ເຈົ້າໜ້າທີ່ຕຳຫລວດບຸກທຳລາຍສາງເກັບອາຫານເສີມປອມ ຢາປອມ ແລະ ເຄື່ອງສຳອາງປອມ ຢືດຂອງກາງໄດ້ 6,320 ກ່ອງ

ສຳນັກຂ່າວ thairath ລາຍງານໃນວັນທີ 24 ມີນາ 2023 ຜ່ານມາວ່າ: ກອງບັນຊາການຕຳຫລວດສອບສວນກາງ ຮ່ວມກັບ ເຈົ້າໜ້າທີ່ຕຳຫລວດກອງບັງຄັບການປາບປາມການກະທຳຄວາມຜິດກ່ຽວກັບການຄຸ້ມຄອງຜູ້ບໍລິໂພກ ແລະ ພາກສ່ວນທີ່ກ່ຽວຂ້ອງ ຮ່ວມກັນຖະແຫລງຜົນການປະຕິບັດກໍລະນີທຳລາຍສາງເກັບຜະລິດຕະພັນອາຫານເສີມຍີ່ຫໍ້ TS6 Probiotic, Probac7, ຢາປອມ ແລະ ເຄື່ອງສຳອາງປອມ ໂດຍຂາຍຜ່ານອອນລາຍ, ເຊິ່ງສາມາດກັກຕົວ ທ້າວ ເຊັງ (ສັນຊາດຈີນ) ສະແດງຕົວຕົນເປັນເຈົ້າຂອງສະຖານທີ່ ແລະ ກິດຈະການດັ່ງກ່າວ ແລະ ຢຶດຂອງກາງໄດ້ 19 ລາຍການ ລວມ 6,320 ກ່ອງ ມູນຄ່າປະມານ 10 ລ້ານບາດ ຫລື ປະມານ 5 ຕື້ກີບ ເຊິ່ງເຄືອຂ່າຍຜູ້ກະທຳຜິດມີການລັກລອບນຳເຂົ້າມາຈາກປະເທດຈີນ.

ເບື້ອງຕົ້ນພະນັກງານສືບສວນໄດ້ແຈ້ງຂໍ້ກ່າວຫາກັບຜູ້ຕ້ອງຫາໃນຄວາມຜິດຈຳໜ່າຍອາຫານປອມ ໂດຍຜູ້ຕ້ອງຫາໃຫ້ການປະຕິເສດຕະຫລອດຂໍ້ກ່າວຫາ ແຕ່ຮັບວ່າ ສິນຄ້າທັງໝົດນຳມາຈາກປະເທດຈີນ ແລ້ວນຳມາໄວ້ໃນສາງເກັບເຄື່ອງແທ້ ເພື່ອນຳສົ່ງໃຫ້ລູກຄ້າຄົນໄທ.

ສ່ວນຜະລິດຕະພັນທີ່ສົງໄສວ່າເປັນຂອງປອມ ຍັງຢູ່ໃນລະຫວ່າງການກວດສອບ ແລະ ຢືນຢັນເພີ່ມເຕີມຈາກກົມວິທະຍາສາດການແພດກະຊວງສາທາລະນະສຸກ.