1 ປະເທດ 2 ເວລາ ! ເລບານອນຖົກຖຽງໜັກເລື່ອງ “ເວລາອອມແສງ”
ເລບານອນກາຍເປັນປະເທດທີ່ມີ 2 ໂຊນເວລາ ທ່າມກາງຄວາມຂັດແຍ່ງທີ່ເພີ່ມຂຶ້ນ ລະຫວ່າງໜ່ວຍງານທາງການເມືອງ ແລະ ໜ່ວຍງານທາງສາສະໜາ ກ່ຽວກັບການຕັດສິນໃຈຂະຫຍາຍເວລາລະດູໜາວອອກໄປອີກ 1 ເດືອນ.
ວັນທີ 27 ມີນາ, ສໍານັກຂ່າວຣອຍເຕີລາຍງານວ່າ: ວັນທີ 23 ມີນາຜ່ານມາ ທ່ານ ນາຈິບ ມິຄາຕີ ນາຍົກລັດຖະມົນຕີຮັກສາການຂອງເລບານອນ ປະກາດປັບເວລາຂອງປະເທດໃຫ້ໄວຂຶ້ນ 1 ຊົ່ວໂມງ ໃນວັນທີ 20 ເມສາ ແທນການເຂົ້າສູ່ໄລຍະເວລາອອມແສງ ຫລື DST ໃນອາທິດສຸດທ້າຍຂອງເດືອນມີນາ ຕາມປົກກະຕິໃນເລບານອນ, ເອີຣົບ ແລະ ພາກພື້ນອື່ນໆ.
ເຖິງວ່າຈະບໍ່ມີການໃຫ້ເຫດຜົນເຖິງການຕັດສິນໃຈດັ່ງກ່າວ, ແຕ່ຖືກເບິ່ງວ່າເປັນຄວາມພະຍາຍາມທີ່ຈະຊະນະໃຈຊາວມຸດສະລິມໃນປະເທດ ໂດຍເຮັດໃຫ້ການຖືສິນອົດໃນໄລຍະເດືອນລໍມາດອນໄວຂຶ້ນ 1 ຊົ່ວໂມງ ຈາກເວລາ 19:00 ໂມງ ເປັນເວລາ 18:00 ໂມງ.
ແຕ່ວັນທີ 25 ມີນາຜ່ານມາ, ຄຣິສຈັກມາໂຣໄນ ກຸ່ມສາສະໜາທີ່ມີອິດທິພົນຂອງເລບານອນ ປະກາດວ່າ: ພວກເຂົາຈະບໍ່ປະຕິບັດຕາມການຕັດສິນໃຈຂອງທ່ານ ມິຄາຕີ ໂດຍກ່າວວ່າ: ມັນເປັນເລື່ອງ “ໜ້າປະຫລາດໃຈ” ແລະ ມັນບໍ່ມີການປຶກສານໍາຜູ້ດໍາເນີນການຄົນອື່ນໆ ຫລື ການພິຈາລະນາມາດຕະຖານສາກົນໃດໆ.
ນອກຈາກຄຣິສຈັກມາໂຣໄນ ກຸ່ມສາສະໜາຄຣິສອື່ນໆ, ພັກການເມືອງ ແລະ ໂຮງຮຽນຫລາຍແຫ່ງ ຕ່າງປະກາດວ່າ: ພວກເຂົາຈະປ່ຽນເວລາໃຫ້ໄວຂຶ້ນໃນຄືນວັນທີ 25 ມີນາ ເຊິ່ງຈະເປັນການປັບເວລາອອມແສງຕາມປົກກະຕິຄືກັບຫລາຍໆປີຜ່ານມາ.
ເຖິງຢ່າງໃດກໍຕາມ, ການຕັດສິນໃຈປ່ຽນເວລາທີ່ບໍ່ຄືກັນຂອງແຕ່ລະກຸ່ມ, ອົງກອນ ຫລື ໜ່ວຍງານຢູ່ເລບານອນນັ້ນ ສົ່ງຜົນກະທົບຕໍ່ຊີວິດປະຈໍາວັນຂອງຊາວເລບານອນໃນຫລາຍດ້ານເຊັ່ນ: ເວລາບິນ, ເວລາເຮັດວຽກ ຫລື ເວລາໃນອຸປະກອນເອເລັກໂຕຣນິກຕ່າງໆ.
