ພະແນກອຸດສາຫະກໍາ ແລະ ການຄ້າ ນວ ບໍ່ເຫັນດີໃຫ້ດໍາເນີນທຸລະກິດເປີດຕະຫລາດກາງຄືນ ຢູ່ຖະໜົນລີກີເຮືອງ ຂ້າງວິທະຍຸແຫ່ງຊາດ

ພະແນກອຸດສາຫະກໍາ ແລະ ການຄ້າ ນະຄອນຫລວງວຽງຈັນ ໄດ້ອອກແຈ້ງການເລກທີ 0428/ ພອຄ.ນວ.ຄພນ ລົງວັນທີ 17 ມີນາ 2023 ຜ່ານມາ, ກ່ຽວກັບໃຫ້ຢຸດເຊົາການຂໍສະເໜີດໍາເນີນທຸລະກິດເປີດຕະຫລາດກາງຄືນ ຢູ່ຖະໜົນລີກີເຮືອງ (LeKy huang) ຕັ້ງຢູ່ບ້ານຊຽງຍືນ, ເມືອງຈັນທະບູລີ ນະຄອນຫລວງວຽງຈັນດັ່ງນີ້:

1. ກົດໝາຍວ່າດວ້ຍທາງຫລວງ ( ສະບັບປັບປຸງ ) ເລກທີ 03/ສພຊ; ລົງວັນທີ 8 ພະຈິກ 2018 ມາດຕາ 70 ຂໍ້ 9, 10 ວ່າ ດ້ວຍຂໍ້ຫ້າມວາງເຄື່ອງຂາຍ, ວາງສິ່ງກີດຂວາງ ແລະ ຈັດພິທີຕາມທາງຫລວງໂດຍບໍ່ໄດ້ຮັບອະນຸຍາດ.
2. ຂໍ້ຕົກລົງວ່າດ້ວຍການຈັດສັນຄວາມບໍ່ເປັນລະບຽບຮ້ອຍໃນຕົວເມືອງ ແລະ ຊານເມືອງ ສະບັບເລກທີ 1184/ຈນວ; ລົງ ວັນທີ 20 ທັນວາ 2017 ທີ່ໄດ້ກໍານົດໄວ້ໃນມາດຕາ 8 ຂໍ້ 8.4 ກ່ຽວກັບການແກ້ໄຂສິ່ງກີດຂວາງຕາມທາງຍ່າງ ແລະ ຕາມ ພື້ນທີ່ສາທາລະນະສະຖານເຊັ່ນ: ການຕັ້ງລໍ້, ກາງເຕັ້ນຈັດງານ,ວາງເຄື່ອງຂອງ ຫລື ວາງສິນຄ້າທຸກປະເພດຂາຍຢູ່ຕາມທາງຄົນຍ່າງ, ເຂດສະຫງວນສາທາລະນະແຄມຖະໜົນ ແລະ ຫົນທາງໃນເຂດເທດສະບານ;
3. ການຂໍເປີດກິດຈະການຕະຫລາດກາງຄືນໃສ່ເສັ້ນທາງດັ່ງກ່າວແມ່ນບໍ່ເຫັນດີ, ຖ້າຜູ້ປະກອບການມີຄວາມສົນໃຈໃນການດໍາເນີນທຸລະກິດໃຫ້ຊອກສະຖານທີ່ໃໝ່ ແລ້ວນໍາສະເໜີຫາພະແນກອຸດສາຫະກໍາ ແລະ ການຄ້າ ເພື່ອຄົ້ນຄ້ວາ ນໍາສະເໜີນະຄອນຫລວງວຽງຈັນພິຈາລະນາ.

ດັ່ງນັ້ນ, ຈຶ່ງສະເໜີມາຍັງທ່ານເພື່ອຊາບ ແລະ ໃຫ້ຄວາມຮ່ວມມືໃນການຈັດຕັ້ງປະຕິບັດດ້ວຍ.