຈັດກອງປະຊຸມຄັ້ງນີ້, ຈຶ່ງໄດ້ແບ່ງອອກເປັນ 2 ລະດັບຄື: ກອງປະຊຸມຂອງກອງເລຂາເພື່ອກະກຽມໃຫ້ແກ່ກອງປະຊຸມວ່າດ້ວຍການຮ່ວມມືສະກັດກັ້ນ-ຕ້ານອາຊະຍາກໍາ ແລະ ຮັກສາຄວາມເປັນລະບຽບຮຽບຮ້ອຍໃນສັງຄົມ ລະຫວ່າງ ສອງກໍາລັງຕຳຫຼວດ ຄັ້ງທີ XII ແລະ ກອງປະຊຸມຄົບຄະນະວ່າດ້ວຍການຮ່ວມມືສະກັດກັ້ນ-ຕ້ານອາຊະຍາກໍາ ແລະ ຮັກສາຄວາມເປັນລະບຽບຮຽບຮ້ອຍໃນສັງຄົມ ລະຫວ່າງ ສອງກຳລັງຕຳຫລວດ ຄັ້ງທີ XII. ພ້ອມນັ້ນ, ກໍໄດ້ສຸມໃສ່ປຶກສາຫາລື, ແລກປ່ຽນສະພາບ ແລະ ຜົນການຈັດຕັ້ງປະຕິບັດບົດບັນທຶກຂອງກອງຊຸມຄັ້ງທີ່ຜ່ານມາ ແລະ ຄົ້ນຄວ້າທິດທາງການຮ່ວມມືໃນການແກ້ໄຂບັນຫາອາຊະຍາກຳປະເພດຕ່າງໆ ຮ່ວມກັນໃນຕໍ່ໜ້າເປັນຕົ້ນແມ່ນ: ການຮ່ວມມືແລກປ່ຽນຂໍ້ມູນຂ່າວສານໃນຂອບເຂດວຽກງານຕໍາຫຼວດ, ບັນຫາການລັກລອບຄ້າຂາຍຢາເສບຕິດ, ການຄ້າມະນຸດ, ການກະທຳຜິດທາງດ້ານເສດຖະກິດ, ການສືບສວນ-ສອບສວນຄະດີອາຍາ, ການນຳຈັບເປົ້າໝາຍກະທໍາຜິດຢູ່ປະເທດໜຶ່ງແລ້ວໂຕນໜີໄປລີ້ຊ້ອນຢູ່ອີກປະເທດໜຶ່ງ ແລະ ບັນຫາອື່ນໆ, ທັງເປັນການເສີມສ້າງສາຍສໍາພັນມິດຕະພາບ ແລະ ການຮ່ວມມືກັບປະເທດເພື່ອນມິດ, ເປັນການປະກອບສ່ວນເຂົ້າໃນພາລະກິດປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍທາງສັງຄົມຂອງສອງປະເທດໃຫ້ນັບມື້ດີຂື້ນ ໂດຍສະເພາະແມ່ນການສະກັດກັ້ນ ແລະ ແກ້ໄຂບັນຫາອາຊະຍາກໍາປະເພດຕ່າງໆໃຫ້ມີປະສິດທິຜົນທີ່ດີ.

ຈາກນັ້ນ, ໃນກອງປະຊຸມ, ກໍຍັງໄດ້ຮ່ວມລົງນາມເຊັນບົດບັນທຶກກອງປະຊຸມວ່າດ້ວຍການຮ່ວມມື ສະກັດກັ້ນ-ຕ້ານອາຊະຍາກໍາ ແລະ ຮັກສາຄວາມເປັນລະບຽບຮຽບຮ້ອຍໃນສັງຄົມ ລະຫວ່າງ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ສປປ ລາວ ແລະ ກຳລັງຕໍາຫຼວດ ກະຊວງປ້ອງກັນຄວາມສະຫງົບ ສສ ຫວຽດນາມ ຄັ້ງທີ XII.