ປກສ ແຂວງ ຫລວງພະບາງ ເຂັ້ມງວດກຳນົດ 6 ຂໍ້ຫ້າມໃນການຫລິ້ນບຸນປີໃໝ່ລາວ ຄສ 2023 ໃຫ້ປອດໄພ
ກອງບັນຊາການ ປກສ ແຂວງ ຫລວງພະບາງ ໄດ້ອອກແຈ້ງການເລກທີ 11/ປກສ.ຫຼບ ລົງວັນທີ 17 ມີນາ 2023 ກ່ຽວກັບການເພີ່ມທະວີປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມໃນຊ່ວງໄລຍະສະເຫລີມສະຫລອງບຸນປີໃໝ່ລາວ ພສ 2566 ຄສ 2023.
ເພື່ອເປັນການປົກປັກຮັກສາງານບຸນປະເພນີທີ່ສໍາຄັນຂອງຊາດເວົ້າລວມ, ເວົ້າສະເພາະຂອງຊາວແຂວງຫລວງພະບາງ (ເມືອງ ມໍລະດົກໂລກ) ໃຫ້ຢູ່ຄຽງຄູ່ກັບວັດຖະນາທໍາຮີດຄອງປະເພນີອັນດີງາມ ທີ່ເຄີຍຮັກສາ ແລະ ສືບທອດມາແຕ່ດຶກດໍາບັນ; ງານບຸນປີໃໝ່ລາວແມ່ນງານບຸນທີ່ຍິ່ງໃຫຍ່ ເຊິ່ງຈະໄດ້ຈັດຂຶ້ນໃນທຸກໆປີ, ສະເພາະແຂວງຫລວງພະບາງຈະມີເອກະລັກທີ່ແຕກຕ່າງກັບບ່ອນອື່ນ ເຮັດໃຫ້ແຂກພາຍໃນ ແລະ ຕ່າງປະເທດເຂົ້າມາທອ່ງທຽວຫລາຍທີ່ສຸດ; ໃນປີນີ້ຈະໄດ້ຈັດຂື້ນລະຫວ່າງວັນທີ 11-20 ເມສາ 2023; ສະນັ້ນຈຶ່ງຮຽກຮ້ອງມາຍັງທຸກພາກສ່ວນຈົ່ງຍົກສູງສະຕິ, ຄວາມຮັບຜິດຊອບໃນການປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ ເຮັດໃຫ້ງານບຸນດັ່ງກ່າວດໍາເນີນໄປດ້ວຍຄວາມເບີກບານມວ່ນຊື່ນສະຫງົບປອດໄພ.
ດັ່ງນັ້ນຈຶ່ງໄດ້ກຳນົດ 6 ຂໍ້ຫ້າມຄື:
- ຫ້າມຂັບຂີ່ລົດໃນສະພາບມືນເມົາ, ຂັບຂີ່ລົດເປັນກຸ່ມແກ້ງ ແລະ ຂີ່ລົດກວນເມືອງ, ໃຊ້ຄວາມແຮງເກີນກໍານົດ ຫລື ຂັບຂີ່ແຊງຂວາ ເປີດສຽງດັງຕາມເສັ້ນທາງ.
- ຫ້າມໃຊ້ພາຫະນະບັນຈຸຖັງນໍ້າ, ຄູນໍ້າ ຫລື ທໍ່ຢ່າງຕໍ່ນໍ້າຈາກເຮືອນອອກມາ ເພື່ອຫົດນໍ້າໃສ່ຜູ້ເດີນທາງໄປ-ມາ ຕາມຖະໜົນ ແລະ ຫ້າມລວມຕົວກັນເປັນກຸ່ມເຕັ້ນ, ຟ້ອນຕາມເສັ້ນທາງ ແລະ ແຄມທາງຢ່າງເດັດຂາດ.
- ຫ້າມບໍ່ໃຫ້ໃຊ້ນໍ້າເປີະເປື້ອນ, ນໍ້າສີ, ນໍ້າປົນກັບພືດຄັນຄາຍ, ນໍ້າກ້ອນໃສ່ຖົງຢາງຫົດ ຫລື ແກ່ວງໃສ່ກັນ ແລະ ບໍ່ໃຫ້ນຸ່ງເຄື່ອງສັ້ນ-ເຂີນຢົ້ວຍວນ ທີ່ບໍ່ຖືກຕ້ອງຕາມຮີດຄອງປະເພນີ; ບໍ່ໃຫ້ໃຊ້ພາຫະນະແຮ່ຄົບງັນຕາມທ້ອງຖະຫນົນ; ບໍ່ຂັບຂີ່ລົດເປັນພຶງເປັນເເພ-ແລ່ນລົດໄວເກີນຂອບເຂດ.
- ບັນດາຫົວໜ່ວຍທຸລະກິດບັນເທິງ, ຮ້ານກິນດື່ມຕ່າງໆ ໃຫ້ປະຕິບັດຕາມແຈ້ງການ ແລະ ຄໍາສັ່ງຂອງພາກສ່ວນກ່ຽວຂ້ອງ ວາງ ອອກຢ່າງເຂັ້ມງວດ.
- ການດໍາເນີນກິດຈະກໍາຕ່າງໆ ຢູ່ພາຍໃນຄອບຄົວ ຫ້າມບໍ່ໃຫ້ເປີດເຄື່ອງສຽງເນື່ອງນັນເກີນຂອບເຂດ ແລະ ຕ້ອງຢຸດເຊົາໃນເວລາ 23:30 ນາທີ (11:30 ນາທີ ຕອນຄ່ຳ).
- ຫ້າມບໍ່ໃຫ້ຜູ້ໂດຍສານນັ່ງຫົວລົດເວລາຂັບລົດໄປຕາມເສັ້ນທາງ; ລົດບັນທຸກສິນຄ້າ-ລົດໂດຍສານບໍ່ຕ່າງເຄື່ອງເກີນຂອບເຂດ, ຜູ້ຂັບຂີ່ພາຫະນະທຸກປະເພດຕ້ອງປະຕິບັດຕາມປ້າຍສັນຍານຈະລາຈອນ ແລະ ກົດລະບຽບການສັນຈອນຢ່າງເຄັ່ງຄັດ.
