ປ້ອງກັນ ແລະ ຫລຸດຜ່ອນຄວາມເສື່ອມຂອງໝາກໄຂ່ຫລັງ
March 28, 2023 - 9:04 AM
+ ການປ້ອງກັນພະຍາດໝາກໄຂ່ຫລັງ : ການປ່ຽນແປງວິຖີຊີວິດບາງປະການສາມາດເຮັດໃຫ້ໝາກໄຂ່ຫລັງມີສຸຂະພາບດີໄດ້.
- ການເລືອກກິນອາຫານທີ່ຄົບ 5 ໝວດໃນອັດຕາສ່ວນທີ່ເໝາະສົມ ໂດຍເລືອກກິນຜັກ ແລະ ໝາກໄມ້ໃຫ້ຫລາຍຂຶ້ນ ໂດຍສະເພາະພືດຕະກູນຖົ່ວ ຫລື ຜັກ, ເຕົ້າຫູ້ ເປັນຕົ້ນ ອາຫານກຸ່ມນີ້ຈະເປັນແຫ່ລງໂປຣຕິນທົດແທນຈາກຊີ້ນສັດໄດ້ດີ.
- ກິນພືດຈຳພວກແປ້ງ ແລະ ເຂົ້າໃຫ້ຫລາຍກ່ວາການກິນຊີ້ນສັດ ແລະ ຫາກເລືອກກິນໂປຣຕິນຈາກຊີ້ນສັດໃຫ້ເລືອກປາ, ເປັດ, ໄກ່, ກຸ້ງ, ໄຂ່ຂາວຫລາຍກ່ວາຈຳພວກຊີ້ນແດງ, ໝູ, ງົວ ທັງນີ້ເນື່ອງຈາກໝາກໄຂ່ຫລັງມີໜ້າທີ່ໃນການກຳຈັດຂອງເສຍ ເຊິ່ງໄດ້ມາຈາກການເຜົາຜານຈາກໂປຣຕິນຈາກຊີ້ນສັດ ຫາກກິນອາຫານກຸ່ມນີ້ຫລາຍ ໝາກໄຂ່ຫລັງກໍຈະເຮັດວຽກຫລາຍຂຶ້ນ.
- ຈຳກັດການກິນເກືອ ຫລື ອາຫານເຄັມ ເນື່ອງຈາກໝາກໄຂ່ຫລັງຕ້ອງຮັບພາລະໄລ່ເກືອສ່ວນເກີນອອກທາງນຳ້ຍ່ຽວ ແລະ ເກືອຍັງມີຜົນຕໍ່ຄວາມດັນເລືອດ ເຮັດໃຫ້ເກີດຄວາມດັນເລືອດສູງ ຄວບຄຸມຍາກຂຶ້ນ.
- ຈຳກັດອາຫານມັນ ໂດຍສະເພາະໄຂມັນຈາກສັດ, ໄຂ່ແດງ, ກະທິ ແລະ ນຳ້ມັນພືດທີ່ມີກົດໄຂມັນອີ່ມຕົວສູງ ເຊັ່ນ: ນຳ້ມັນປາມ, ນຳ້ມັນບົວ, ເນີຍ, ມາກາຣີນ ຫັນໄປໃຊ້ກົດໄຂມັນບໍ່ອີ່ມຕົວສູງແທນ ເຊັ່ນ: ນຳ້ມັນຖົ່ວເຫລືອງ, ນຳ້ມັນດອກຕາເວັນ ແລະ ນຳ້ມັນດອກຄຳຝອຍ ເປັນຕົ້ນ.
- ດື່ມນຳ້ມື້ລະ 6 – 8 ຈອກ ຫລື 2 ລິດຕໍ່ມື້.
- ອອກກຳລັງກາຍຢ່າງໜ້ອຍມື້ລະ 30 ນາທີ ຢ່າງໜ້ອຍ 5 ມື້ຕໍ່ອາທິດ ເຊັ່ນ: ຍ່າງໄວໆ, ຂີ່ລົດຖີບ, ລອຍນຳ້, ແອໂຣບິກ ເປັນຕົ້ນ.
- ເຊົາສູບຢາ.
- ຫລຸດ ຫລື ເຊົາດື່ມອານກໍຮໍ.
- ກວດຄວາມດັນຢ່າງສະໝໍ່າສະເໝີ.
- ພະຍາຍາມຫລີກເວັ້ນຄວາມເຄັ່ງຄຽດ ແລະ ຜ່ອນຄາຍອາລົມ.
- ກວດສຸຂະພາບເປັນປະຈຳທຸກປີ.
+ ການຫລຸດຜ່ອນຄວາມເສື່ອມຂອງໝາກໄຂ່ຫລັງ :
- ຄວບຄຸມຄວາມດັນເລືອດໃຫ້ຢູ່ 130/80
- ຖ້າເປັນເບົາຫວານ ຄຸມລະດັບນຳ້ຕານໃນເລືອດຕໍ່າກ່ວາ 120 ມິນລີກຣາມ.ເດຊີລິດ ຫລື ນຳ້ຕານສະເລ່ຍສະສົມ HBA1c ໜ້ອຍກ່ວາ 7,0.
- ຖ້າເປັນພະຍາດປະດົງ ພະຍາຍາມຢ່າໃຫ້ພະຍາດຮຸນແຮງຂຶ້ນ, ຮັກສາລະດັບກົດຢູຣິກໃນເລືອດໃຫ້ປົກກະຕິ.
- ຄຸມລະດັບໄຂມັນໃນເລືອດ, ລະດັບ LDL ໃຫ້ໜ້ອຍກ່ວາ 100 ມິນລີກຣາມ.ເດຊີລິດ.
- ຫລີກເວັ້ນການໃຊ້ຢາແກ້ປວດກະດູກ, ຢາລູກກອນ ແລະ ຢາສະໝຸນໄພທີ່ບໍ່ໄດ້ຮັບການຮັບຮອງ ຄວນໄປພົບແພດເມື່ອເຈັບປ່ວຍ.
- ງົດການສູບຢາ ແລະ ຫລຸດການດື່ມເຫລົ້າ.
- ຄວບຄຸມນຳ້ໜັກຕົວ ແລະ ອອກກຳລັງກາຍສະໝໍ່່າສະເໝີ ບໍ່ໃຫ້ນຳ້ໜັກເກີນດັດຊະນີມວນກາຍ BMI ໜ້ອຍກ່ວາ 25.
- ກິນໂປຣຕິນ ຫລື ຊີ້ນສັດໃນອັດຕາສ່ວນທີ່ເໝາະສົມ ຕາມໄລຍະຂອງພະຍາດທີ່ທ່ານໝໍ ຫລື ນັກໂພຊະນາການບຳບັດແນະນຳ.
- ຫລີກເວັ້ນການກິນອາຫານເຄັມ.
- ຫລີກເວັ້ນອາຫານໄຂມັນທີ່ມີກົດໄຂມັນອີ່ມຕົວສູງ ເຊັ່ນ: ນຳ້ມັນຈາກສັດ, ໄຂມັນຈາກກະທີ, ເນີຍ, ນຳ້ມັນໝາກພ້າວ, ຜະລິດຕະພັນນົມເນີຍມາກາຣີນ ແລະ ໄຂ່ແດງ ເປັນຕົ້ນ.
- ນຳ້ດື່ມປະເມີນຕາມສະພາບນຳ້ໃນຮ່າງກາຍ ເຊັ່ນ: ຖ້າບວມ ຫລື ມີນຳ້ຖ້ວມປອດ ແນະນຳໃຫ້ຈຳກັດນຳ້ດື່ມ ເປັນຕົ້ນ.
