ກະຊວງການເງິນມອບ-ໂອນ 18 ຫົວໜ່ວຍວິສາຫະກິດໃຫ້ແຂວງເຊກອງຄຸ້ມຄອງ
ວັນທີ 28 ມີນາ 2023 ນີ້ ກະຊວງການເງິນ ແລະ ແຂວງເຊກອງ ເຊັນບົດບັນທຶກມອບ-ໂອນ ຫົວໜ່ວຍວິສາຫະກິດທີ່ສູນກາງຄຸ້ມຄອງຜ່ານມາຈໍານວນ 18 ຫົວໜ່ວຍໃຫ້ແຂວງເຊກອງຄຸ້ມຄອງໃນໄລຍະທົດລອງ ລະຫວ່າງທ່ານ ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ ກັບ ທ່ານເຫຼັກໄຫຼ ສີວິໄລ ເຈົ້າແຂວງເຊກອງ.
ທ່ານ ສຸພັນ ວິລະວົງ ຮອງຫົວໜ້າກົມສ່ວຍສາອາກອນ ກະຊວງການເງິນ ໃຫ້ຮູ້ວ່າ: ການມອບ-ໂອນຄັ້ງນີ້ ແມ່ນເປັນການປະຕິບັດຕາມມາດຕາ 3 ຂໍ້ທີ 1 ຂອງມະຕິກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ສະບັບເລກທີ 63/ສພຊ, ລົງວັນທີ 09 ທັນວາ 2022. ກະຊວງການເງິນ ແລະ ແຂວງເຊກອງ ເຫັນດີເປັນເອກະພາບມອບ-ຮັບການທົດລອງຫັນຫົວໜ່ວຍວິສາຫະກິດທີ່ສູນກາງຄຸ້ມຄອງໃນໄລຍະຜ່ານມາ ເພື່ອສ້າງຄວາມເຂັ້ມແຂງໃຫ້ແກ່ແຂວງ (ລາຍຮັບກຸ້ມລາຍຈ່າຍ ແລະ ມີສ່ວນເຫຼືອດຸ່ນດ່ຽງໃຫ້ສູນກາງ) ປະກອບມີ: ບໍລິສັດ ພະລັງງານໄຟຟ້າເຊກອງ ຈໍາກັດ, ບໍລິສັດ ໄຟຟ້າເຊກະໝານ 3 ຈໍາກັດ, ບໍລິສັດໄຟຟ້າພະລັງງານຄວາມຮ້ອນເຊກອງ ຈໍາກັດ, ບໍລິສັດ ວີພີຈີລາວ-ຫວຽດ ຈີເອັສຊີ ຈໍາກັດ, ບໍລິສັດ ລາວກະລຶມບໍ່ແຮ່ ຈໍາກັດ, ບໍລິສັດ ໄຟຟ້າຫ້ວຍລະແງ ຈໍາກັດ, ບໍລິສັດ ກຸ່ມດວງຈະເລີນພັດທະນາ ແຮ່ຄໍາກະລຶມ ຈໍາກັດ, ບໍລິສັດ ດວງຈະເລີນພັດທະນາ ແຮ່ຄໍາດາກຈຶງ ຈໍາກັດ, ບໍລິສັດ ໄຟຟ້ານໍ້າອີມູນ ຈໍາກັດ, ບໍລິສັດ ບີເອສເອສ ມາຍນິ້ງ ຈໍາກັດ, ບໍລິສັດ ນໍ້າບີພາວເວີ ຈໍາກັດ, ບໍລິສັດ ເຊກອງບໍ່ແຮ່ ຈໍາກັດ, ບໍລິສັດ ລາວຕົງລຽນບໍ່ແຮ່ ຈໍາກັດ, ບໍລິສັດ ທີເອັສບີພີ ເຊກອງ ພະລັງງານໄຟຟ້າ ແລະ ແຮ່ທາດ ຈໍາກັດ, ບໍລິສັດ ຊິນຢວນບໍ່ແຮ່ ຈໍາກັດ, ບໍລິສັດ ຖ່ານຫີນລະມາມ ມາຍນິ້ງ ຈໍາກັດ, ບໍລິສັດ ເຂື່ອນໄຟຟ້າເຊກອງຕອນລຸ່ມ ເອ ຈໍາກັດ ແລະ ບໍລິສັດ ເອັນທີເອັບ ອາກຣີ ພັດທະນາ ຈໍາກັດ.
ການມອບ-ໂອນຫົວໜ່ວຍວິສາຫະກິດທີ່ສູນກາງຄຸ້ມຄອງຜ່ານມາໃຫ້ທ້ອງຖິ່ນສືບຕໍ່ຄຸ້ມຄອງ ແລະ ຈັດຕັ້ງປະຕິບັດນີ້ ແມ່ນເຫັນຄວາມຈໍາເປັນໃນການພັດທະນາທ້ອງຖິ່ນ ຊຶ່ງຈະສ້າງຄວາມສະດວກໃນການຄຸ້ມຄອງ, ການປະສານວຽກ ແລະ ທິດນໍາຂອງລັດຖະບານ ກໍ່ຄືກະຊວງການເງິນເຫັນດີເປັນເອກະພາບມອບ-ໂອນຫົວໜ່ວຍທຸລະກິດຂະໜາດໃຫຍ່ທີ່ສູນກາງຄຸ້ມຄອງ ເພື່ອໃຫ້ແຂວງຮັບຜິດຊອບໃນໄລຍະທີ່ທາງສູນກາງໄດ້ມອບໃຫ້ແຂວງກຸ້ມຕົນເອງທາງດ້ານງົບປະມານ.
ສະນັ້ນ, ຈຶ່ງມີການຈັດສັນໂດຍການມອບຫົວໜ່ວຍທຸລະກິດ ແລະ ບໍລິສັດທີ່ຕັ້ງຢູ່ກັບແຂວງນັ້ນໆ ເພື່ອໃຫ້ແຂວງຄຸ້ມຄອງເອງ; ທັງນີ້ ກໍ່ເພື່ອໃຫ້ກາຍເປັນແຂວງເກີນດຸນທາງດ້ານງົບປະມານ (ລາຍຮັບກຸ້ມລາຍຈ່າຍ ແລະ ມີສ່ວນເຫຼືອດຸ່ນດ່ຽງໃຫ້ສູນກາງ).
