ລິເວີພູລ ຫວັງດຶງ ເຈມ ວອດພຣາວ ຮ່ວມທີມລະດູຮ້ອນນີ້ ຂະນະທີ່ຜີແດງ ແລະ ສາລິກາດົງ ໃຫ້ຄວາມສົນໃຈເຊັ່ນກັນ

ສື່ດັງລາຍງານ “ຫົງແດງ” ລິເວີພູລ ຕັ້ງເປົ້າດຶງ ເຈມ ວອດ-ພຣາວ ເທບແຫ່ງລູກຟຣີຄິກ ເຊົາແຮມຕັນ ມາຮ່ວມທີມໃນລະດູຮ້ອນນີ້, ໃນຂະນະທີ່ ແມນເຊັສເຕີ ຢູໄນເຕັດ ແລະ ນີວຄາສເຊິນ ຕ່າງກໍ່ກໍາລັງຈັບຕາກັບເບິ່ງຢູ່ເຊັ່ນກັນ.

ເຖິງແມ່ນວ່າລະດູການນີ້ ເຊົາແຮມຕັນ ຜົນງານບໍ່ຄ່ອຍດີ ແລະ ມີຄວາມສ່ຽງທີ່ຈະຕົກຊັ້ນຈາກເວທີ ພຣີເມຍລີກ (ອັນດັບສຸດທ້າຍ), ແຕ່ ວອດ-ພຣາວ ສະແດງຟອມແບບທີ່ຫນ້າປະທັບໃຈ, ຍິງ 7 ປະຕູ ແລະ 2 ແອດຊິສໃນ 28 ເກມລີກ.

Football Insider ກ່າວວ່າມີຫລາຍສະໂມສອນກໍາລັງຕິດຕາມສະຖານະການຂອງ ວອດ-ພຣາວ ແລະ ໄດ້ສົ່ງນັກສັງເກດການໄປເບິ່ງດາວຍິງທີມຊາດອັງກິດ ອາຍຸ 28 ປີ ລົງຫລິ້ນຫລາຍນັດ ແລະ ໜຶ່ງໃນນັ້ນແມ່ນ ລິເວີພູລ ທີ່ຕັ້ງເປົ້າປັບແດນກາງໃນລະດູຮ້ອນນີ້.

ແມນເຊັສເຕີ ຢູໄນເຕັດ ແລະ ນິວຄາສເຊິລ ຢູໄນເຕັດ ເປັນອີກສອງສະໂມສອນທີ່ສົນໃຈໃນຕົວ ວອດ-ພຣາວ ທີ່ຢູ່ກັບ ເຊົາແຮມຕັນ ຕັ້ງແຕ່ອາຍຸ 8 ປີ ແລະ ລົງຫລິ້ນໃຫ້ສະໂມສອນໄດ້ໄປແລ້ວເຖິງ 399 ນັດ, ຍິງໄດ້ 53 ປະຕູ ນັບຕັ້ງແຕ່ກ້າວເຂົ້າມາສູ່ທີມຊຸດໃຫຍ່ໃນປີ 2011.