ລັດຖະມົນຕີ ຖວທ ຕ້ອນຮັບທູດກຳປູເຈຍ ເຂົ້າປຶກສາ ຫາລືການແຫ່ທວນໄຟ ກິລາ ຊີເກມ 2023 ຜ່ານ ສປປ ລາວ
March 26, 2023 - 11:42 AM
ວັນທີ 24 ມີນາ 2023 ຜ່ານມາ, ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບ ທ່ານ ນາງ ທອງ ສຸກົນເທຍຣີ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ຣາຊະອານາຈັກ ກໍາປູເຈຍ ປະຈໍາ ສປປ ລາວ ເພື່ອປຶກສາຫາລືກ່ຽວກັບການນໍາໃຊ້ເສັ້ນທາງໃນພິທີແຮ່ທວນໄຟ ງານມະຫະກຳກິລາ ຊີເກມ 2023 ໂດຍເລີ່ມຕົ້ນຈາກກໍາປູເຈຍ ໃນວັນທີ 20 ມີນາ 2023 ຜ່ານມາ ແລະ ຈະໄປຜ່ານບັນດາປະເທດສະມາຊິກອາຊຽນ ຊຶ່ງຈະມາຮອດ ສປປ ລາວ ໃນວັນທີ 23 ເມສາ 2023 ເພື່ອເອົາທວນໄຟ ໄປຮອດດ່ານໜອງນົກຂຽນ (ລາວ)-ຕຣາຈຽງປາງ (ກຳປູເຈຍ) ໃນວັນທີ 27 ເມສາ 2023 ໃຫ້ຮອດກຳປູເຈຍ.
ທ່ານ ນາງ ທອງ ສຸກົນເທຍຣີ ໄດ້ແຈ້ງຈຸດປະສົງໃນການພົບປະຄັ້ງນີ້ ໃຫ້ທ່ານ ລັດຖະມົນຕີ ໄດ້ໃຫ້ຮັບຊາບ ໂດຍສະເພາະແມ່ນວຽກງານ ທີ່ຕິດພັນກັບຂະແໜງການຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເພື່ອພິຈາລະນາການສະໜັບສະໜູນແມ່ນການເກັບກຳຂ່າວ ແລະ ໂຄສະນາສົ່ງເສີມງານມະຫະກຳຊີເກມ ເພື່ອໃຫ້ປະຊາຊົນລາວ ບັນດາເຜົ່າ ໄດ້ຮັບຮູ້ ແລະ ເຂົ້າໃຈຄວາມໝາຍຄວາມສຳຄັນຂອງງານ ກໍຄື ສາຍພົວພັນ ການຮ່ວມມືຂອງປະຊາຄົມ ປະຊາຊາດອາຊຽນ ໃຫ້ຫລາຍຂຶ້ນກວ່າເກົ່າ ລວມທັງວຽກງານອື່ນໆ ທີ່ກ່ຽວຂ້ອງ.
ໂອກາດດັ່ງກ່າວ, ທ່ານ ນາງ ສວນສະຫວັນ ວິຍະເກດ ໄດ້ສະແດງຄວາມ ຍິນດີຕ້ອນຮັບ ແລະ ຊົມເຊີຍຕໍ່ການມາປະຕິບັດໜ້າທີ່ການທູດຢູ່ລາວ ໃນການເປັນຂົວເຊື່ອມມິດຕະພາບ ລາວ-ກໍາປູເຈຍ ໃນຕະຫລອດໄລຍະ ຜ່ານມາ ຊຶ່ງໄດ້ປະກອບສ່ວນສໍາຄັນ ເຂົ້າໃນການເສີມຂະຫຍາຍ ສາຍພົວພັນມິດຕະພາບອັນເປັນມູນເຊື້ອທີ່ດີງາມ ລະຫວ່າງ ລາວ-ກໍາປູເຈຍ ຕາມທິດຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ໃຫ້ນັບມື້ນັບໄດ້ຮັບການເສີມຂະຫຍາຍ ແລະ ແຕກດອກອອກຜົນຍິ່ງໆຂຶ້ນ.
