ພຽງອາທິດທໍາອິດຂອງສົກຮຽນໃໝ່ພົບເຫັນຜູ້ລະເມີດລະບຽບຈະລາຈອນກວ່າ 500 ຄົນ.
ເຈົ້າໜ້າທີ່ຈະລາຈອນນະຄອນຫລວງວຽງຈັນ ໃຫ້ຮູ້ວ່າ: ໃນອາທິດທໍາອິດຂອງສົກຮຽນໃໝ່ 2017-2018 ເຈົ້າໜ້າທີ່ຈະລາຈອນນະຄອນຫລວງສາມາດກວດ ເຫັນຜູ້ລະເມີດລະບຽບຈະລາຈອນຫລາຍກວ່າ 500 ຄົນ ແລະ ໄດ້ດໍາເນີນການ ສຶກສາອົບຮົມຜູ້ກະທໍາຜິດ 167 ກໍລະນີ, ຂຽນໃບສັ່ງໃຫ້ຜູ້ລະເມີດ 300 ກວ່າກໍລະນີ ແລະ ກັກລົດ 34 ຄັນ.
ເຈົ້າໜ້າທີ່ໃຫ້ຮູ້ວ່າ: ສ່ວນໃຫຍ່ຜູ້ລະເມີດລະບຽບຈະລາຈອນແມ່ນກຸ່ມນັກຮຽນ, ນັກສຶກສາ, ໂດຍຂີ່ລົດບໍ່ໃສ່ໝວກກັນກະທົບ, ບໍ່ມີເອກະສານ ແລະ ດັດແປງສະພາບລົດບໍ່ຖືກເຕັກນິກ, ອັນເປັນຕົ້ນເຫດພາໃຫ້ເກີດອຸປະຕິເຫດຕາມທ້ອງຖະໜົນ. ແນວໃດກໍຕາມ, ໃນໄລຍະສົກຮຽນໃໝ່ນີ້, ເຈົ້າໜ້າທີ່ຈະລາຈອນນະຄອນຫລວງວຽງຈັນ ຈະໄດ້ເພີ່ມທະວີການອອກກວດກາຍວດຍານພາຫະນະ ແລະ ກຸ່ມແກ້ງກວນເມືອງຕາມເສັ້ນທາງຫລັກຕ່າງໆ, ພ້ອມທັງຈະໄດ້ເພີ່ມທະວີວຽກງານໂຄສະນາເຜີຍແຜ່ລະບຽບຈະລາຈອນຕາມໂຮງຮຽນ, ສະຖາບັນການສຶກສາ ແລະ ໂຮງຈັກໂຮງງານຕ່າງໆໃຫ້ເປັນປົກກະຕິ ເພື່ອໃຫ້ຜູ້ຂັບຂີ່ມີສະຕິນັບຖືກົດລະບຽບຈະລາຈອນ ແນໃສ່ສະກັດກັ້ນບັນຫາອຸປະຕິເຫດຕາມທ້ອງຖະໜົນໃຫ້ຫລຸດຜ່ອນລົງ.
