10 ຂໍ້ທີ່ຄົນສຳເລັດຈະບໍ່ເຮັດ.

ເມື່ອສ້າງຕັ້ງທຸລະກິດຂຶ້ນແລ້ວ ແນ່ນອນວ່າບໍ່ມີໃຜຢາກລົ້ມເຫລວ, ຜູ້ສ້າງຕັ້ງທຸກຄົນລ້ວນຕ້ອງການຄວາມສຳເລັດບໍ່ຫລາຍກໍໜ້ອຍ, ແຕ່ຈະເຮັດແນວໃດຈຶ່ງຈະປະສົບຄວາມສຳເລັດໄດ້ ຍິ່ງຖ້າທ່ານເປັນມືໃໝ່ໃນການສ້າງຕັ້ງບໍລິສັດໜຶ່ງຂຶ້ນມາ ລອງມາເບິ່ງເຄັດລັບເຫລົ່ານີ້ ວ່າອັນໃດທີ່ “ບໍ່ຄວນເຮັດ” ຫາກຢາກປະສົບຄວາມສຳເລັດ.

1. ຂີ້ອິດສາ : ການເຫັນຄົນອື່ນຮອບຕົວປະສົບຄວາມສຳເລັດ ຄວນຈະເປັນແຮງຊຸກຍູ້ໃຫ້ທ່ານ ເຖິງວ່າພວກເຂົາເຫລົ່ານັ້ນຈະເປັນຄູ່ແຂ່ງຂອງທ່ານກໍຕາມ ທ່ານຈະຕ້ອງເຂົ້າໃຈວ່າທຸກໆຄົນລ້ວນມີຄວາມສາມາດທີ່ຈະປະສົບຄວາມສຳເລັດໄດ້ ຈະເມົາໄປເສຍເວລາກັບການລໍຄອຍແຕ່ສົນໃຈຄວາມສຳເລັດຂອງຄົນອື່ນໄປເຮັດຫຍັງ ເພາະມີແຕ່ຈະເຮັດໃຫ້ທ່ານຖືກຖ່ວງດຶງຄວາມຕັ້ງໃຈໄປຈາກເປົ້າໝາຍທີ່ວາງໄວ້.
2. ຈົມກັບອະດີດ : ທ່ານກຳລັງພະເຊີນໜ້າຢູ່ກັບໄລຍະເວລາທີ່ໜັກໜ່ວງ ການຕັດສິນໃຈທີ່ຍາກລຳບາກ ແລະ ເປັນໄປໄດ້ວ່າອາດຈະເຄີຍລົ້ມເຫລວມາແລ້ວໃນຈຸດໜຶ່ງ ຢ່າປ່ອຍໃຫ້ສິ່ງເຫລົ່ານີ້ກາຍມາເປັນຂຸມ, ເປັນບໍ່ ໃຫ້ກັບຫົນທາງຂ້າງໜ້າຂອງທ່ານ ຫລື ຢຸດທ່ານບໍ່ໃຫ້ໄປຕໍ່. ລອງຄົ້ນຫາຫົນທາງທີ່ຈະພິຊິດອຸປະສັກຕ່າງໆເຫລົ່ານັ້ນ, ກ້າວຕໍ່ໄປຂ້າງໜ້າ ແລ້ວບໍ່ຕ້ອງຫັນກັບມາແນມຄວາມລົ້ມເຫລວໃນອະດີດ.
3. ສາລະພັດຂໍ້ອ້າງ : ຫາກທ່ານຕັດສິນໃຈຜິດພາດ ເຮັດມັນເສຍຫາຍເອງ ຫລື ບາງສິ່ງບາງຢ່າງມັນບໍ່ດີ ແລະ ບໍ່ເປັນໄປຕາມແຜນ ຢ່າພະຍາຍາມຫາຂໍ້ແກ້ຕົວໃດໆ, ຄົ້ນຫາສາເຫດຂອງບັນຫາ ແລະ ຈື່ຈຳໃຫ້ເປັນບົດຮຽນທີ່ສຳຄັນຂອງການເຮັດທຸລະກິດ ຖ້າທ່ານນິຍາມມັນໄດ້ວ່າຄວນຈະແກ້ໄຂບັນຫານັ້ນແນວໃດ ທ່ານກໍຈະບໍ່ເຮັດຜິດພາດຊຳ້ອີກ, ແຕ່ຫາກທ່ານຍັງຄົງລໍຄອຍຫາຂໍ້ອ້າງ, ຂໍ້ແກ້ຕົວວ່າອັນໃດແມ່ນສາເຫດທີ່ເຮັດໃຫ້ວຽກຜິດພາດ ທ່ານກໍຈະເຮັດມັນຊຳ້ໆອີກ ເພາະວ່າບັນຫາເຫລົ່ານັ້ນບໍ່ໄດ້ຮັບການແກ້ໄຂໃຫ້ກົງຈຸດນັ້ນເອງ.
4. ຢຸດຮຽນຮູ້ : ອາຍຸ, ປະສົບການ ຫລື ລະດັບຂອງຄວາມສຳເລັດ ອາດຈະກັນທ່ານໃຫ້ຖືເບົາການຮຽນຮູ້, ແຕ່ບໍ່ມີໃຜໃນໂລກນີ້ທີ່ຈະຮູ້ໄປໝົດທຸກຢ່າງ ເຮົາຍັງສາມາດທີ່ຈະຮຽນຮູ້ ແລະ ສ້າງແຮງບັນດານໃຈຈາກນັກທຸລະກິດຄົນອື່ນໆໄດ້ ບໍ່ວ່າເຂົາຈະເປັນມະຫາເສດຖີຊື່ສຽງໂດ່ງດັງ ຫລື ເປັນພຽງນັກລົງທຶນນ້ອຍໆທີ່ຫາກໍເລີ່ມຕົ້ນທຸລະກິດກໍຕາມ.
5. ສະມາຄົມກັບຄົນຄິດລົບ : ກຸ່ມຄົນທີ່ມັກຈະແກ້ຕົວ, ມັກຈົ່ມ ແລະ ມີທັດສະນະຄະຕິໃນດ້ານລົບ ຄວນຈະຫລີກໜີໃຫ້ໄກໆ ຄືກັບພະຍາດລະບາດຮ້າຍແຮງໄດ້ຍິ່ງດີ ຮູ້ກັນດີວ່າຄົນເຫລົ່ານີ້ບໍ່ວ່າທ່ານຈະເວົ້າຫຍັງ ຫລື ບໍ່ວ່າຈະສະຖານະການໃດ ກໍມັກຈະສະແດງອອກໄປໃນທາງລົບຢູ່ສະເໝີໆ ຄົນເຫລົ່ານີ້ກໍປຽບດັ່ງພະຍາດມະເຮັງຮ້າຍ ເພາະພະລັງດ້ານລົບຂອງເຂົາຈະມາສ່ອງແສງໃສ່ທ່ານທັນທີ. ດັ່ງນັ້ນ, ທ່ານຄວນຈະຫ້ອມລ້ອມຕົນເອງດ້ວຍຄົນທີ່ເປັນຫຍັງຄືກັນກັບທ່ານ ເຊິ່ງຈະເຮັດໃຫ້ທ່ານເກີດພະລັງທີ່ຈະຕັ້ງໃຈຢ່າງທີ່ທ່ານເປັນ.
6. ຕື່ນມາໂດຍປາສະຈາກແຜນການ : ການຈັດການເວລາຖືເປັນເລື່ອງທີ່ສຳຄັນຫລາຍກັບນັກລົງທຶນ ຢ່າລືມວ່າມື້ໜຶ່ງມີເວລາບໍ່ເທົ່າໃດຊົ່ວໂມງເທົ່ານັ້ນ ດັ່ງນັ້ນ ຈົ່ງບໍລິຫານມັນຢ່າງມີປະສິດທິພາບ ທ່ານຈຳເປັນຕ້ອງຮູ້ວ່າເປົ້າໝາຍຂອງທ່ານແມ່ນຫຍັງ, ອັນໃດແມ່ນວຽກຍາກທີ່ທ່ານຕ້ອງເຮັດກ່ອນເລີ່ມມື້ໃໝ່ນີ້, ແຕ່ຫາກທ່ານຄິດວາງແຜນໃນທຸກໆມື້ຢ່າງຮີບຮ້ອນ ທ່ານຈະພົບກັບບັນຫາແນ່ນອນ, ຈົບແຕ່ລະມື້ດ້ວຍການວາງແຜນມັນອອກມາ ແລ້ວກໍເຮັດຕາມແຜນທີ່ວາງເອົາໄວ້.
7. ຢ້ານການປ່ຽນແປງ ແລະ ການປັບຕົວ : ທ່ານຕ້ອງເຕັມໃຈທີ່ຈະປັບແຜນ ແລະ ຍຸດທະສາດທັງໝົດ ເພາະມັນອາດຈະເປັນໂອກາດທີ່ດີກ່ວາ ເຊິ່ງທ່ານຈຳເປັນຕ້ອງປັບປ່ຽນເພື່ອຄວາມສຳເລັດໃນອະນາຄົດ ລອງຄິດເບິ່ງວ່າ ຖ້າ Apple ບໍ່ເຄີຍປັບຕົວ ແລະ ຕິດຢູ່ກັບການເຮັດພຽງແຕ່ຄອມພິວເຕີ, ແຕ່ຫລັງການປ່ອຍ iPod ອອກມາ ກໍເລີ່ມຕົ້ນຂອງອຸດສາຫະກຳສະມາດໂຟນມາທັນທີ ແລ້ວຕາມດ້ວຍແທັບເລັດ ແລະ ຕອນນີ້ກໍກາຍມາເປັນ wearable technology ໄດ້ແກ່ Apple Watch
8. ພວກເຫົ່າ ແຕ່ບໍ່ກັດ : ນັກລົງທຶນທີ່ປະສົບຄວາມສຳເລັດ ຕ້ອງບໍ່ຂີ້ໂມ້ໂອ້ອວດກັບສິ່ງທີ່ເຮັດຢູ່ ພວກເຂົາຈະວາງແຜນ ແລະ ລົງມືເຮັດເພື່ອໃຫ້ເກີດຄວາມສຳເລັດ ບໍ່ມີຫຍັງທີ່ບັນລຸເປົ້າໝາຍຍ້ອນການເຮັດດ້ວຍປາກພຽງຢ່າງດຽວ ແລະ ບໍ່ມີໃຜຍ້ອງຍໍຊົມເຊີຍກັບລົມປາກຂອງຄົນອື່ນ.
9. ສົນໃຈແຕ່ເງິນ ແລະ ຈຸດທົດສະນິຍົມ : ແທນການແລ່ນໄລ່ຈັບເງິນ ເປັນຫຍັງບໍ່ຕັ້ງໃຈໃສ່ການຜະລິດວຽກທີ່ສ້າງສັນ ເຊິ່ງຈະສ້າງຄວາມແຕກຕ່າງ ແລະ ໃຫ້ຜົນກຳໄລທີ່ສູງຂຶ້ນ ຖ້າທ່ານເຮັດສິ່ງນີ້ ເງິນກໍຈະມາຫາທ່ານເອງ ແນ່ນອນບໍ່ໄດ້ປະຕິເສດວ່າເງິນແມ່ນເປົ້າໝາຍສຳຄັນຂອງບໍລິສັດ, ແຕ່ການບໍລິຫານ ຫລື ສິນຄ້າທີ່ດີເລີດກໍແມ່ນການປູທາງໄປສູ່ເງິນກ້ອນໃຫຍ່ນັ້ນເອງ.
10. ປ່ອຍໃຫ້ຄວາມລົ້ມເຫລວມາຢຸດທ່ານ : ມີຕົວເລກບອກວ່າ 8 ໃນ 10 ຂອງທຸລະກິດເກີດໃໝ່ຈະລົ້ມເຫລວ, ແຕ່ນັກລົງທຶນທີ່ປະສົບຄວາມສຳເລັດຈະຮູ້ດີຢູ່ແລ້ວເຖິງໂອກາດທີ່ຈະລົ້ມເຫລວ, ແຕ່ຄວາມຈິງຈະພົບວ່າພວກເຂົາມີມຸມມອງຂອງຄວາມລົ້ມເຫລວທີ່ບໍ່ຄືໃຜ, ພວກເຂົາເບິ່ງວ່າມັນເປັນສ່ວນໜຶ່ງຂອງການເຕີບໃຫຍ່ໃນອະນາຄົດ ແລະ ກ້າວຍ່າງຕໍ່ໄປ ທັງນີ້ ທ່ານ James Dyson ເປັນຕົວຢ່າງທີ່ດີ ລາວພັດທະນາເຄື່ອງດູດຂີ້ຝຸ່ນຕົ້ນແບບລົ້ມເຫລວເຖິງ 5,126 ເທື່ອ, ແຕ່ໃນເທື່ອທີ 5,127 ກໍກາຍເປັນສິນຄ້າຂາຍດີທີ່ສຸດໃນສະຫະລັດອາເມລິກາ ຕອນນີ້ລາວມີລາຍໄດ້ຫລາຍກ່ວາ 4,5 ພັນລ້ານໂດລາສະຫະລັດ ຍ້ອນວ່າຄວາມລົ້ມເຫລວບໍ່ເຄີຍມາຖ່ວງດຶງລາວໄວ້ໄດ້.

• ແນວໃດກໍຕາມ, ເຄັດລັບທີ່ກ່າວມາທັງໝົດນີ້ ເຫັນວ່າບໍ່ຈຳເປັນຈະຕ້ອງເອົາໄປນຳໃຊ້ກັບວຽກທຸລະກິດພຽງຢ່າງດຽວ ຖືວ່າເປັນຫລັກການ ຫລື ແງ່ຄິດທີ່ສາມາດໃຊ້ໄດ້ກັບການເຮັດວຽກໃນທຸກເລື່ອງ ເຊິ່ງນອກເໜືອຈາກນັກລົງທຶນ ຫລື ນັກທຸລະກິດແລ້ວ ໃນສາຍອາຊີບອື່ນໆກໍສາມາດເອົາໄປນຳໃຊ້ປະໂຫຍດໄດ້ ເພື່ອຄວາມສຳເລັດໃນໜ້າທີ່ວຽກງານ ແລະ ຄວາມຈະເລີນກ້າວໜ້າໃນຊີວິດໄດ້.