ທ່ານ ຮອງນາຍົກລັດຖະມົນຕີ ເຄື່ອນໄຫວເຮັດວຽກ ຢູ່ແຂວງຫລວງນ້ຳທາ ເພື່ອກະກຽມຄວາມພ້ອມໃນການເປີດດ່ານສາກົນທາງລົດໄຟ ລາວ-ຈີນ

ວັນທີ 23-24 ມີນາ 2023 ຜ່ານມາ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ລົງເຄື່ອນໄຫວເຮັດວຽກຢູ່ແຂວງຫລວງນໍ້າທາ ເພື່ອກວດກາເບິ່ງດ່ານສາກົນທາງລົດໄຟ ລາວ-ຈີນ ຢູ່ສະຖານີລົດໄຟບໍ່ເຕັນ ເພື່ອກະກຽມຄວາມພ້ອມໃນການເປີດດ່ານສາກົນທາງລົດໄຟ ລາວ-ຈີນ ໂດຍມີບັນດາທ່ານລັດຖະມົນຕີ, ຮອງລັດຖະມົນຕີ ພ້ອມດ້ວຍບັນດາກົມກ່ຽວຂ້ອງຂອງຂະແໜງການທີ່ກ່ຽວຂ້ອງເຂົ້າຮ່ວມ. ນອກນີ້, ຍັງມີຄະນະກຳມະການຮ່ວມມື ລາວ-ຈີນ, ບໍລິສັດທາງລົດໄຟ ລາວ-ຈີນ ແລະ ບໍລິສັດລາວເກດເວ ເຂົ້າຮ່ວມ.

ການລົງເຄື່ອນໄຫວວຽກງານໃນຄັ້ງນີ້,  ໄດ້ຮັບການຕ້ອນຮັບຈາກ ທ່ານ ວຽງສະຫວັດ ສີພັນດອນ ເຈົ້າແຂວງແຂວງຫລວງນໍ້າທາ ແລະ ໄດ້ຮັບຟັງລາຍງານຫຍໍ້ກ່ຽວກັບຄວາມພ້ອມໃນດ້ານຕ່າງໆຈາກພາກສ່ວນກ່ຽວຂ້ອງ ໂດຍສະເພາະຜູ້ອຳນວຍການບໍລິສັດລົດໄຟ ລາວ-ຈີນ, ຈຸດກວດກາຄົນເຂົ້າ-ອອກປະເທດ, ອຸປະກອນຮັບໃຊ້ແຕ່ລະຂະແໜງການ, ບຸກຄະລາກອນປະຈໍາດ່ານ ເພື່ອອໍານວຍຄວາມສະດວກໃຫ້ຜູ້ໂດຍສານທີ່ຈະເດີນທາງ ຜ່ານດ່ານສາກົນທາງລົດໄຟ ລາວ-ຈີນ.

ຜ່ານການຮັບຟັງການລາຍງານ, ທ່ານຮອງນາຍົກລັດຖະມົນຕີ ໄດ້ສະແດງຄວາມຊົມເຊີຍແຕ່ລະພາກສ່ວນທີ່ໄດ້ສຸມໃສ່ກະກຽມໃຫ້ແກ່ການເປີດດ່ານສາກົນລົດໄຟ ລາວ-ຈີນ ໂດຍສະເພາະການຕ້ອນຮັບລົດໄຟໂດຍສານຖ້ຽວທໍາອິດ, ຊຶ່ງຄາດວ່າຈະມີຂຶ້ນຢ່າງເປັນທາງການໃນວັນທີ 13 ເມສາ 2023 ນີ້. ໃນຂະນະດຽວກັນ, ທ່ານຮອງນາຍົກລັດຖະມົນຕີ ໄດ້ຊີ້ນໍາແຕ່ລະພາກສ່ວນທີ່ກ່ຽວຂ້ອງຂັ້ນສູນກາງ ແລະ ທ້ອງຖິ່ນ ລວມທັງບໍລິສັດລົດໄຟ ລາວ-ຈີນ ແລະ ເຂດເສດຖະກິດພິເສດ ໃຫ້ມີການປະສານສົມທົບກັນສືບຕໍ່ກະກຽມດ້ານຕ່າງໆທີ່ຍັງຄົງຄ້າງໃຫ້ສໍາເລັດ ເພື່ອເຮັດໃຫ້ພິທີເປີດຢ່າງເປັນທາງການດ່ານສາກົນລົດໄຟ ລາວ-ຈີນ ໄດ້ຮັບຜົນສໍາເລັດຕາມຈຸດປະສົງ ແລະ ລະດັບຄາດໜາຍຢ່າງຈົບງາມ.