ຊີ້ແຈ້ງ ການຕັດຊຸດຄູ 490.000 ກີບ ບໍ່ແມ່ນການບັງຄັບ ແຕ່ເພື່ອໃຫ້ການນຸ່ງຖືເປັນລະບຽບ ແລະ ເປັນແບບຢ່າງ

ຕໍ່ກັບກໍລະນີ ການຕັດເຄື່ອງແບບຄູ ຢູ່ເມືອງທ່າແຂກ ແຂວງຄໍາມ່ວນ ໃນທ້າຍເດືອນກຸມພາ 2023 ຜ່ານມາ ສົ່ງຜົນກະທົບໂດຍກົງຕໍ່ຫ້ອງການສຶກສາທິການ ແລະ ກິລາເມືອງທ່າແຂກ ລວມທັງພະແນກສຶກສາທິການ ແລະ ກິລາແຂວງຄຳມ່ວນ ແລະ ບໍລິສັດຜູ້ຮັບຕັດເຄື່ອງແບບຄູໃຫ້ແຂວງຄຳມ່ວນ ຍ້ອນບໍ່ຮູ້ລາຍລະອຽດ ແລະ ຄວາມເປັນຄວາມຈິງ, ບາງຄວາມຄິດເຫັນກໍໃສ່ຮ້າຍວ່າ ມີສ່ວນໄດ້ນໍາໂຮງງານຕັດຫຍິບ, ເຄື່ອງຕັດມາກໍນຸ່ງບໍ່ໄດ້, ຄຸນນະພາບແພບໍ່ດີ ແລະ ຕ່າງໆນານາ.

ຫລ້າສຸດ ທ່ານ ບ່ຽງຕາ ພະບໍລິບູນ ຫົວໜ້າຫ້ອງການສຶກສາທິການ ແລະ ກິລາເມືອງທ່າແຂກ ໄດ້ໃຫ້ສຳພາດ ວ່າ: ຂ້າພະເຈົ້າ ຫຼື ການຈັດຕັ້ງ ບໍ່ໄດ້ມີສ່ວນໄດ້ກັບໂຮງງານຕັດຫຍິບ ແຕ່ຢ່າງໃດຊຶ່ງກະແສວ່າມີສ່ວນແບ່ງ ຫຼື ຄ່ານາຍໜ້ານັ້ນ ບໍ່ແມ່ນຄວາມຈິງ, ມັນເປັນການໃສ່ຮ້າຍປ້າຍສີ ເຮັດໃຫ້ເກີດມີຄວາມເຂົ້າໃຈຜິດ ແລະ ສ້າງຄວາມເສຍຫາຍ ຕໍ່ການຈັດຕັ້ງພັກ-ລັດ ກໍຄືພາກສ່ວນກ່ຽວຂ້ອງ. ກ່ອນພະແນກສຶກສາທິການ ແລະ ກິລາແຂວງຄໍາມ່ວນ ຈະອອກແຈ້ງການ ເລກທີ 025/ສກຂ, ລົງວັນທີ 25/1/2023 ແມ່ນໄດ້ມີການປຶກສາຫາລືກັນກັບພາກສ່ວນກ່ຽວຂ້ອງ ທັງເລື່ອງຄຸນນະພາບແພ, ລາຄາ ແລະ ເງື່ອນໄຂການຊຳລະ ເຫັນວ່າສົມເຫດສົມຜົນ ຖ້າທຽບໃສ່ປັດຈຸບັນ ຊຶ່ງເປັນການຈູນເຈືອ ຫຼື ຊ່ວຍເຫຼືອຄູຢູ່ເຂດຫ່າງໄກສອກຫຼີກ. ຈາກນັ້ນ, ຫ້ອງການສຶກສາທິການ ແລະ ກິລາເມືອງທ່າແຂກ ກໍໄດ້ຜັນຂະຫຍາຍ ໂດຍຖືເອົາການປະຊຸມປະຈໍາເດືອນ ແຈ້ງໃຫ້ຜູ້ອຳນວຍການໂຮງຮຽນແຕ່ລະແຫ່ງ ມາປຶກສາຫາລື, ປະກອບຄໍາເຫັນ ໃສ່ດ້ານຕ່າງໆແລ້ວ ຊຶ່ງກໍພາກັນເຫັນດີ ແລະ ກໍໄດ້ອອກແຈ້ງການເລກທີ 238/ສກມ, ລົງວັນທີ 21/2/2023. ພາຍຫຼັງແຈ້ງການອອກໄປ, ມີບາງຈໍານວນຢູ່ເມືອງທ່າແຂກ ທີ່ຍັງບໍ່ເຂົ້າໃຈ ຊຶ່ງໄດ້ເກີດເປັນກະແສຄືດັ່ງເປັນຂ່າວໃນສື່ສັງຄົມອອນລາຍ.

ພາຍຫຼັງມີຫາງສຽງ, ຫ້ອງການສຶກສາທິການ ແລະ ກິລາເມືອງທ່າແຂກ ກໍໄດ້ຊີ້ແຈງວ່າການກໍານົດເຮັດລວມແບບນີ້ ຈຸດດີກໍແມ່ນເປັນການຕິດຕາມງ່າຍ ຍ້ອນບຸກຄະລາກອນມີຈໍານວນຫຼາຍ ແລະ ກໍໄດ້ມີການປະຊຸມຕື່ມ ເພື່ອເນັ້ນໃຫ້ຜູ້ອຳນວຍການໂຮງຮຽນແຕ່ລະແຫ່ງ ໄດ້ຊີ້ແຈງອະທິບາຍຕື່ມອີກ ໃຫ້ກັບຜູ້ທີ່ຍັງບໍ່ເຂົ້າໃຈໄດ້ຮັບຮູ້ ແລະ ເຂົ້າໃຈຖືກຕ້ອງ ເພື່ອຄວາມເຂົ້າໃຈເປັນເອກະພາບ. ພ້ອມນີ້, ກໍໄດ້ເຮັດບົດລາຍງານ ເລກທີ 282, ລົງວັນທີ 10/3/2023 ເພື່ອລາຍງານການນໍາພັກ-ລັດຂັ້ນເທິງ ມີເນື້ອໃນສຳຄັນໃຫ້ຮູ້ວ່າ: ສະພາບຄວາມເປັນຈິງໃນການນຸ່ງຖືເຄື່ອງແບບຂອງພະນັກງານ ຍັງມີສະພາບນຸ່ງຖືບໍ່ໄດ້ຕາມຂໍ້ກໍານົດ, ນຸ່ງຖືຍັງບໍ່ເຂົ້າລະບຽບ, ບໍ່ເປັນແບບຢ່າງໃຫ້ແກ່ສັງຄົມເທົ່າທີ່ຄວນ. ຜ່ານມາ, ກໍໄດ້ນໍາພາພະນັກງານຄູ-ອາຈານ ປະຕິບັດລະບຽບການນຸ່ງຖືຕາມຂໍ້ກຳນົດກົດລະບຽບ ແລະ ຈັນຍາບັນຂອງຄູ ທີ່ຂັ້ນເທິງກຳນົດອອກ ພະນັກງານບໍລິຫານຢູ່ຫ້ອງການ ນຸ່ງເຄື່ອງແບບ ວັນຈັນ ຫາ ວັນພຸດ, ສ່ວນຄູສອນ ນຸ່ງເຄື່ອງແບບວັນຈັນ ຫາ ວັນສຸກ, ແຕ່ເຫັນວ່າຄູບາງຄົນ, ບາງເຂດ, ບາງກຸ່ມບ້ານ ຍັງຖືເບົາ ຊຶ່ງການຈັດຕັ້ງລົງເຄື່ອນໄຫວ ຍັງພົບເຫັນການນຸ່ງຖືບໍ່ຖືກລະບຽບ, ຍັງບໍ່ເປັນແບບຢ່າງໃຫ້ແກ່ນັກຮຽນ. ຂະນະດຽວກັນ, ຄູ-ອານຈານ ທີ່ຢູ່ຫ່າງໄກສອກຫຼີກ ກໍບໍ່ມີຄວາມສະດວກຕັດເຄື່ອງ, ເຄື່ອງແບບນຸ່ງທຸກມື້ ກໍຍັງມີຈໍາກັດ…. ກ່ອນ ໜ້ານີ້ ກໍໄດ້ແນະນໍາໃຫ້ໄປຕັດເອງ ແຕ່ກໍໄປຕັດມາບໍ່ຖືກກັບແບບ ກໍຄື ລະບຽບການທີ່ກຳນົດ, ຕັດຕາມໃຈມັກທີ່ຂັດກັບລະບຽບຫຼັກການທີ່ວາງອອກ. ເມື່ອເປັນເຊັ່ນນັ້ນ, ຈຶ່ງສົມທົບຄົ້ນຄວ້າກັບສາຍຕັ້ງເຫັນວ່າ ມີຄວາມເໝາະສົມ ຊຶ່ງໄດ້ມີລັກສະນະຈຸນເຈືອກັນ ລະຫວ່າງໃນຕົວເມືອງ ແລະ ຊົນນະບົົດ ລາຄາສົມເຫດສົມຜົນ ຄື 490.000 ກີບຕໍ່ຊຸດ ເປັນລາຄາດຽວກັນກັບຄູຢູ່ຫ່າງໄກສອກຫຼີກທີ່ມາຕັດບໍ່ໄດ້ (ຖ້າລວມຄ່າລົດບວກກັບຄ່າທີ່ພັກ ມາຕັດເຄື່ອງກໍກາຍແລ້ວ) ຊຶ່ງໂຮງງານຕັດຫຍິບ ຈະໄປບໍລິການໃຫ້ທຸກຄົນ ໄປວັດ ແທກ, ເມື່ອເວລາຕັດເຄື່ອງສຳເລັດແລ້ວ ກໍໄປສົ່ງຮອດສະຖານທີ່ ແລະ ປັບປຸງແກ້ໄຂຕາມສະຣິລະຮ່າງກາຍ. ການຕັດແມ່ນຕັດຕາມແບບ ຕາມຕໍາແໜ່ງ, ຕາມຊັ້ນ (ບໍ່ໄດ້ຕັດຕາມໃຊ້) ໂດຍໃຊ້ແພກາກີ ເບີ 333. ສ່ວນການຈ່າຍຊຳລະ ແມ່ນແບ່ງເປັນ 3 ງວດ ໂດຍຫ້ອງການສຶກສາທິການ ແລະ ກິລາເມືອງເປັນຜູ້ລວບລວມ. ປັດຈຸບັນ, ກໍໄດ້ມີຄວາມເຂົ້າໃຈເປັນເອກະພາບກັນ ແລະ ກໍພາກັນເຫັນດີແລ້ວ.

ຂະນະດຽວກັນ, ທ່ານ ນາງ ສົມດີ ເພັງເມືອງຄູນ ເຈົ້າຂອງໂຮງງານຕັດຫຍິບ ສົມດີ ທີ່ຮັບຕັດເຄື່ອງແບບຄູໃຫ້ແຂວງຄຳມ່ວນ ໄດ້ໃຫ້ສໍາພາດເມື່ອບໍ່ດົນຜ່ານມາວ່າ: ສໍາລັບເລື່ອງທີ່ມີສື່ສັງຄົມອອນລາຍ ໄດ້ໂພສ ໃສ່ຮ້າຍວ່າໂຮງງານຕັດຫຍິບ ສົມດີ ໄດ້ມີສ່ວນແບ່ງ ເພື່ອໃຫ້ໄດ້ຮັບຕັດຊຸດເຄື່ອງແບບຄູ ໃຫ້ແຂວງຄໍາມ່ວນ ບໍ່ເປັນຄວາມຈິງ, ຂ້າພະເຈົ້າ ບໍ່ໄດ້ຊື້ຈ້າງຈອບອອຍ ເພື່ອໃຫ້ມີການບັງຄັບໃຫ້ຕັດເຄື່ອງນໍາແຕ່ຢ່າງໃດ. ນີ້ເປັນການໃສ່ຮ້າຍປ້າຍສີ ທີ່ກໍ່ໃຫ້ເກີດຄວາມເສຍຫາຍຕໍ່ໂຮງງານຂອງຂ້າພະເຈົ້າ ໂດຍສະເພາະເລື່ອງ ລາຄາທີ່ວ່າແພງ ຊຶ່ງທາງພວກເຮົາກໍໄດ້ລົງສໍາຫຼວດລາຄາຕາມທ້ອງຕະຫຼາດເມືອງທ່າແຂກ ກໍມີລາຄາແພງກວ່າ ທີ່ໂຮງງານຂອງພວກເຮົາຈະຕັດໃຫ້. ສ່ວນເລື່ອງ ແພເຄື່ອງບໍ່ມີຄຸນນະພາບນັ້ນ, ຄວາມເປັນຈິງແລ້ວໂຮງງານຂ້າພະເຈົ້າ ເຄີຍຕັດເຄື່ອງແບບຄູໃຫ້ຫຼາຍແຂວງໃນທົ່ວປະເທດ ແລະ ແຂວງຄໍາມ່ວນ ກໍເປັນແຂວງໜຶ່ງ ຊຶ່ງໄດ້ຕັດໃຫ້ໃນສົກປີ 2018-2019. ຜ່ານມາ ກໍບໍ່ມີຫາງສຽງຈົ່ມວ່າດ້ານຄຸນນະພາບ ແລະ ບໍ່ມີບັນຫາຫຍັງເກີດຂຶ້ນ. ຊຸດທີ່ໂພສໃນຂ່າວນັ້ນ, ບໍ່ແມ່ນຊຸດທີ່ໂຮງງານເຮົາຕັດ ຊຶ່ງການປະຕິບັດຕາມແຈ້ງການໃນປັດຈຸບັນ ໂຮງງານຕັດຫຍິບຂອງພວກເຮົາ ຍັງບໍ່ໄດ້ເຄື່ອນໄຫວລົງວັດແທກ ແລະ ຕັດຫຍິບເຄື່ອງສົ່ງໃຫ້ໂຮງຮຽນໃດຂອງເມືອງທ່າແຂກ, ແລ້ວຊຸດເຄື່ອງແບບທີ່ລົງໂພສໃນຂ່າວນັ້ນບໍ່ແມ່ນຕັດຈາກໂຮງງານພວກເຮົາ. ສິ່ງທີ່ໄດ້ເປັນປະເດັນຮ້ອນ ກໍໃຫ້ເກີດມີຫາງສຽງສັງຄົມ ທີ່ເປັນຜົນເສຍ ບໍ່ສະເພາະແຕ່ຄວາມເຊື່ອໝັ້ນຕໍ່ການຈັດຕັ້ງພັກ-ລັດ ກໍຄື ຂະແໜງສຶກສາຢູ່ແຂວງຄໍາມ່ວນ ແຕ່ຍັງໄດ້ສ້າງຜົນເສຍຫາຍຕໍ່ ໂຮງງານຂອງຂ້າພະເຈົ້າ ເຮັດໃຫ້ລູກຄ້າເກີດຄວາມເຂົ້າໃຈຜິດ, ບາງລາຍການສັ່ງຕັດເຄື່ອງກໍຖືກໂຈະ ຫຼື ເລື່ອນອອກໄປ ແລະ ບໍ່ໄດ້ຮັບລາຍການສັ່ງຕັດເຄື່ອງຈາກລູກຄ້າອື່ນໆ.

ຕໍ່ກັບບັນຫານີ້, ໂຮງງານຕັດຫຍິບຂອງພວກເຮົາ ຢາກຊີ້ແຈງຕໍ່ສັງຄົມໃຫ້ມີຄວາມເຂົ້າໃຈເປັນເອກະພາບກັນ, ຜູ້ຮັບຂໍ້ມູນຂ່າວສານທາງສື່ສັງຄົມອອນລາຍ ກໍຢາກໃຫ້ມີຄວາມໜັກແໜ້ນ ບໍ່ຟ້າວຫຼົງເຊື່ອ, ກົດໄລ້, ກົດແຊຣ ຂ່າວທີ່ບິດເບືອນ ແລະ ກໍ່ໃຫ້ເກີດເຂົ້າໃຈຜິດເປັນວົງກວ້າງ ເຮັດໃຫ້ປະຊາຊົນບໍ່ເຊື່ອໝັ້ນ ຕໍ່ພັກ-ລັດ ແລະ ສ້າງຄວາມເສື່ອມເສຍໃຫ້ພາກສ່ວນອື່ນ ໂດຍບໍ່ເປັນທຳ.

ຂ່າວ: ປະຊາຊົນ