ເຈົ້າຄອງນະຄອນຫລວງເນັ້ນ ຕ້ອງເລັ່ງຈັດສັນສາຍສື່ສານຕ່າງໆ ໃຫ້ເປັນລະບຽບຮຽບຮ້ອຍ ເລີ່ມເມສາ 2023 ເປັນຕົ້ນໄປ

ໜັງສືພິມວຽງຈັນໃໝ່ລາຍງານວ່າ: ວັນທີ 29 ມີນາ 2023 ນີ້ ນະຄອນຫລວງວຽງຈັນ ຈັດກອງປະຊຸມປຶກສາຫາລືກ່ຽວກັບການຈັດສັນຄວາມເປັນລະບຽບຮຽບຮ້ອຍຂອງຊຸມສາຍຕ່າງໆ  ໂດຍການເປັນປະທານຂອງ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ

ນະຄອນຫລວງວຽງຈັນປະຕິບັດການຈັດສັນຄວາມເປັນລະບຽບຮຽບຮ້ອຍຂອງຊຸມສາຍຕ່າງໆທົ່ວ ນວ ໃນໄລຍະຜ່ານມາຕາມຄໍາສັ່ງຂອງເຈົ້າຄອງ ນວ ສະບັບເລກທີ 03/ຈນວ ໂດຍສະເພາະຄວາມເປັນລະບຽບຮຽບຮ້ອຍຊຸມສາຍໄຟຟ້າ ສາຍໂທລະຄົມມະນາຄົມທີ່ ເກາະຫ້ອຍນໍາເສົາໄຟຟ້າຢູ່ ນວ ພ້ອມນັ້ນຍັງໄດ້ຮັບຟັງການປະກອບຄໍາ ຄິດເຫັນຈາກບັນດາກະຊວງ ລັດວິສາຫະກິດໄຟຟ້າລາວ ແລະ ບັນດາບໍລິສັດ ໂທລະຄົມມນາຄົມທີ່ເຂົ້າຮ່ວມຄັ້ງນີ້ ເພື່ອເປັນການປຶກສາຫາລື ແລກປ່ຽນ ຄໍາຄິດເຫັນໃຫ້ມີຄວາມເປັນເອກະພາບ ພ້ອມທັງຊອກຫາວິທີແກ້ໄຂໃນ ການຈັດຕັ້ງປະຕິບັດຕົວຈິງ.

ທ່ານເຈົ້າຄອງນະຄອນຫຼວງວຽງຈັນ ໄດ້ມີຄໍາເຫັນເພື່ອ ເປັນທິດທາງໃຫ້ແກ່ການປັບປຸງ ແລະ ແກ້ໄຂໃນຕໍ່ໜ້າ ເຊິ່ງເນັ້ນຕື່ມບາງ ບັນຫາ ໂດຍມອບໃຫ້ບັນດາບໍລິສັດໂທລະຄົມມະນາຄົມ ແລະ ພາກສ່ວນທີ່ມີສາຍໂທລະຄົມມະນາ ຄົມໃຫ້ພ້ອມກັບຮີບຮ້ອນປັບປຸງ ແລະ ແກ້ໄຂຕັ້ງແຕ່ເດືອນເມສາ 2023 ເປັນຕົ້ນໄປ ມອບໃຫ້ພາກສ່ວນຄຸ້ມຄອງລະບົບ ໄຟຟ້າພາກກາງ ຮີບຮ້ອນອອກລະບຽບການ ກ່ຽວກັບການຈັດສັນສາຍໄຟ ເກາະຫ້ອຍ ທີ່ບໍ່ເປັນລະບຽບ ຄວນມີມາດຕະການເຂັ້ມງວດຕໍ່ຜູ້ທີລະເມີດ

ພ້ອມນັ້ນບັນດາບໍລິສັດໂທລະຄົມມະນາຄົມ ແລະ ບໍລິສັດ ສົມທົບກັບພາກ ສ່ວນທີກ່ຽວຂ້ອງ ຮີບຮ້ອນເກັບກູ້ສາຍໄຟທີ່ບໍ່ໄດ້ນໍາໃຊ້ໃຫ້ເອົາອອກຈາກເສົາໄຟຟ້າ ທີ່ໄດ້ກໍານົດໃນນິຕິກໍາແລ້ວມອບໃຫ້ພະແນກເຕັກໂນໂລຊີ ແລະ ການສື່ສານ ເປັນເຈົ້າການຕິດຕາມກວດກາບໍລິສັດໃດບໍ່ປະຕິບັດຕາມນິຕິກໍາແມ່ນໃຫ້ລາຍງານຕໍ່ຂັ້ນເທິງຮີບດ່ວນມອບໃຫ້ພະແນກພະລັງງານ ແລະ ບໍ່ແຮ່ ເປັນເຈົ້າການຕິດຕາມກວດກາການເກັບກູ ຮື້ຖອນສາຍໄຟຟ້າ ພ້ອມທັງກວດກາການຕິດຕັ້ງສາຍໄຟ ເພື່ອຫຼີກລ້ຽງການຮົ່ວຊຶມຂອງໄຟຟ້າ ທີ່ຈະເປັນອັນຕະລາຍເຖິງແກ່ຊີວີດຂອງບຸກຄົນ ສະເພາະ ແຫຼ່ງທຶນທີ່ຈະນໍາໃຊ້ເຂົ້າໃນການເກັບກູ້ສາຍໄຟໃຫ້ປະຕິບັດຕາມ ຄໍາສັ່ງ ສະບັບເລກທີ 03/ຈນວ.