WHO ແກ້ໄຂຂໍ້ແນະນໍາສັກວັກຊີນປ້ອງກັນໂຄວິດ ຊີ້ເດັກ-ໄວລຸ້ນສຸຂະພາບດີອາດບໍ່ຕ້ອງສັກ ກຸ່ມສ່ຽງສູງຮັບເຂັມກະຕຸ້ນໃນ 6-12 ເດືອນ
ອົງການອະນາໄມໂລກ (WHO) ປະກາດແກ້ໄຂຂໍ້ແນະນໍາການສັກວັກຊີນປ້ອງກັນໂຄວິດສໍາລັບໄລຍະໃໝ່ຂອງການແພ່ລະບາດ ໂດຍລະບຸຂໍ້ແນະນໍາສໍາລັບເດັກ ແລະ ໄວລຸ້ນທີ່ມີສຸຂະພາບແຂງແຮງອາດບໍ່ຈໍາເປັນຕ້ອງສັກວັກຊີນ, ແຕ່ສໍາລັບກຸ່ມຜູ້ສູງອາຍຸ ຫລື ກຸ່ມສ່ຽງສູງ ຄວນໄດ້ຮັບການສັກວັກຊີນເຂັມກະຕຸ້ນໃນໄລຍະ 6-12 ເດືອນຫລັງຈາກສັກວັກຊີນຄັ້ງສຸດທ້າຍ.
WHO ຊີ້ວ່າ: ເປົ້າໝາຍຂອງການແກ້ໄຂຂໍ້ແນະນໍາດັ່ງກ່າວ ເພື່ອເນັ້ນຄວາມພະຍາຍາມໃສ່ການໃຫ້ວັກຊີນຕໍ່ຜູ້ທີ່ຜະເຊີນຄວາມສ່ຽງຈາກການເກີດອາການປ່ວຍຮຸນແຮງ ຫລື ເສຍຊີວິດຈາກໂຄວິດ ໂດຍພິຈາລະນາຈາກລະດັບພູມຕ້ານທານຂອງປະຊາກອນທົ່ວໂລກເພີ່ມສູງຂຶ້ນ ທັງຈາກການຕິດເຊື້ອ ແລະ ສັກວັກຊີນ.
ຂະນະທີ່ WHO ກໍານົດກຸ່ມປະຊາກອນທີ່ມີຄວາມສ່ຽງສູງວ່າເປັນຜູ້ໃຫຍ່ ລວມທັງຄົນອາຍຸນ້ອຍທີ່ມີປັດໄຈສ່ຽງສໍາຄັນອື່ນໆ ເຊິ່ງການສັກເຂັມກະຕຸ້ນເພີ່ມໄລຍະ 6-12 ເດືອນຫລັງສັກຄັ້ງສຸດທ້າຍ ຈະພິຈາລະນາຈາກປັດໄຈຕ່າງໆເຊັ່ນ: ອາຍຸ ແລະ ສະພາບພູມຕ້ານທານອ່ອນແອ.
ທັງນີ້, ລາຍລະອຽດໃນການແກ້ໄຂຂໍ້ແນະນໍາດັ່ງກ່າວລະບຸວ່າ: ກຸ່ມເດັກ ແລະ ໄວລຸ້ນມີຄວາມຈໍາເປັນຕ້ອງໄດ້ຮັບວັກຊີນປ້ອງກັນໂຄວິດໃນ “ລະດັບຕໍ່າ” ແລະ ຮຽກຮ້ອງໃຫ້ບັນດາປະເທດພິຈາລະນາປັດໄຈຕ່າງໆເຊັ່ນ: ສະພາບພະຍາດ ກ່ອນຈະແນະນໍາໃຫ້ສັກວັກຊີນຕໍ່ປະຊາກອນໃນກຸ່ມນີ້.
ເຖິງຢ່າງໃດກໍຕາມ, ໃນເດືອນກັນຍາປີຜ່ານມາ, WHO ປະກາດວ່າ: “ການສິ້ນສຸດການລະບາດໃຫຍ່ (ຂອງໂຄວິດ) ນັ້ນຢູ່ໃນໄລຍະທີ່ແນມເຫັນ” ໂດຍໃນການຖະແຫລງວັນທີ 28 ມີນາ WHO ຊີ້ວ່າ: ຂໍ້ແນະນໍາຫລ້າສຸດສະທ້ອນພາບສະຖານະການລະບາດໃນປັດຈຸບັນ ແລະ ລະດັບພູມຕ້ານທານທົ່ວໂລກ, ແຕ່ເຕືອນວ່າຂໍ້ແນະນໍາທີ່ແກ້ໄຂໃໝ່ນີ້ ບໍ່ຄວນເບິ່ງວ່າເປັນຂໍ້ແນະນໍາໄລຍະຍາວວ່າຈໍາເປັນທີ່ຈະຕ້ອງຮັບການສັກວັກຊີນເຂັມກະຕຸ້ນເປັນປະຈໍາທຸກປີ ຫລື ບໍ່.
ອ້າງອີງ:
https://www.channelnewsasia.com/…/who-revises-covid-19…
