ອາເຊນອລ ໝັ້ນໃຈລະດູຮ້ອນນີ້ສາມາດ ເອົາຊະນະຄູ່ແຂ່ງທີມໃຫຍ່ໃນພຣີເມຍລີກ ຄວ້າໂຕ ດີແຄນ ໄຣລ ຮ່ວມທີມແນ່ນອນ

ອາເຊນອລ ຜູ້ນຳອັນດັບໜຶ່ງຂອງ ພຣີເມຍລີກອັງກິດ ຍັງຄົງໝັ້ນໃຈວ່າ ພວກເຂົາສາມາດເອົາຊະນະຄູ່ແຂ່ງໄດ້ ໃນການເຊັນສັນຍາກັບ ດີແຄນ ໄຣລ ກອງກາງຂອງ ເວັສແຮມ ຢູໄນເຕັດ ມາຮ່ວມທີມໃນລະດູຮ້ອນນີ້ໄດ້.

ຫົວໜ້າຂອງທີມ “ເວັສແຮມ ຢູໄນເຕັດ” ເຮັດຜົນງານໄດ້ດີສະເໝີກັບຕົ້ນສັງກັດ. ເຮັດໃຫ້ລາວໄດ້ຮັບຄວາມສົນໃຈຈາກຫລາຍສະໂມສອນໃນພຣີເມຍລີກອັງກິດ, ລວມທັງ “ສິງໂຕນ້ຳເງິນຄາມ” ເຊວຊີ ແລະ “ຜີສາດແດງ” ແມນເຊັສເຕີ ຢູໄນເຕັດ.

ຂະນະທີ່ ອາເຊນອລ ສະແດງອອກມາຢ່າງຈະແຈ້ງສະເໝີວ່າພວກເຂົາຕ້ອງການໃຫ້ ໄຣລ ມາຮັບໜ້າທີ່ຄຸມແດນກາງໃຫ້ກັບສະໂມສອນ. ແລະ ລັອກເປົ້າໄວ້ຕັ້ງແຕ່ຕະຫລາດນັກເຕະຮອບທີ 2 ໃນເດືອນມັງກອນຜ່ານມານີ້ ແຕ່ຖືກປະຕິເສດໂດຍສິ້ນເຊີງ.

ສໍາລັບປັດຈຸບັນຄະນະບໍລິຫານ “ປືນໃຫຍ່” ພ້ອມທີ່ຈະສະໜັບສະໜູນ ໄມເຄິລ ອາເຕຕ້າ ຜູ້ຈັດການທີມໃນຊ່ວງຕະຫລາດຊື້-ຂາຍໃນຊ່ວງຊຳເມີ້ນີ້ ໂດຍຫວັງພັດທະນາທີມໃຫ້ເຂັ້ມແຂງຂຶ້ນກວ່າເກົ່າ. ແລະ ສາມາດຕໍ່ສູ້ກັບຄູ່ແຂ່ງໃນ UEFA Champions League ໃນລະດູການຕໍ່ໄປເຊັ່ນດຽວກັນ.