ຫວຽດນາມກຽມອະນຸຍາດ “ວີຊ່າອອນລາຍ” ໃຫ້ຕ່າງປະເທດອາໄສຢູ່ສູງສຸດ 3 ເດືອນ
ຄະນະລັດຖະບານຫວຽດນາມມີມະຕິອະນຸມັດການອອກວີຊ່າອາເລັກໂຕຣນິກ ຫລື E-Visa ຄວບຄຸມໄລຍະເວລາສູງສຸດ 3 ເດືອນ ສໍາລັບນັກທ່ອງທ່ຽວທີ່ອາໄສຢູ່ໄລຍະຍາວ. ຂະນະດຽວກັນ ລັດຖະບານກຽມຫລຸດຜ່ອນກົດລະບຽບດ້ານການເດີນທາງ ເພື່ອຊ່ວຍສະໜັບສະໜູນປັດໄຈການຂັບເຄື່ອນການເຕີບໃຫຍ່ທາງເສດຖະກິດ.
ວັນທີ 29 ມີນາ, ທ່ານ ຟາມ ມິງ ຈິງ ນາຍົກລັດຖະມົນຕີຫວຽດນາມ ກ່າວວ່າ: ເຫດຜົນສໍາລັບການອອກວີຊາເອເລັກໂຕຣນິກສໍາລັບການເດີນທາງເຂົ້າ-ອອກປະເທດຄັ້ງດຽວ ຫລື ຫລາຍຄັ້ງ ເພື່ອໃຫ້ “ພົນລະເມືອງຈາກທຸກດິນແດນ ແລະ ປະເທດ” ສາມາດອາໄສຢູ່ຫວຽດນາມໄດ້ສູງສຸດ 3 ເດືອນ ຈາກສູງສຸດ 30 ວັນ ໃນປັດຈຸບັນ.
ນອກຈາກນີ້, ລັດຖະບານຍັງອະນຸມັດການຂະຫຍາຍໄລຍະເວລາອາໄສຊົ່ວຄາວໂດຍບໍ່ຕ້ອງຖືວີຊ່າ ເປັນໄລຍະເວລາ 45 ວັນ ຈາກ 15 ວັນ ໃຫ້ພົນລະເມືອງຈາກປະເທດທີ່ໄດ້ຮັບການຍົກເວັ້ນ ຂໍ້ກໍານົດຂໍວີຊ່າພຽງຝ່າຍດຽວ.
ກ່ອນໜ້ານີ້, ຫວຽດນາມໄດ້ຍົກເວັ້ນຂໍ້ກໍານົດການຂໍວີ່ຊາໃຫ້ນັກທ່ອງທ່ຽວຈາກ 25 ປະເທດ ແລະ ຍັງອອກວີຊ່າເອເລັກໂຕຣນິກ ປະເພດເດີນທາງເຂົ້າ-ອອກຄັ້ງດຽວເປັນເວລາ 1 ເດືອນ ໃຫ້ແກ່ນັກທ່ອງທ່ຽວຈາກ 80 ປະເທດ ແລະ ພາກພື້ນ.
ທັງນີ້, ຫວຽດນາມຕັ້ງເປົ້າຕ້ອນຮັບນັກທ່ອງທ່ຽວຕ່າງປະເທດ 8 ລ້ານຄົນໃນປີນີ້, ພ້ອມຄາດຄະເນລາຍໄດ້ຈາກການທ່ອງທ່ຽວຈະສູງເຖິງ 27.300 ລ້ານໂດລາສະຫະລັດ ເພີ່ມຂຶ້ນ 31% ຈາກປີຜ່ານມາ.
