ຄະນະນໍາກະຊວງ ປກສ ຕິດຕາມຄວາມຄືບໜ້າການຫຼ່ໍຮູບປັ້ນ ປະທານ ໄກສອນ ພົມວິຫານ
March 29, 2023 - 11:12 AM
ວັນທີ 27 ມີນາ 2023 ຜ່ານມາ, ຄະນະນໍາກະຊວງ ປກສ ນໍາໂດຍ ພົຕ ວັນທອງ ກອງມະນີ ກໍາມະການສູນກາງພັກ ຮອງລັດຖະມົນຕີກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ລົງກວດກາຄວາມຄືບໜ້າໃນການຫຼ່ໍຮູບປັ້ນ ປະທານ ໄກສອນ ພົມວິຫານ ຢູ່ໂຮງປັ້ນຫລໍ່ປະຕິມະກຳລ້ານຊ້າງ ບ້ານໂນນແກ້ວ ເມືອງ ສີໂຄດຕະບອງ ນະຄອນຫລວງວຽງຈັນ; ເຊິ່ງມາຮອດປັດຈຸບັນແມ່ນມີຄວາມຄືບໜ້າພໍສົມຄວນ ແລະ ຈະມີ ການປັບປຸງບາງສ່ວນເປັນ ຕົ້ນແມ່ນໃບໜ້າ, ຫູ, ມື, ເສື້ອ, ໂສ້ງແຂນ, ຂາ ແລະ ປຶ້ມ.
ເປັນກຽດເຂົ້າຮ່ວມລົງກວດກາໃນຄັ້ງນີ້ ໂດຍທ່ານ ປອ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ມີຄະນະຮັບຜິດຊອບ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ບຸນສະໜອງ ສີຫາລາດ ຮອງຜູ້ອຳນວຍການໂຮງປັ້ນຫຼ່ໍປະຕິມະກຳລ້ານຊ້າງ ທັງເປັນຜູ້ຮັບຜິດຊອບຫຼ່ໍຮູບປັ້ນ ປະທານ ໄກສອນ ພົມວິຫານ ກ່າວວ່າ: ການຫລໍ່ຮູບປັ້ນປະທານ ໄກສອນ ພົມວິຫານ ແມ່ນເລີ່ມມາແຕ່ວັນທີ 12 ມີນາ 2023 ແລະ ຈະໃຫ້ສໍາເລັດໃນ ວັນທີ 30 ມິຖຸນາ 2023, ສໍາລັບຂະໜາດຄວາມສູງ ຮູບປັ້ນປະທານ ໄກສອນ ພົມວິຫານ ແມ່ນສູງ 7,50 ແມັດ; ຄວາມກວ້າງໜ້າເອິກແມ່ນ ປະມານ 1,98 ແມັດ, ຄວາມກວ້າງດ້ານຂ້າງ 1,44 ແມັດ, ຖານຮອງພື້ນເປັນຫຼ່ຽມສູງ 25 ເຊັນ, ແທ່ນຕັ້ງຮູບຫຼ່ໍດ້ວຍຊີມັງສູງ 4 ແມັດ. ຜະລິດດ້ວຍທອງສໍາລິດ ລວມມູນຄ່າການກໍ່ສ້າງ ແມ່ນ 3.500.000.000 ກີບ.
ພາຍຫລງທີ່ປັ້ນຫລໍ່ຮູບປັ້ນປະທານ ໄກສອນ ພົມວິຫານ ສໍາເລັດແລ້ວແມ່ນຈະນໍາໄປສະຖິດໄວ້ວິທະຍາຄານການເມືອງ ປກສ.
ພາບຂ່າວ: ສົມສະໄຫວ
